Псалманууд 147 - Бурятский Библия. Отдельные книги Ветхого Завета

¹ [Эзэниие магтагты!] Эзэниие магтагты: манай Бурханда магтан дуулахань һайн, магтахань таатай болон зохид байна.

² Эзэн Иерусалимые бодхоон баридаг, Израилиин таран бутараашадые суглуулдаг.

³ Тэрэ эмтэрһэн зүрхэтэй зониие аргалжа, шархыень боон уядаг.

⁴ Тэрэ одо мүшэдые тоолодог, тэдэ бүгэдэдэ нэрэ үгэдэг.

⁵ Манай Эзэн агууехэ, хүсэ шадалынь угаа ехэ, оюун ухааниинь хизааргүй.

⁶ Эзэн тулигшадта түшэн туһалдаг, хорото муу хүниие доошонь унагаадаг.

⁷ Эзэндэ магтаал дуу дуулагты, манай Бурханда ятагаар хүгжэмлэн дуулагты.

⁸ Тэрэ тэнгэриие үүлээр бүрхөөдэг, газар хүрьһэндэ бороо эльгэдэг, хада уула дээрэ зүлгэ ногоо ургуулдаг.

⁹ Гэрэй амитадта, хирээгэй хаахирагша дальбараануудта хоол хүнэһынь үгэдэг.

¹⁰ Тэрэ мориной хүсэ шадал харадаггүй, хүнэй хүлэй хурданииешье сэгнэдэггүй,

¹¹ Өөрһөөнь түбэгшөөгшэдые, Өөрынь энэрэл хайрада найдагшадые анхаран эльгэлдэг.

¹² Иерусалим, Эзэниие магта! Сион, Бурханаа магтан дуула!

¹³ Юуб гэбэл, Тэрэ бартаануудайтнай шэбхэ бүхэлнэ, таанарай дундахи хүбүүдыетнай юрөөнэ.

¹⁴ Тэрэ танай газар дайдада энхэ тайбаниие тогтооно, эгээл һайн шэниисээр таанарые хангана.

¹⁵ Тэрэ газарта захиралтаа эльгээдэг, үгэнь угаа хурдан хүрэдэг юм.

¹⁶ Тэрэ нооһон мэтээр саһа дэлгэдэг, үнэһэн мэтээр хюруу тараадаг.

¹⁷ Тэрэ мүндэрөө тоброог мэтэ сасадаг. Хэн Тэрэнэй жабарые даан зогсожо шадахаб?

¹⁸ Тэрэнэй үгөө эльгээхэдэнь, бүхы юумэн хайладаг, һалхяа үлеэлгэхэдэнь, уһан урдадаг.

¹⁹ Тэрэ Яковто үгэеэ, хуули ба тогтоолнуудаа Израильда тунхагладаг.

²⁰ Тэрэ ондоо ямаршье үндэһэтэдтэ иимэ юумэ хээгүй, тэдэ тогтоолнуудыеньшье мэдэхэгүй. Эзэниие магтагты!