Иона 4 - Бурятский Библия. Отдельные книги Ветхого Завета

¹ Ёонаа энээниие тэсэжэ ядан, зүрхэниинь шэмшэрэн уйлажа эхилбэ.

² Эзэндэ мүргэн, иигэжэ хэлэбэ: «Оо, Дээдын Эзэмни, үшөө орон нютагтаа байхадаа одоо энээн тухай хэлээ бэшэ һэн гүб? Хамаг һайниие хүсэгшэ, нигүүсэхы, хүлеэсэ ехэтэй, олониие үршөөгшэ Ши, Бурхан гай тодхор тухай голхорхыеш мэдээд, энэл ушарһаа Таршииш руу зугадаа һэнби.

³ Мүнөө Эзэн һүнэһыемни намһаа абыш, амиды ябанхаар үхэһэмни дээрэл».

⁴ Тиихэдэнь Эзэн иигэжэ хэлэбэ: «Энэ тиимэ ехээр шамайе голхоруулба гээшэ аал?»

⁵ Удаань Ёонаа тэрэ хотоһоо гараад, зүүн таладань һууба, тиигээд тэрэ өөртөө һарабша барижа, тэрэнэй һүүдэр доро һуугаад, энэ хотодо юун бологшо ааб гэжэ хүлеэбэ.

⁶ Толгойень һүүдэрлэхыень, тэрэнэй голхоролые номгоруулхын тула Эзэн һоог ургуулба, тэрэнь Ёонааһоо үндэр болобо; Ёонаа энэ һоогтэ олиггүй ехээр баярлаба.

⁷ Эзэнэй заяаһанай ёһоор үглөөдэрынь үүрээр тэрэ һоогынь хорхойдо химэлүүлээд хаташаба.

⁸ Наранай гарамсаар Эзэн зүүн зүгһөө халуун һалхи үлеэлгүүлбэ, толгойень халуун наранай хайра гамгүйгөөр шаража эхилхэдэ, Ёонаа тэнхээ тамираа алдахадаа, бэедээ үхэл эрин иигэжэ хэлэбэ: «Амиды ябанхаар үхэһэмни дээрэл».

⁹ Бурхан Ёонаада иигэжэ хэлэбэ: «Энэ ургамалай түлөө юундэ ехээр голхорбобши?» Тэрэ иигэжэ хэлэбэ: «Үнэн дээрээ үхэхэ болотороо ехээр голхорооб».

¹⁰ Тиихэдэнь Эзэн иигэжэ хэлэбэ: «Ши тэрэниие таряагүй, ши тэрэниие ургуулаагүй аад, нэгэ һүниин туршада ургаһан, мүн нэгэ һүниин турашада хосорһон энэ һоогэй түлөө голхорнош:

¹¹ зүүн баруунаашье, зүб буруугаашье мэдэхэгүйшүүлые, Нинэвээгэй, агуу хотые, мүн тэндэхи зуун хори гаран мянган хүнүүдые, олон үхэр малнуудые Намһаа бэшэ хэн хайрлаха байгааб?»