Захарияа 6 - Библи

Наймадахи үзэгдэл: дайшалхы тэргэнүүд

¹ Дахяад дээшээ харахадам, хоёр хадын хоорондохи хабшалһаа дүрбэн дайшалхы тэргэ гаража ябаба. Тэдэ хадануудынь үргэлжэ зэд байба.

² Түрүүшын тэргэдэнь хүсэ ехэтэ зээрдэ морид хүллөөтэй, нүгөө тэргэдэнь хара морид,

³ гурбадахи тэргэдэнь сагаан, дүрбэдэхи тэргэдэ алаг морид оруулагданхай ябаба.

⁴ Намтай хөөрэлдэжэ байһан Эльгээмэлһээ асуубаб: – Эзэн минии, энэ баһа юун гээшэб?

⁵ – Дүрбэн һалхин гээшэ. Тэдэ хамаг юртэмсын Эзэнэй урда гараад байна.

⁶ Хара морид хойто зүг руу шэглэнхэй, хойноһоонь сагаан морид ябана, алаг морид үдын наранай орон тээшэ ошохо, – гэжэ Эльгээмэл харюусаба.

⁷ Хүсэтэн газар дэлхэйе һэтэ гараха гэжэ тэгүүлэн байба. «Ябагты, газар дэлхэйгээр аялагты» гэжэ Эльгээмэлэй хэлэхэдэнь, газар дэлхэйгээр ябаба.

⁸ Удаань Тэрэ намда хандан үгүүлбэ: «Хара даа, хойто зүгэй орондо ябагшадынь хойто зүгэй орондо хандаһан Минии сухал номгоруулба».

Ахамад санаарта ба Абарагша

⁹ Эзэн намда зарлиг болобо:

¹⁰ – Вавилоондо баряанда байһанаа Хэлдай, Тобияа ба Едаяа гэгшэд ерээд байна. Тэдээнһээ алта мүнгэ абаад, Цэпаанияагай хүбүүн Ёшияагай гэртэ тэрэ дары ошо. Тэдэ булта Вавилоонһоо бусаа мүн.

¹¹ Титим алта мүнгөөр урлажа, Ёцадаагай хүбүүн, ахамад санаартан Иисүүсэй толгой дээрэ таби.

¹² Тэрээндэ иигэжэ хэлэ: Түмэн Сэрэгтэ Эзэн иигэжэ айладажа байна: Тэрэ эрын нэрэ – Угай түлөөлэгшэ. Түлөөлэгшын угайнь һалаа урган олошоржо, Эзэнэй Һүмэ бүтээхэ.

¹³ Тиимэ, Эзэнэй Һүмэ бариха хүн Тэрэ юм. Тэрэ алдар солодо хүртэжэ, шэрээ зонхилон һууха. Санаартан өөрын шэрээдэ һууха. Хоорондоо эбтэй эетэй байха.

¹⁴ Титимынь Һээлэмдэ ба Тобияада, Едаяада болон Цэпаанияагай хүбүүн Хээнэй аша габьяа тухай һануулан, Эзэнэй Һүмэдэ үлэхэ.

¹⁵ Хаана холоһоо хамаг зон ерэжэ, Эзэнэй Һүмэ бодхоолгодо хабаадалсаха. Тиигэжэ Түмэн Сэрэгтэ Эзэн намайе танда эльгээгээ гэжэ мэдэхэт. Хэрбээ өөрын Эзэнэй үгэ түгэс дуулан дагабалтнай, эдэ бүгэдэ хүсэхэл даа.