Псалманууд 109 - Бурятский Библия. Отдельные книги Ветхого Завета

1 [Дунай бүлэгэй хүтэлбэрилэгшэдэ. Давидай псалма.]

¹ [Дунай бүлэгэй хүтэлбэрилэгшэдэ. Давидай псалма.] Магтаалта Бурхамни! Абяагүй бү байгыт!

² Мэхэтэй муу аман нам руу ангайгаад байна. Худал аман намда юумэ хэлэнэ.

³ Бүхы талаһаам үзэн ядаһанай үгэнүүд тойроод байна. Ямаршье шалтаггүй аад, нам руу добтолно.

⁴ Дура хайрымни орондо намайе үзэн ядана. Харюудань би зальбаран байнаб…

⁵ һайем муугаар харюулна, дура хайрыем үзэн ядаһанаар бусаана.

⁶ Муу хүниие тэрэнэй дээрэ томилоорой, буруушаагша баруун таладань зогсог лэ.

⁷ Гэмтэй гэжэ тэрэниие сүүдлэг лэ, зальбаралыньшье нүгэл болог.

⁸ Хоног үдэрнүүдынь үсөөрүүлыт, ажал тушаалыень ондоо хүн эзэлэг лэ.

⁹ Үхибүүдынь үншэрэг, һамганиинь бэлбэһэн болог.

¹⁰ Хүүгэдынь тэнэжэ, гуйлгашан болоод ябаг, һандарһан гэрнүүдһээ үлдүүлэг.

¹¹ Зээлеэр үгэгшэ хүн бии байгаа бүхыень абаг, хариин зон ажалайнь үрэ шэмые үбэршэлэг.

¹² Тэрэниие хайрлаха хэншье, үншэн хүүгэдынь хайрлаха хэншье үгы болог.

¹³ Үри удамынь таһалдуулыт, хойто үедэ нэрэнь мартагдаг.

¹⁴ Үбгэ эсэгэнэрэйнь хэһэн гэмые һануулжа, эхынь нүгэлэй наманшалагдахые бү зүбшөөгыт.

¹⁵ Тэдээн тухай дурдалгые дэлхэй дээрэ Эзэнэй үгы болготор тэдэ Тэрэнэй урда хододоо байг.

¹⁶ Юунэй түлөө бэ гэбэл, тэрэ энэрэл хайра үзүүлхээ мартаа, алахын тула ядуу болон үгытэй хүнэй хойноһоо намнаа, сэдьхэлээ үбдэһэн хүниие усадхахаа һанаа.

¹⁷ Тэрэ хараалда дуратай, өөртэнь тэрэ бусаг лэ. Юрөөлдэ дурагүй, өөрһөөнь тэрэ холо байг лэ.

¹⁸ Хараал тэрэнэй хубсаһан болог, уһан мэтээр досоонь шудхаг, тоһон мэтээр яһа руунь шэнгэг.

¹⁹ Тэрэ хараал тэрээндэ хубсаһан мэтэ, хододоо бүһэлэгшэ бүһэнь болохо болтогой.

²⁰ Энэ хадаа намайе буруушаагшадта, нам тушаа муу бузар хэлээшэдтэ Эзэнһээ үгтэхэ шан болуужан!

²¹ Харин Та, Эзэн Бурхан, нэрээ хаража намда туһалыт, юуб гэбэл, энэрэл хайратайт, һайнта, намайе абарыт!

²² Юуб гэхэдэ, би ядуу, үгытэйб, зүрхэмни үбдэнэ.

²³ Үдэшэндөө ута болоод һүнэдэг һүүдэр мэтэ би һүнэжэ байнам, сарсаа шумуул шэнгеэр намайе үлдэнэ.

²⁴ Масаглаһандаа үбдэгни һулараа, бэемни тураа.

²⁵ Зондоо шоодбори болооб, намайе хараад, толгойгоо һэжэрнэ.

²⁶ Эзэн Бурхамни, намда туһалыт, энэрэл хайраараа намайе абарыт.

²⁷ Энэ болбол Танай гар энээниие үршөөгөө, Эзэн, Та энээниие хээт гэжэ зон ойлгог лэ.

²⁸ Тэдэнэй хараахада Та юрөөгыт, тэдэ буһалгаална — эшхэбтэр байдалда орог. Харин би, Танай зараса, баярлахаб.

²⁹ Намайе хардагшад эшэхэ байдалаар хубсалаг, эшэхээрээ өөһэдыгөө орёог лэ.

³⁰ Харин би Эзэндэ магтаал шангаар дуугаран үргэхэб, олон зоной дунда магтан алдаршуулхаб.

³¹ Юуб гэбэл, сүүдлэжэ байгаашадһаань ядуу хүниие абархын тула баруун таладань Тэрэ зогсоно!