Иона 2 - Бурятский Библия. Отдельные книги Ветхого Завета

¹ Эзэн Ёонаае залдихыень абарга загаһанда захирба; Ёонаа энэ загаһанай хото соо гурбан үдэр, гурбан һүни соо байба.

² Ёонаа абарга загаһанай досооһоо Эзэндээ мүргэбэ,

³ тиигээд иигэжэ хэлэбэ: «Гашуудалайнгаа хэмгүй ехэдэ Эзэнээ дууданалби, Тэрэ намайе анхарбал; тамын оёорһоо би дууданаб, Ши минии гуйлтые дуулабаш.

⁴ Ши намайе далайн гүн руу, тамын аман руу оруулбаш, урасхалта долгид намайе хүреэлээл, Шинии уһан, Шинии долгид нам дээгүүр үнгэрнэл. —

⁵ Удаань би иигэжэ хэлэбэб: — Би Шинии үмэнэшэлгэһөө зайсаруулагдааб, гэбэшье би Шинии аша үршөөлдэ дахинаа хүртэхэлби,

⁶ Сэдьхэлыем уһан эзэмдээл, гүн уһан баринал намайе; далайн замаг толгойем боонол.

⁷ Далай соохи уулын хормой хүрэтэр буубалби, газар бата хаалтаараа намайе хэтэдээ хаагаа; Ши, минии Эзэн, сэдьхэлыем сүлөөлыш тамаһаа.

⁸ Үхэхэ туйлдаа хүрэжэ байхадаа, Шамаяа — Эзэнээ дурсааб, Шамда минии гуйлта хүрөөл, Шинии аша үршөөлдэ дахинаа хүртэһүүлби.

⁹ Хооһон шэнжэтэй, хуурмаг бурхадта шүтэгшэд өөрынгөө Энэрилтые орхёол,

¹⁰ харин би Шамда магтаалай дээжые хүргэн мүргэнэлби, хайрыеш би заатагүй дүүргэхэб: абаралгамни Эзэнһээ.

¹¹ Эзэн абарга загаһанда захирба, тиихэдэнь тэрэ гулдин Ёонаае газар дээрэ гаргаба.