Псалманууд 34 - Бурятский Библия. Отдельные книги Ветхого Завета

1 [Давид Абимээлэхэй урда галзуурһан дүрэ үзүүлжэ үлдүүлээд ябаһан үедөө зохёогоо.]

¹ [Давид Абимээлэхэй урда галзуурһан дүрэ үзүүлжэ үлдүүлээд ябаһан үедөө зохёогоо.] א (алээп)

² Саг үргэлжэ Эзэниие үреэнэб, магтаал үгэнүүд аманһаам һаладаггүй. ב (бээт)

³ Һүнэһэм Эзэниие магтана. Ядуу зон намайе шагнаад баярлахал. ג (гиимэл)

⁴ Намтай хамта Эзэниие магтагты, нэрыень хамта алдаршуулаял. ד (даалэт)

⁵ Минии хандахада Тэрэ харюусаа, бүхы аюулһаа намайе зайсуулаа. ה (һээ)

⁶ Тэрээн руу хандан эрьегшэ зоной нюур шарай толорно, эшэхэ байдал шарайдань үзэгдэхэгүйл. ז (заайин)

⁷ Ядуу хүнэй дуудахада Эзэн дууладаг, бүхы аюулһаа тэрэниие абардаг. ח (хээт)

⁸ Эзэниие хүндэлдэг зониие тойрон, Эзэнэй элшэ харуулда зогсоно, хамгаална. ט (тээт)

⁹ Туршыта, Эзэнэй хэды ехэ һайн байһые үзэхэт, Тэрээндэ найдагша хүн аза жаргалтайл. י (ёд)

¹⁰ Эзэнэй гэгээн зон, Эзэниие хүндэлыт, хүндэлдэг зон юугээршье дутахагүй. כ (каап)

¹¹ Арсалангуудшье үлэн хооһон байдал үзэдэг, харин Эзэниие даган хүндэлэгшэд юугээршье дутадаггүй. ל (лаамэд)

¹² Үхибүүд, дүтэлэгты, намайе шагнагты, Эзэниие яажа хүндэлхэб гэжэ би таанадые һургахаб. מ (мээм)

¹³ Танай дундаһаа хэн амиды байха, жаргалтай үдэрнүүдые үзэхэ һанаатайб? נ (нүүн)

¹⁴ Тэрэ хүн муу үгэнүүдһээ хэлээ тэбшэн бариг, худал хуурмаг яряанһаа амаа хизаарлаг. ס (саамэх)

¹⁵ Муу муухайһаа буруу хаража, һайн һайханиие үйлэдэг, эб эеые бэдэрэн шармайг. ע (аайин)

¹⁶ Эзэнэй нюдэд үнэн шударга зон руу ханданхай, дуудахыень шэхэнь соносоно. פ (пээ)

¹⁷ Харин муу юумэ үйлэдэгшэдэй урдаһаа Эзэнэй эрьебэл, тэдээн тушаа дурсалгашье үлэхэгүйл. צ (цадээ)

¹⁸ Дуудаһан зониие Эзэн соносодог, ямаршье гай гасаланһаа абардаг. ק (кооп)

¹⁹ Эзэн болбол шанга сохилтодо нэрбэгдэһэн зоной хажууда байдаг, урма зоригоо мохоһон зониие абархал. ר (рээш)

²⁰ Үнэн шударга хүниие олон гай тодхор амададаг, гэбэшье бүхы гай аюулһаа Эзэн тэрэниие абардаг. ש (шиин)

²¹ Бүхы яһыень бүтэн зандань Эзэн байлгадаг, гансаханшье яһыень хухалуулхагүй. ת (таав)

²² Нүгэлтэниие муу юумэн өөрөө усадхаха, үнэн шударга хүниие үзэн ядагшад өөһэдөө хосорхо.

²³ Эзэн зарасанарайнгаа ами наһа абаран байха, Тэрээндэ этигэгшэдэй хэнииньшье үхэхэгүй.