Захарияа 7 - Библи

Иерусалим тухай гашуудал

¹ Даариин Персиин хаан шэрээдэ заларһанай удаа дүрбэдэхи жэлдэ юһэдэхи хислээб һарын дүрбэндэ Эзэн Захарияада айладхал буулгаа.

² Тэрэ үе сагта Бэт-Ээлэй зон Эзэнэй талархал гуйжа, Шарээцэр, Рээгэм-Мээлэх гэгшэдые хүнүүдтэйнь хамта зальбархыень эльгээгээд байгаа.

³ Тэдэ Түмэн Сэрэгтэ Эзэнэй үргөөгэй санаартан болон лүндэншэдһээ асууба: «Бидэ Һүмын һандарһан ушараар олон жэлдэ гашуудаһан заншалаараа табадахи һарада гашуудан уйлаха гүбди?»

⁴ Түмэн Сэрэгтэ Эзэн намда, Захарияада, айладаба:

⁵ – Энэ орон нютагай бүхы арад түмэндэ ба санаартанда хэлэ: «Таанар иигэжэ далан жэлэй туршада табадахи, долоодохи һарануудта масаг барин гашуудахадаа, үнэхөөрөө Минии түлөө масаглана гээшэ гүт?

⁶ Эдихэ уухадаа өөрынгөөл аша туһын түлөө оролдоо бэшэ юм гүт?»

⁷ Эзэн бүри үни Иерусалимда дүүрэн зон ажаһуужа, тэрэ хотын хүгжэн һалбаржа байха сагта урданай лүндэншэдөөр дамжуулан энээнииел айладаа бэшэ юм гү? Хотые тойроод, сүл губидахи урда орондо, хадын баруун хормойдо, доро газарта амитан зоной олоороо һуужа байхада, тунхаглаһан үгэнь иимэ бэшэ аал?

⁸ Тиигээд Эзэнэй Захарияада айладаһан үгэ иимэ:

⁹ – Түмэн Сэрэгтэ Эзэн иигэжэ айладана: Үнэн шударга ёһо дэлгэрүүлэн, хүн бүхэн хажуудахи хүндээ аха дүү мэтэ энэрхы, хайрлаха сэдьхэлээр хандагты.

¹⁰ Бэлбэһэн болон үншэдые, ерүүл хүниие болон ядуушуулые бү дарлагты. Зүрхэ сэдьхэлдээ нэгэ нэгэндээ муу юумэ түсэблэжэ болохогүй.

¹¹ Гэбэшье тэдэ Эзэнэй үгэдэ анхарангүй, шэхээ бүтүүлээд байгаа бэлэй.

¹² Тэдэ зүрхэ сэдьхэлээ шулуун хатуу болгоһон ушарһаа Түмэн Сэрэгтэ Эзэнэй Өөрын Һүлдөөр эртын эшэ үзүүлэгшэ лүндэншэдөөр дамжуулһан хуули заабари болон үгэнүүдые дуулаагүй. Тиихэдэнь Түмэн Сэрэгтэ Эзэнэй айхабтар ехэ уур хилэнсэг хүдэлбэ.

¹³ «Минии дуудахада, тэдэ дуулаагүй һэн. Тэрээн шэнги харюудань тэдэнэй дуудахада, Би дуулахагүйб.

¹⁴ Тэдэниие һалхи шуургантай хамта хари зоной дунда тараан сасаахаб, харин өөһэдэйнь газар нютаг эзэгүй болон хооһоржо, хойшо урагшаа нэгэшье хүн ябахагүй. Тэдэ өөһэдөө һайхан орон нютагаа хооһон губи болгобо», – гэжэ Түмэн Сэрэгтэ Эзэн айладхаа.