Псалманууд 10 - Бурятский Библия. Отдельные книги Ветхого Завета

¹ Эзэн, юундэ Та холо зогсонобта, бэрхэшээлтэй сагта харагданагүйбта?

² Бардам зантай хорото муу хүн ядуу хүниие намнажа хойноһоонь ябана. Өөрынгөө зангада тэрэ өөрөө орог лэ!

³ Муу хүн дуратай юумэ абажа шадахаараа һайрхажа, хомхой хүн Эзэниие хараажа, Тэрээнһээ буруу хаража байна гээшэ.

⁴ Тэрэ бардамаар хаража, «харюусалга гэжэ байхагүй, Бурхан үгы» гэжэ һанадаг.

⁵ Бүхы замынь амжалтатай байдаг. Танай шиидхэл тэрээнһээ холо, үндэр, бүхы дайсадынь тэрээндэ юуншье бэшэ.

⁶ «Би оройдоошье бүдэрхэгүйб, үеын үедэ гай зоболонтой ушархагүйб» гэжэ тэрэ һанадаг.

⁷ Амандань — хараал, мэхэ, худал, хэлэндэнь — һаад түбэг, хорон һанаан.

⁸ Тэрэ амадаха газарта һуудаг, нюуса газарта гэмгүй хүниие аладаг, ядуу хүниие гэтэн бэдэржэ байдаг.

⁹ Нүхэндөө байгаа арсалан шэнги тэрэ нюуса газарта хорожо, маряажа,

¹⁰ ядарһан хүниие барижа шэрэхэеэ хэбтэдэг. Тиигээд ядарһан нэгэниие торон зангадаа оруулжа баридаг.

¹¹ Бэеэ хуряан, маряажа, һүрэн унахадань, азагүйшүүл хүсэтэй һабартань ородог. «Бурхан мартамхай, буруу хараад байна, юушье харанагүй» гэжэ тэрэ хорото хүн һанадаг.

¹² Эзэн, бодыт! Бурхан, гараа һунгыт! Ядуу зон тухай бү мартыт!

¹³ Хорото муу хүн Бурханиие юундэ хараана бэ? Харюусалгада татахагүй гэжэ Тан тухай һанана гү?

¹⁴ Теэд Та харанат, гай тодхор, зоболон ажагланат. Өөрын гараар бүхы юумэнэй түлөө харюулхат! Ядуу хүн өөрыгөө Танда үгэнэ, үншэн хэнзын туһалагша гээшэт.

¹⁵ Хорото муу юумэ хэжэ, бузар үйлэдэжэ байгаашын гарые хухалаад, хорон мууень элирүүлээд, олохын арагагүй болотор мууень үгы хыт!

¹⁶ Эзэн хадаа хэтэ мүнхэдөө Хаан юм. Газар нютагһаань хариин зон усадхагдаха.

¹⁷ Эзэн, Та даруу номгон зоной хүсэл соносоо бэлэйт. Зүрхыень зоригжуулжа, шэхээ табин шагныт!

¹⁸ Иигэжэ дэлхэй дээрэ дарлалта үүдхэдэг зоной үгы болохын тула үншэн болон ядуу зоной түлөө оролсыт!