Псалманууд 26 - Бурятский Библия. Отдельные книги Ветхого Завета

1 [Давидай зохёоһон.]

¹ [Давидай зохёоһон.] Эзэн, үнэн сэхээр ябаалби, зарга хэрэгыем зүб шиидхыта. Хайшаашье гуйбангүйгөөр Тандал найданаб.

² Эзэн, намайе шалгыт, туршыт! Сэдьхэл зүрхым, бодолнуудым шалгыт.

³ Танай энэрэл хайра урдам эли тодо, Танда үнэн сэхээр ябанам.

⁴ Худалша хуурмаг зонтой хамта һуухагүйб, олон зантайшуултай хамта ябахагүйб.

⁵ Хорото һанаатайшуулай суглааниие үзэн яданаб, муу муухай зонтой хамта һуухагүйб.

⁶ Гэмгүй байһанаа элирхэйлэн гараа угаахаб, Үргэлэй шэрээетнай гороолон ябахалби, Эзэн.

⁷ Һайнтэ даа гэжэ шангаар магтан дуулахаб, Танай гайхамшагта хэрэгүүдые тунхаглахаб.

⁸ Эзэн! Танай нангин үргөөдэ, алдар солынтнай оршодог газарта дуратайб.

⁹ Нүгэлтэнтэй хамта, алууршадтай хамта намайе бү усадхыт.

¹⁰ Тэдэ улаан гараараа хорото муухай хэрэгүүдые хэдэг, гарынь эдилгээр дүүрэнхэй.

¹¹ Харин би үнэн сэхээр ябанам, намайе абарыт, хайрлыт!

¹² Хүлнүүдни тэгшэ газарта зогсоно. Зоной дунда Эзэниие үреэн магтанам!