Псалманууд 21 - Бурятский Библия. Отдельные книги Ветхого Завета

¹ [Дуунай бүлэгэй хүтэлбэрилэгшэдэ: Давидай псалма.]

² Эзэн, хүсэ үршөөһэндэтнай хаан баясажа байна, абарһандатнай тэрэ ямар ехэ баярлажа байна гээшэб!

³ Зүрхэнэйнь хүсэлэнгүүдые Та гүйсэд бэелүүлээт, гуйлтаһаань татагалзаагүйт. [Хүгжэм]

⁴ Та тэрэниие һайхан юрөөлөөр угтан абаат, шэжэр алтан титим толгой дээрэнь табяат.

⁵ Тэрэ Танһаа ами наһа гуйхадань, хэтэ мүнхэдөө ута наһа үршөөгөөт.

⁶ Танай илалта тэрэниие алдаршуулаа, нэрэ хүндэ болон һүр хүсэ тэрээндэ эльгээт.

⁷ Та хэтэ мүнхэдөө тэрэниие үреэгээт, Өөрын оршондо баясаха арга тэрээндэ үгөөт.

⁸ Дээдэ Эзэн, Танда хаан найдадаг, Танай хайрын ашаар тэрэ ганхахагүй.

⁹ Танай гар бүхы дайсадые, үзэн ядагшадыетнай олохол.

¹⁰ Та уурлаха үедээ галтай зууха руу тэдэниие хаяһандал болохот. Танай уур хилэн тэдэниие залгиха, гал тэдэниие шатааха.

¹¹ Тэдэнэй үри газарай хүрьһэнһөө үгы хэхэт, удамыень амиды зоной дундаһаа усадхахат.

¹² Хэдышье тэдэ Танай урдаһаа хорото муу юумэ һанаашархажа, буһалгаа түсэблэһэн байбашье, амжалта туйлахагүй.

¹³ Зугадуулхат тэдэниие, нюур руунь шэглүүлэн һурша номоо татахат.

¹⁴ Хүсэ шадалаараа, Эзэн, үргэмжэлэгдэхэтнай болтогой! Бидэ Танай хүсэ шадалые дуулан магтахабди!