Псалманууд 37 - Бурятский Библия. Отдельные книги Ветхого Завета

1 [Давидай зохёоһон].

¹ [Давидай зохёоһон]. א (алээп) Муу юумэ үйлэдэгшэдтэ бү атаарха, буруу юумэ хэгшэдһээ боложо бү һанаа зобо.

² Юуб гэбэл, тэдэ удахагүй ногоон мэтэ сабшагдаха, таряалангай ургамал мэтэ хагдарха. ב (бээт)

³ Эзэндэ этигэжэ, һайе үйлэдэ, газар дээр оршин һуужа, үнэн зүбые сахин байгаарай.

⁴ Эзэндэ баярлан бай, Тэрэ шамда хүсэһэн юумыеш үгэхэ. ג (гиимэл)

⁵ Өөрын замые Эзэндэ даалга, Тэрээндэ этигэ, Тиигэбэл, Тэрэ бэелүүлжэ үгэхэл.

⁶ Тэрэ шинии зүб шударгые гэрэл мэтээр, шударга хэрэгыеш үдын гэрэл мэтээр элирхэй болгохол. ד (даалэт)

⁷ Эзэнэй урда абяагүй бай, Тэрээндэ этигэн найда. Амжалта туйлабашье, хорон мууе түсэблэдэг зондо бү атаарха. ה (һээ)

⁸ Уурлахаа боли, хилэнгээ марта, бү атаарха, муу тээшэ шамайе энэ хүтэлхэл.

⁹ Бузар муухай хэрэгүүдые үйлэдэгшэд усадхагдаха, харин Эзэниие хүсэн хүлеэгшэд газар нютагые уг залгамжалха. ו (ваав)

¹⁰ Мэнэ-мэнэ хорон һанаатан үгы болохонь. Байгша газар руунь анхаран харахадаш, үгы болоод байхал.

¹¹ Газар үгытэй зондо үгтэхэл, элбэг амгалан тайбан байдалаар тэдэ сэдьхэлээ ханан байхал. ז (заайин)

¹² Хорон муу хүн зүб шударга хүнэй урдаһаа муу юумэ һанаашархана, шүдөө хабирна.

¹³ Гэбэшье хэһээлтын үдэрынь ерэжэ байһые хараһандаа Эзэн тэрээн дээрэ энеэнэ. ח (хээт)

¹⁴ Үгытэй болон угаа ядууе унагаахын, зүб сэхэ замаар ябагшадые алахын тула хорон муу зон һэлмээ һугалаа, һурша номоо хүбшэлөөл.

¹⁵ Тэдэнэй һэлмэнь өөһэдынь зүрхэндэ зоогдог, һурша номонь хухараг лэ! ט (тээт)

¹⁶ Зүб шударга хүнэй багаханшье юумэнь олон хорото зоной баялигһаа дээрэ.

¹⁷ Юуб гэбэл, хорон һанаатанай гарынь хухалагдаха, харин зүб шударга зониие Эзэн дэмжэдэг. י (ёд)

¹⁸ Гэм зэмэгүй зоной амидарал Эзэнэй нюдэн доро, тэдэнэй угайнь зөөри хэтэ мүнхэдөө юм.

¹⁹ Гай тодхорой үедэ эшхэбтэр байдалда тэдэ орохогүй, үлэсхэлэн хооһон байдалай сагта садхалан байхал. כ (каап)

²⁰ Харин хорон муу зон усадхагдаха, Эзэнэй дайсад утаан мэтэ замхарха, бэлшээриин ногоон мэтэ үгы болохо. ל (лаамэд)

²¹ Хорон муу хүн зээлеэр абажа, һөөргэнь бусаадаггүй. Харин зүб шударга хүн зээли элбэг үгэдэг.

²² Бурханай юрөөлтэй зондо газар хүртэхэ, харин Тэрэнэй хараалтай зон усадхагдаха. מ (мээм)

²³ Хүнэй алхамые Эзэн баталаа, замынь аршалан байна.

²⁴ Бүдэрөөшье һаа, тэрэ унахагүй, Эзэн гарһаань дүнгэхэ. נ (нүүн)

²⁵ Залуу байхаһаа үбгэртэрөө би зүб шударга хүнэй хаяатай байхые, уг удамайнь гуйраншалжа ябахые үзөөгүйб.

²⁶ Тэрэ хододоо элбэгээр зээли үгэдэг, үри һадаһадынь юрөөлтэйл! ס (саамэх)

²⁷ Мууһаа зайлажа, һайе үйлэдэн бай, тиигэбэл, хэтэ мүнхэдөө оршохош!

²⁸ Юуб гэбэл, Эзэн шударга ёһодо дуратай, Өөртэнь үнэншэ зониие орхихогүй. ע (аайин) Тэдэ хэтэдээ хамгаалагдан байха, харин хорон муу зоной уг удам усадхагдаха.

²⁹ Зүб шударга зон газарые эзэмдэхэ, дээрэнь хэтэдээ ажаһуухал. פ (пээ)

³⁰ Зүб шударга хүнэй аманһаа сэсэн мэргэн, хэлэнһээнь үнэн зүб үгэнүүд гарадаг.

³¹ Бурханай һургаал ухаан бодолдонь, буруу Тэрэ алхахагүй. צ (цадээ)

³² Хорон муу хүн зүб шударга хүниие агнажа, хорлон алаха аргаа бэдэржэ байна.

³³ Эзэн тэрээндэ зүб шударга хүниие дамжуулхагүй, сүүдэй үедэ худалаар хардуулхагүй. ק (кооп)

³⁴ Эзэндэ этигэн бай, замаарнь яба, тиигэбэл, Тэрэ шамда газар эзэлүүлэн байлгаха, хорон муу зоной усадхагдахые харахаш! ר (рээш)

³⁵ Үндэһэлжэ, һаглайжа, бүри һагсагар боложо байһан модондол адли хорон муу, хэрзэгы хүниие хараа һэм.

³⁶ Теэд саг үнгэрөө, тэрэ үгы болоо. Бэдэрнэб, тэрэниие олоногүйб. ש (шиин)

³⁷ Гэмгүй хүниие ажагла, сэхэ сэбэр хүниие хара: иимэ хүнэй ерээдүйнь амгалан тайбан мүн.

³⁸ Харин гэмтэй зон бултадаа үгы хэгдэхэ, хорон муу зондо ерээдүй байхагүй. ת (таав)

³⁹ Зүб шударга зон Эзэнһээ абаралда хүртэхэ, гай тодхорой үедэ Тэрэ тэдээндэ туһалха.

⁴⁰ Эзэн тэдэндэ туһалха, сүлөөрүүлхэ, хорон муу зонһоо сүлөө болгон абарха, юуб гэбэл, тэдэ Тэрээнһээ аршалалта гуйгаа бшуу.