Псалманууд 102 - Бурятский Библия. Отдельные книги Ветхого Завета

¹ [Үгытэй хүнэй голхорон гунираад байхадаа Эзэнэй урда голхоролоо дэлгэһэн зальбарал.]

² Эзэн! зальбаралым шагныт, хашхараамни Тан руу хүрэг лэ.

³ Намһаа буруу бү харыт, Гай гасаланта үедэм нам руу шэхээ табиит, дуудахадам, дуулыт, яарыт, туһалыт.

⁴ Үдэрнүүдни утаан мэтэ үгы боложо байна, яһамни дүрэһэн модон мэтэ шатаатайл.

⁵ Зүрхэмни сабшаһан үбһэн мэтэ хатана, эдеэ хоолшье тухай би мартааб.

⁶ Ёолоһондоо арһа, яһан болошооб.

⁷ Сүл губида шубуун мэтэ, һандаралай дунда шара шубуун мэтэ болооб.

⁸ Унтанагүйб, хушалта дээрэ һуугааша гансаардаһан шубуун мэтэб.

⁹ Дайсад бүхэли үдэрөө намайе доромжолно, намда мууе һанагшад нам руу хараал эльгээнэ.

¹⁰ Үнэһэн минии хоол болоо, ундамни нулимсатай худхаатай.

¹¹ Энэ хадаа Танай уур сухал болон бушаганаһан сухалһаа болоо, Та намайе үргөөд, хаяат.

¹² Үдэрнүүдни һүүдэр мэтэ үгы болоно, үбһэ ногоон мэтэ хатажа байнаб.

¹³ Та, Эзэн, хэтын хэтэдэ оршонот, нэрэтнай үеһөө үедэ дамжана.

¹⁴ Бодыт, Сиондо энэрэл хайраяа үзүүлыт, тэрэниие хайрлаха саг ерээл.

¹⁵ Маанадта, Танай богоолнуудта, шулуунииньшье хайратайл, тооһонииньшье хайратай.

¹⁶ Эзэнэй нэрын урда арадууд шэшэрэлдэн байг лэ, дэлхэйн хаашуул Танай алдарай урда!

¹⁷ Юуб гэбэл, Эзэн Сиониие һэргээн бодхоохо, алдар соогоо заларан харагдаха.

¹⁸ Ядуу зоной маани Тэрэ дуулаха, зальбаралыень буруушаахагүйл.

¹⁹ Ерэхэ үеын зоной Эзэниие магтахын тула саашанхи үенүүдтэ зорюулан энээн тушаа бэшэг лэ.

²⁰ Эзэн Өөрын нангин үндэрһөө хаража, тэнгэриһээ газар руу хараал.

²¹ Юуб гэхэдэ, Тэрэ баряанда байгааша зоной ёолоое дуулаа, үхэхэ зониие сүлөөлөө.

²² Сиондо Эзэнэй нэрэ тунхаглаг, Иерусалимда Тэрээндэ магтаал үргэг.

²³ Энэ хадаа арадуудай болон хан түрэнүүдэй хамта сугларжа, Эзэндэ алба хэхэдэнь болог.

²⁴ «Замдам Тэрэ хүсэ шадалым абаал, наһыем хороогоо.

²⁵ Бурхамни! Наһанайнгаа хахадыеньшье эдлээгүй байхадам намайе бү абыт. Үеһөө үедэ жэлнүүдтнай үргэлжэлэг лэ.

²⁶ Эртэ урда сагһаа хойшо Та дэлхэйн һуури табяат, огторгой — Танай гарай бүтээл.

²⁷ Тэдэ хосорхо, харин Та үлэхэт. Дэгэл мэтээр тэдэниие һэлгэн байхат.

²⁸ Харин Та тэрэл зандаа, Танай жэлнүүд дууһахагүй.

²⁹ Богоолнуудайтнай хүүгэд ажаһууха, үри һадаһадынь урдатнай таһалдахагүй», — гэжэ би хэлээб.