Псалманууд 115 - Бурятский Библия. Отдельные книги Ветхого Завета

¹ Эзэн, гансал Танда, гансал Танда, бидэндэ бэшэ, магтаал дуун зорюулагдаха ёһотой. Юуб гэбэл, энэрэл хайратнай, үнэн зүбтнай хэтын!

² Үндэһэтэд юундэ «тэдэнэй Бурхан хаана гээшэб?» гэжэ хэлэхэ ёһотойб?

³ Бурхамнай тэнгэридэ оршодог, Өөрынгөө хүсэһэн юумыел хэдэг.

⁴ Харин тэдэнэй онгонууд хадаа мүнгэн ба алтан, хүнэй гараар дархалһан юумэд:

⁵ аматай аад, дуугардаггүй, нюдэтэй аад, харадаггүй;

⁶ шэхэтэй аад, дууладаггүй, хамартай аад, үнэр ойлгодоггүй.

⁷ Гартай байбашье, барижа шададаггүй; хүлтэй байбашье, ябажа шададаггүй. Хоолойнь нэгэшье абяа гаргадаггүй.

⁸ Тэдэниие бүтээгшэд, тэдээндэ этигэгшэд бултадаа тэдээн шэнги болог лэ!

⁹ Израиль, Эзэндэ этигэ! Тэрэ хадаа манай туһа болон бамбай мүн.

¹⁰ Аһарооной бүлэ, Эзэндэ этигэ! Тэрэ хадаа манай туһа ба бамбай мүн.

¹¹ Эзэнһээ түбэгшөөгшэд! Эзэндэ этигэгты! Тэрэ хадаа манай туһа ба бамбай мүн.

¹² Эзэн маанадые мартаагүй, юрөөжэ байна: Израилиин бүлэ юрөөнэ, Аһарооной бүлэ юрөөнэ.

¹³ Өөрһөөнь түбэгшөөгшэдые Тэрэ юрөөнэ — ехэ, багагүй бултадынь.

¹⁴ Эзэн таанарыешье, үри һадаһадыетнайшье үнэр үдхэн болгог лэ.

¹⁵ Таанар тэнгэри, газар бүтээгшэ Эзэнээр юрөөгдэжэ байнат.

¹⁶ Тэнгэри болбол Эзэнэй тэнгэри, харин газар дэлхэйе Тэрэ хүнэй хүбүүдтэ үгөө.

¹⁷ Үхэгшэд, шэмээгүй байдал руу доошоо орогшод бултадаа Тэрэниие магтадаггүй,

¹⁸ харин бидэ Эзэниие энэ сагһаа эхилэн хэтэ мүнхэдөө магтан дуулан байнабди. Эзэндэ магтаал үргэгты!