Захарияа 8 - Библи

Иерусалим хото абаралгын хараа бодомжо

¹ Түмэн Сэрэгтэ Эзэн намда дахяад айладхаба.

² Түмэн Сэрэгтэ Эзэн иигэжэ айладал буулгаа: «Би Сионой түлөө ехэ уурлажа байнам, асари ехэ уур хилэнсэмни хүдэлөөд байна».

³ Түмэн Сэрэгтэ Эзэн иигэжэ айладана: «Би Сион руу эрьежэ, Иерусалимай дунда оршохом. Тиигээд Иерусалимые Үнэнэй Хото гээд нэрлэхэ, Түмэн Сэрэгтэ Эзэнэй хадые Нангин хада уула гэжэ дуудадаг болохо».

⁴ Түмэн Сэрэгтэ Эзэн иигэжэ айладана: Үбгэд хүгшэд Иерусалимай гудамжаар ажаһуудаг болохо. Зон ута наһа наһалжа, тулгуур дулды тэдээндэ хэрэгтэй болохо.

⁵ Хотын гудамжада наадажа байһан үхи хүүгэд олон болохо.

⁶ Арад түмэнһөө үлэһэн хүнүүдэй нюдэндэ эдэ үдэрнүүд ехэ гайхал түрүүлээ хадаа Минии мэлмыдэ баһал гайхалтай гээшэ гү? гэжэ Түмэн Сэрэгтэ Эзэн айладажа байна.

⁷ Түмэн Сэрэгтэ Эзэн иигэжэ айладана: «Харагты, Би Өөрын арад түмэниие наранай мандаха газарһаа ба наранай шэнгэхэ газарһаа абарха гэжэ байнаб.

⁸ Би тэдэниие һөөргэнь асаржа, Иерусалимда байрлуулхаб. Тэдэ Минии арад түмэн боложо, Би үнэн сэхэ Бурханиинь болохоб».

⁹ Түмэн Сэрэгтэ Эзэн иигэжэ айладана: «Түмэн Сэрэгтэ Эзэнэй үргөөгэй һууриин табигдаһан үдэрһөө хойшо лүндэншэдэй аманһаа тунхаглагдаһан эдэ үгэнүүдые эдэ үдэрнүүдтэ шагнажа байһан таанар Һүмын баригдажа дууһатар хүсэ шадалтай байгты.

¹⁰ Энээнһээ урагша ажал хэдэг хүндэ, хүлһэлжэ абаһан малай түлөө ямаршье түлөөһэн гэжэ байгаагүй. Ороһон гараһан хүндэ амаргүй, дайсантай һэн хойно амгалан бэшэ байгаа. Би бүхы хүнүүдые хоорондонь нэгэ нэгэндэнь эсэргүү табиһан байгааб.

¹¹ Харин мүнөө Би эдэ үлэгшэ хүнүүдтэ урдынхиһаа ондоогоор хандахаб» гэжэ Түмэн Сэрэгтэ Эзэн айладана.

¹² «Үрэ таряан амархан ургана. Уһан үзэм жэмэслэжэ, газар үрэ ургамалаа дэлгээжэ, тэнгэри уһа шүүдэрээ буулгаха. Энэ бүхы зүйлые үлэһэн зондо эблүүлжэ үгэнэб.

¹³ Арадуудай дунда Иудын удам, Израилиин уг удам хараал боложо байһые Би үреэл болгожо, таанарые абархаб. Бү айгты, шандааһаяа шангадхан хүсэ шадалаа элсүүлэгты».

¹⁴ Түмэн Сэрэгтэ Эзэн айладана: «Таанарай үбгэ эсэгэнэрэй Минии сухал хүргэхэ үедэ Би тэдэниие һүнөөхэ гэжэ һанаа һэмби.

¹⁵ Харин мүнөө Иерусалимда, Иудын уг удамда һайн хэрэг үйлэдэхэ гэжэ эдэ үдэрнүүдтэ шиидээб. Ушар тиимэһээ бү айгты.

¹⁶ Таанарай хэхэ юумэн иимэ. Нэгэ нэгэндээ үнэниие хэлэгты. Үнэн сэхээр хэрэг шүүгты. Шүүлгэтнай амар амгалангай түлөө байгуужаг.

¹⁷ Хаяа хадхажа һуудаг хүршэнэрэй урдаһаа хорото мууе бү һанаашалагты. Худал тангариг бү үгэгты. Иимэшүү юумэ Би үзэн ядадагби». Иигэжэ Түмэн Сэрэгтэ Эзэн айладаа.

¹⁸ Түмэн Сэрэгтэ Эзэнэй намда айладаһаниинь иимэ.

¹⁹ Түмэн Сэрэгтэ Эзэн иигэжэ айладажа байна: Дүрбэдэхи, табадахи, долоодохи, арбадахи һарануудта гашуудалай масагай үдэрнүүд таанарта бии. Гашуудалай эдэ үдэрнүүд Иудын уг удамда баяр баясхалантай, хүхюутэй һайхан һайндэрнүүд болог. Гансал үнэниие, амар амгалангые хайрлагты.

²⁰ Түмэн Сэрэгтэ Эзэн иигэжэ айладажа байна: Арад түмэн, олон хотонуудһаа зон Иерусалимда ерэхэ.

²¹ Элдэб хотонуудай зон бэе бэетэеэ уулзажа: «Эзэнэй талархал гуйжа, Түмэн Сэрэгтэ Эзэниие бэдэржэ хамта ябая» гэхэдэнь, Би тантай баһа ябахам гэлдэхэ зон олдохо.

²² Олон тоото арад үндэһэтэд Иерусалимда Түмэн Сэрэгтэ Эзэниие бэдэрхэеэ ерэхэл. Тэдэ Эзэндэ һүгэдэн мүргэхэеэ ерэхэ.

²³ Түмэн Сэрэгтэ Эзэн айладана: Тэдэ үдэрнүүдтэ ондоо хэлэн дээрэ дуугардаг арбан зон нэгэ иудей хүндэ ерэжэ, хубсаһанһаань татан хэлэхэ: «Бурхан тантай гэжэ дуулаабди. Бидэниие өөһэдтөө абыт».