Захарияа 2 - Библи

Гурбадахи үзэгдэл: Газар хэмжэлгэ

¹ Дахяад толгойгоо үргэжэ харахадам, гартаа хэмжүүрэй ооһор бариһан хүн ябаба.

² – Хайшаа зорибош? – гэжэ асуухадам. – Иерусалим хотые хэмжэжэ, ута үргэнииень мэдэжэ абахам – гэбэ.

³ Намтай хөөрэлдэһэн Эльгээмэлэй ябахадань, нүгөөдэ Эльгээмэл урдаһаань ерэбэ.

⁴ Тэрэ иигэжэ хэлэбэ: – Түргэн ошожо тэрэ залууда хэлэл даа: Иерусалимда зон малынь олошорһон ушарһаа оршон тойронхи газараар таран һууха, хана хэрэмгүй һуурин мэтэ болохо.

⁵ Эзэн айладажа байна: «Тэрэ хотые хүреэлһэн галта хана болохоб, тэрэнэй дунда алдар соломни дэлгэрхэ» гээ.

⁶ «Һүүе! Һүүе! Хойто зүгэй оронһоо бодон тэрьелэгты! Ушарынь хадаа Би таанарые тэнгэриин дүрбэн һалхин мэтэ сасан тарааһан байгааб» гээ.

⁷ «Һэй, Сион, Вавилооной үхинтэй хамта байрлаһан таанар тэндэһээ зайлагты» гээ.

⁸ «Таанадые дээрмэдэһэн арадуудта Тэрэ намайе алдар солын тулада эльгээгээ, танай ойро хүрэбэл, Тэрэнэй нюдэнэй сэсэгыдэ хүрэһэнтэй адли» гээ.

⁹ Түмэн Сэрэгтэ Эзэн айладана: «Мутараа тэдээндэ далайхадам, богоолнуудайнгаа олзо болохол даа». Тиихэдэнь намайе Түмэн Сэрэгтэ Эзэн эльгээгээ гэжэ таанад мэдэхэт.

Иерусалим хото руу бусаха тухай уряал

¹⁰ Сионой үхин, баярлан дуулыш: Дундатнай оршохом гэжэ Эзэн айладанал.

¹¹ Тэрэ үдэр Эзэн руу олон арадууд ерэхэ, тэдэ Эзэнэй арад болохо; дундатнай Эзэн ерэжэ ажаһууха, тиихэдэм Түмэн Сэрэгтэ Эзэн намайе эльгээгээ гэжэ мэдэхэт.

¹² Тиигэжэ Эзэн Иерусалимые Өөрын онсо хото болгохо. Тиигэжэ нангин газарта Эзэн Иудын орон нютагые Өөрымни хуби гээд эзэмшэхэ.

¹³ Эзэнэй урда хамаг амитан анираа хатаг! Өөрын нангин үргөөһөө тэрэ гаража байна.