Захарияа 4 - Библи

Табадахи үзэгдэл: Алтан дэн ба оливын модон

¹ Намтай хөөрэлдэгшэ тэнгэриин Эльгээмэл һөөргөө ерээд, бүхэ нойрһоо һэреэһэн мэтэ намайе дорюун болгобо.

² – Юу харанаш? – гэжэ тэрэ намһаа асууба. – Сула алтаар хэһэн дэнгэй табюур, тэрээн дээрэ томо аяга байна, аяга дээрэ долоон сүгсэ, тус тустаа долоон голтой.

³ Хоёр олива байна, нэгэниинь аягын баруун талада, нүгөөдэнь зүүн таладань табяатай, – гэжэ харюусабаб.

⁴ Удаань би тэнгэриин Эльгээмэлһээ: – Энэ юун бэ? – гэжэ асуубаб.

⁵ Тэнгэриин Эльгээмэл намда: – Энэ юун гэжэ мэдэхэгүй аалши? – гэбэ. Би: – Эрхим ноён минии, би хаанаһаа мэдэхэбиб даа, – гэбэб.

⁶ Тэнгэриин Эльгээмэл намда иигэжэ ойлгуулба: – Түмэн Сэрэгтэ Эзэнэй Зэрубабээлдэ хандаһан иимэ үгэнүүд гээшэ: Шинии туһа болбол эрхэ мэдэлээр бэшэ, хүсэ шадалаар бэшэ, Минии Һүлдөөр ерэхэ.

⁷ Асари хада, Зэрубабээлэй урда ши хэмши? Ши тэгшэ тала гээшэш. Һүмын оройн шулуу дээшэнь гаргажа табихадань, арад зон «Эзэнэй үгэһэн аша буян энэл» гэжэ соло дуудаха.

⁸ Эзэн намда иигэжэ зарлигтаа:

⁹ – Зэрубабээлэй гарнууд энэ гэрэй һуури табиһан гээшэ. Тэдэ гарнууд лэ эсэстэнь хүргэг. Тиихэдэнь Түмэн Сэрэгтэ Эзэн намайе таанарта эльгээгээ гэжэ мэдэхэт.

¹⁰ Долоон дэн тухай хэлээ һэмнайб. Эдэ хадаа Эзэнэй хамаг дэлхэйе шобто харадаг нюдэд гээшэ. Зэрубабээлэй гарта байһан тэгшэлүүр тээшэ баяртайгаар хаража байһан энэ үдэрые хэн шухала бэшэ гэжэ хэлэхэб даа, – гэжэ Эльгээмэл хэлэбэ.

¹¹ Би тэрээнһээ дахяад асуубаб: – Дэнгэй хажууда табяатай жэмэсэй хоёр модон ямар удхатайб?

¹² Хоёр алтан сорго соогуур алтан мэтэ тоһо бэеһээ гаргажа байһан модоной хоёр һалаа ямар удхатай болоноб?

¹³ – Тэрээниие мэдэхэгүй аалши? – гэбэ тэрэ. – Эзэмни, би хаанаһаа мэдэхэбиб? – гэбэб.

¹⁴ Тэрэ хэлэбэ: – Бүхы дэлхэйн Эзэндэ алба хэхэ гэжэ магнайдаа оливын нангин тоһо түрхюулһэн хоёр хүбүүд гээшэ. Тэдэ бол Эзэнэй хоёр талаар зогсодог.