Псалманууд 35 - Бурятский Библия. Отдельные книги Ветхого Завета

1 [Давидай зохёоһон.]

¹ [Давидай зохёоһон.] Эзэн, намайе сүүдлэгшэдые сүүдлыт, намтай тулалдагшадтай тулалдыт.

² Бамбай, хуяг абаад, минии түлөө оролсыт.

³ Жада, һүхэ абаад, намайе намнагшадые угтаарайт. «Би шинии абарал мүн!» гэжэ намда хэлыт.

⁴ Намайе алахаяа һанагша зонтой эшхэбтэр байдал, аягүй ушар тохёолдог лэ. Намда муу һанаашархагшад эшэн һөөргөө бусаг лэ.

⁵ Һалхинда хиидэгшэ мэхиинэ мэтэ болог, Эзэнэй элшэ тэдэниие хиидүүлэг.

⁶ Замынь харанхы, халтирхай байг, Эзэнэй элшэ тэдэниие тууг.

⁷ Юуб гэбэл, ямаршье шалтагаангүйгөөр тэдэ намда урьха табина, ямаршье шалтагаангүйгөөр тэдэ намда нүхэ малтана.

⁸ Мэдээгүй байтарнь хосорол тэдээндэ ерэг лэ, өөһэдын табиһан урьхада тэдэ өөһэдөө орог! Тиимэл һүйдхэлдэ тэдэниие унагаагыт!

⁹ Минии сэдьхэл Эзэндэ баярлажа, абарһандань баясан байнал!

¹⁰ Минии бүхы бэе иигэжэ хэлэнэ: «Эзэн! Хэн Тантай адлиб? Хүсэгүйе хүсэтэйһээ, үгытэйе, ядууе дээрмэшэдһээ абараат!»

¹¹ Намайе худалаар хардагшад урдаһаам тулана, минии мэдэхэгүй юумые мүшхэн байна.

¹² Тэдэ туһые уһаар харюулна, намайе хооһоруулна.

¹³ Харин би тэдэнэй үбдэжэ байхада гашуудалай хубсаһа үмдэжэ, масаг баридаг бэлэйб. Тэдээн тушаа зальбарални Танаар анхарагдангүй, намдаа эрьег лэ!

¹⁴ Тэдэнэй анда нүхэр, аха дүү шэнги байгааб, эхынгээ хойноһоо гашуудажа байһандал толгойгоо гунхылган бархиран ябааб.

¹⁵ Харин минии бүдэрхэдэ, тэдэ баярлан суглараа, урдаһаамни тулажа суглараа. Зогсоо зайгүй тэдэ намайе гүжэрдээ, яаһандам тиигээб — мэдэнэгүйб.

¹⁶ Намайе баһан-доромжолон, нам руу шүдээ хабиран байна.

¹⁷ Ай, Бурхан! Та хэды болотор хаража байхабта? Минии ами наһые хорото хэрэгүүдһээнь, ори ганса амиием арсалангуудһаа абарыт!

¹⁸ Би үргэн олон зоной дунда Танда талархал үргэхэб, үй түмэн арад зоной дунда Танда магтаал дуулахаб.

¹⁹ Ямаршье шалтагаангүй аад, намайе үзэн ядагша зониие бү баясуулыт, ямаршье шалтаггүй аад, намда дайсан бологшодые нюдөөрөө эмнилдүүлэн бү байлгыт!

²⁰ Юуб гэхэдэ, тэдэ амгалан тайбан тухай ярина бэшэ, дэлхэйн түбшэн зоной урдаһаа хуурмаг хэрэгүүдые ябуулна.

²¹ Тэдэ нам руу амаа ангайлгажа, «Тиимэ, тиимэ, бидэ бүгэдые хараабди!» гэжэ гүжэрдэнэ.

²² Эзэн, Та энээниие хараа бэлэйт, аниргүй бү байгыт! Эзэн, намһаа бү холодыт!

²³ Бурхамни, Эзэмни, бодыт, һэриит, зарга хэрэгыем шиидхыт!

²⁴ Минии Эзэн Бурхан, Өөрын зүб шударгыгаар намайе сүүдлыт, намда дээрэлхэн дайсадни бү баясаг.

²⁵ Тэдэ «зай, хүсэлнай бэелээ!» гэжэ бү һанаг лэ. Тэдэ «зай, тэрэниие залгяабди!» гэжэ бү хэлэг лэ.

²⁶ Минии зоболондо баясагшад бултадаа эшхэбтэр аягүй байдалда орог! Өөһэдыгөө минии дээгүүр үргэгшэд эшхэбтэр муухай байдалда унаг!

²⁷ Харин намда һайе һанагшад баясажа, хүхилдэжэ байг лэ! «Өөрын зарасада һайн һайханиие хүсэгшэ Эзэн агууехэ!» гэжэ таһалгаряагүй хэлэн байг лэ!

²⁸ Танай зүб шударгые хэлэмни тунхаглажа, бүхэли үдэрын туршада Танда магтаал үргэхэл!