Захарияа 5 - Библи

Зургаадахи үзэгдэл: Ниидэжэ ябаһан хуйламал бэшэг

¹ Дээшээ харахадам, хуйламал бэшэг ниидэжэ ябаба.

² – Юу харанаш? – гэжэ Эльгээмэл асууба. – Ниидэжэ ябаһан хуйламал бэшэг харанаб. Утаараа хорин тохой, үргэниинь арбан тохой, – гэжэ харюу үгэбэб.

³ Эльгээмэл намда иигэжэ хэлэбэ: – Энэ хадаа бүхы газар дэлхэйдэ бууһан хараал гээшэ. Хулгай хэһэн хамаг амитан һүнэхэ гэжэ нэгэ таладань бэшээтэй, худалаар тангариг үгэһэн хүншье баһал һүнөөгдэхэ гэжэ нүгөө таладань бэшээтэй.

⁴ Түмэн Сэрэгтэ Эзэн иигэжэ айладаа: Би тэрэниие хулгайшанай гэртэ ба Минии нэрээр хуурмаг тангариглагшын гэртэ ябуулааб. Тэндэ нэбтэрэн орожо өөрыень һүнөөхэ, модо шулууеньшье усадхаха.

Долоодохи үзэгдэл: хэмжүүрэй амһарта соохи эхэнэр

⁵ Намтай хөөрэлдэһэн Эльгээмэл гараад намда хэлэбэ: – Дахяад дээшээ харал даа, юун дүтэлнэ гээшэб?

⁶ – Би мэдэнэгүйлби, – гэжэ би хэлэбэб. – Энэ нэгэ эфаагай багтамжатай хэмжүүрэй ехэ амһарта гээшэ. Зоной нүгэл хэмжэдэг амһарта, – гэбэ тэрэ.

⁷ Туулган хабхагай үргэгдэхэдэ, амһарта соо һуужа байгааша нэгэ эхэнэр харагдаба.

⁸ Эльгээмэл: «Энэ эхэнэр хадаа хилэнсэтэ байдалай дүлгэ тэмдэг», – гээд, эхэнэрые амһартын оёор руу шулуу шэдэһэндэл хаяжа, туулган хабхагаар бүглэбэ.

⁹ Дахин дээшээ харахадам, далитай хоёр эхэнэр харагдаба. Тэдэнэй хилэн шубуунай дали шэнги далинууд һалхи татуулан эшхэрбэ. Тэдэ амһартые үргэжэ, газар тэнгэриин хоорондуур шуумайба.

¹⁰ Намтай дуугаралсагша Эльгээмэлһээ асуубаб: – Хайшань тэрэ амһарта абаашабаб?

¹¹ Тэрэ намда иигэжэ хэлэбэ: – Шинаар орондо тэрээндэ һүмэ бариха юм. Бэлэн болоходонь, тэрэ эхэнэртэй амһарта һууридань һуулгаха.