Псалманууд 25 - Бурятский Библия. Отдельные книги Ветхого Завета

1 [Давидай зохёоһон.]

¹ [Давидай зохёоһон.] א (алээп) Эзэн, Танда ами наһаяа үргэнэб. ב (бээт)

² Оо, Бурхамни! Тандаал найданаб. Тиимэһээ эшхэбтэр байдалда орохогүйб, дайсадни намһаа боложо баярлахагүй! ג (гиимэл)

³ Эшэгүүр болохогүй бшуу Танда найдагшад, харин урбагшад эшхэбтэр байдалда орохо, хооһон үлэхэ. ד (даалэт)

⁴ Гараха замаа намда мэдүүлыт, Эзэн! Өөрын харгынуудые намда заажа үгыт. ה (һээ)

⁵ Дахуулан намайе ябыт Өөрын зүб харгыгаар, намайе һургыт! Юуб гэбэл, Та минии Бурхан, минии Абарал мүн, би Танда үдэр бүри найданаб. ז (заайин)

⁶ Жэндэл адли хайрлаха сэдьхэлээ, энэрэл хайраяа һаныт, Эзэн! Тэдэ хэтэ мүнхын бэлэйл. ח (хээт)

⁷ Залуу наһанайм нүгэлые, алдуу зүршэлыем бү һаныт! Намда энэрхы һайнаар хандадагаа һаныт, Эзэн, һайн һанаатай бэлэйлта! ט (тээт)

⁸ Иимэ һайн, зүб шударга юм, Эзэн! Тиимэһээ Тэрэ нүгэлтэндэ замынь заажа үгэдэг. י (ёд)

⁹ Лаб зүб зам руу юрын зониие Тэрэ заладаг, тэдэниие Өөрын замда һургадаг. כ (каап)

¹⁰ Мүрнүүдынь гэбэл, Өөртэйнь хэһэн хэлсээ, заабариинь сахигшадта энэрэл хайра болон үнэн мүн! ל (лаамэд)

¹¹ Нүгэлыем хүлисыт даа, Эзэн, Өөрын нэрэ хаража, хэдышье ехэ байгаа һаань! מ (мээм)

¹² Одоо хэн нэгэн Эзэниие хүндэлжэ, айжа байбал, Ямар зам баримталан ябахаб гэжэ Бурхан тэрээндэ заажа үгэхэл. נ (нүүн)

¹³ Сайн сайхан байдал дотор ами наһань үнгэрхэ, уг удамынь үеһөө үедэ газар эзэмшэн һууха. ס (саамэх)

¹⁴ Түбэгшөөн-хүндэлэн байгаашадта Эзэн этигэдэг, хэлсээгээ тэдээндэ тунхагладаг. ע (аайин)

¹⁵ Урьха зангаһаа Эзэн хүлыем сүлөөлжэ үгэнэ, нюдэдни хододоо Тэрээн руу ханданхай. פ (пээ)

¹⁶ Үршөөгыт намайе, нам руу хараад, би гансаарданги, хорогүй бшууб. צ (цадээ)

¹⁷ Хара гай гасалангуудни олошороо, хабшуу газарһаа намайе гаргыт!

¹⁸ Һүйдхэл, зоболонгыем хаража, бүхы нүгэлым хүлисыт. ר (рээш)

¹⁹ Шадал соогоо дайсадни намайе үзэн ядана, хэды олон гээшэб гэжэ тэдэниие харыт! ש (шиин)

²⁰ Эшэхэгүйб Танда найдажа байһандаа, ами наһым хамгаалыт, намайе абарыт! ת (таав)

²¹ Юугээршье дутуу бэшэ, зүб шударга байһамни намайе хамгаалаг лэ! Гансал Танда би найданаб.

²² Ямаршье гай тодхорһоо зайлуулыт Израилиие, Бурхан!