Псалманууд 28 - Бурятский Библия. Отдельные книги Ветхого Завета

1 [Давидай зохёоһон.]

¹ [Давидай зохёоһон.] Минии аршалалта Эзэн, Таниие дууданаб! Дуугүй бү байгыт! Дуугүй байбалтнай, үхэһэн хүндэ адли болохолби.

² Тан руу туһаламжа гуйн дуудахадам, эгээл нангин газар руутнай гараа һунгахадам, гуйһан дуу хоолойем соносыт!

³ Хорото муу зонтой болон гэм зэмэ үйлэдэгшэдтэй хамта намайе бү шэрэн абаашыт, бү һалгыт! Тэдэ хажуудахи зонтоёо амгаланаар хөөрэлдэжэ байһан аад, сэдьхэлдээ муу муухай юумэ түсэблөөл.

⁴ Хэһэн хэрэгүүдынь, муу муухай үйлыень өөһэдтэнь харюулыт! Улаан гараараа хэгшэ юумэнэйнь түлөө амасуулыт! Хүртэхэ юумынь хүртөөгыт!

⁵ Тэдэ Эзэнэй ажал хэрэгүүдые, бүтээлнүүдыень ойшоодоггүй. Энээнэй түлөө Эзэн тэдэниие усадхажа, дахин бодхоохогүй.

⁶ Эзэн магтуулхань болтогой! Тэрэ минии гуйһан дуу хоолой соносоол!

⁷ Эзэн болбол минии хүсэ шадал, минии бамбай мүн. Зүрхэмни Тэрээндэ этигэдэг. Тэрэнэй намда туһалһанда зүрхэмни баярлана, өөрын дуу дуулан, Тэрэниие магтахаб.

⁸ Эзэн хадаа арад түмэнэйнгээ хүсэ шадал, Өөрын шэлэһэн хаанда абарал, хамгаалалта мүн.

⁹ Өөрын арад түмэниие абарыт! Угһаа Танай бүгэдые үреэгыт! Тэдээндэ хонишон боложо, тэдэниие хэтэ мүнхэдөө үргэжэ ябыт!