Захарияа 3 - Библи

Дүрбэдэхи үзэгдэл: ахамад санаартан ба эрлиг дайсан

¹ Тэрэ Эзэнэй Эльгээмэлэй үмэнэ зогсожо байһан ахамад санаартан Иисүүсые намда харуулба, баруун таладань тэрээнтэй тэмсэдэг эрлигые баһа зааба.

² Эзэн эрлиг дайсанда айладаба: – Эзэн шамайе буруушаажа байна. Үнэхөөр Иерусалимые шэлэһэн Эзэн шамайе буруушаана! Энэ хүн галһаа абтаһан сусалда адли бэшэ гү?!

³ Иисүүс муухай болоһон хубсаһа үмдэнхэй, Эльгээмэлэй урда зогсобо.

⁴ Эльгээмэл урдань зогсогшодто хэлэбэ: – Иисүүсэй муухай хубсаһыень тайлагты. Өөртэнь хэлэбэ: – Харыт, иигэжэ Би гэмытнай сагааруулбаб, жабхалангай хубсаһаар хубсалуулхаб.

⁵ Удаань иигэжэ хэлэбэ: – Тэрэнэй толгойдо сэбэр орёолто үмдэхүүлэгты. Эльгээмэлэй зогсоод хаража байхадань, сэбэр орёолто толгойдонь орёобо, жабхалангай хубсаһа бэедэнь үмдэхүүлбэ.

⁶ Эльгээмэл Иисүүсые һэргылэн:

⁷ Түмэн Сэрэгтэ Эзэн иигэжэ зарлиг болобо: Ши Минии замаар ябажа, Минии үйлэ бүтээ. Тиигэбэл Минии гэр захирхаш, Минии албатанай харуул болохош. Эндэ зогсогшодой дунда сүлөөтэй ябаха эрхэ шамда соёрхохоб.

⁸ Шагнал даа, ахамад санаарта ши Иисүүс, шинии урда һуужа байһан ахамад санаартан мүн лэ дуулажа байг. Эдэ зон үзэгдэл шэнжын гэршэ болохо. Би Өөрынгөө богоолые, Өөрын Һалаа эндэ асаржа харуулхам.

⁹ Иисүүсэй урда энэ шулуу табинаб. Тэрэ шулуун долоон нюдэтэй. Би тэрээн дээрэ хандалга бэшэг һиилэхэб. Энэ газарай нүгэл хилэнсэгые үгы хэһэн үдэр ерэхэ гэжэ бэшээтэй байха.

¹⁰ Тэрэ үдэр хүнүүд бэе бэеэ уһан үзэм, инжир модонууд доро һуулгахаар уриха. Иигэжэ Түмэн Сэрэгтэ Эзэн айладана.