Захарияа 14 - Библи

Иерусалим хотын түгэс мандал

¹ Эзэнэй үдэр дүтэлжэ байна. Таанарһаа буляан абтаһан олзо хото соотнай хубаагдаха.

² «Би Иерусалимда эсэргүүсэхын тула бүхы үндэһэтэниие суглуулхам. Тэдэ хотые эзэлжэ, гэрнүүдые тонохо, эхэнэрнүүдые хүсэрхэн, хахад зонииень сүлэлгэдэ туужа абаашаха. Үсөөхэн лэ зон хото соо үлэхэ».

³ Удаань Түмэн Сэрэгтэ Эзэн тулалдаанай үдэртэ дайладаг шэнгеэрээ тэдэ арад үндэһэтэдтэ эсэргүү дайгаар орохо.

⁴ Тэрэ Иерусалимһаа зүүн тээшэ оршодог Элеон хада гэшхэхэ, тэрэ уула зүүнһээ баруун тээшээ хахаржа, уулын нэгэ талань хойшоо, нүгөө талань урагшаа нүүхэ.

⁵ «Минии уулын хүндыгөөр таанар зугадаха болонот, уулын хүнды Ацээлдэ хүрэхэ юм. Иудын хаан Уззияагай байха үедэ газарай хүдэлэлгэһөө тэрьелһэн шэнги тэрьелхэт». Тиин минии Бурхан болохо Эзэн заларха, Тэрээнтэй хамта хамаг гэгээн сэрэгынь ерэхэ.

⁶ Тэрэ үдэр гэрэл гэгээгүй боложо, одо мүшэд унтарха.

⁷ Үдэршье бэшэ, һүнишье бэшэ, гансал Эзэндэ танигдаха юрэ бусын үдэр байха. Үдэшын лэ сагта гэрэлтэй болохо.

⁸ Тэрэ үдэр амидаралта уһан Иерусалимһаа урдан гаража, хахад уһаниинь зүүн зүгэй далайда, хахад уһаниинь баруун зүгэй тэнгис далай тээшэ урдаха. Урасхалынь үбэл, зун таһалгаряагүй урдаха.

⁹ Тэрэ үдэр Эзэн бүхы дэлхэйн хаан боложо, Эзэн ганса, Тэрэнэй нэрэнь ганса байха.

¹⁰ Тэрэ үдэр Иерусалимай үмэнэ оршоһон Гээбэһээ Риммоон хүрэтэр газар тала болон хубилбашье, Иерусалим үндын һэргэхэ, Бэньямиинэй хаалгаһаа нэгэдэхи хаалгын газарай углуугай хаалга хүрэтэр, Хананээлэй шулуун барилгаһаа хаанай уһан үзэмэй шахуур хүрэтэр баригдан бодохо.

¹¹ Хүнүүд тэндэ амидарха, хараал тунахагүй, дайсан ерэхэгүй, Иерусалим аюулгүй оршохо.

¹² Иерусалимда эсэргүү дай үүдхэһэн арад түмэниие Эзэн хэһээхэ. Тэдэнэй хүл дээрээ ябаһаар байтарынь, мяхан бэень шалзаржа, нюдэниинь улхархайдаа, хэлэниинь аман соогоо үжэжэ эхилхэ.

^13-15 Иимэ гай гамшаг дайсанай дунда һүжэрэн дэлгэрхэ. Мүн тэрээндэ адли аймшагтай үбшэн бүхы мори, лууста, тэмээн, элжэгэндэ тудажа сохихо. Тэрэ үдэртэ арад түмэндэ аргагүй ехэ сэдьхэлэй үймөөн һандарал Эзэнһээ буужа, нэгэниинь нүгөөдэдөө эсэргүү гараа далайха. Иудын арад Иерусалимда дайтаха. Тойронхи бүхы үндэһэтэнэй эд баялиг болохо алта мүнгэн, хубсаһа хунар ехээр суглуулагдаха.

¹⁶ Иерусалимда дайгаар ороһон бүхы үндэһэтэдһөө үлэһэн хүнүүд жэл бүри эндэ ерэжэ, Хаанда, Түмэн Сэрэгтэ Эзэндэ, мүргэн, Майханай һайндэрые тэмдэглэдэг болохо.

¹⁷ Түмэн Сэрэгтэ Эзэндэ мүргэхэеэ Иерусалим хотодо ерээгүй аймаг угсаатанай газарта хура бороо орохогүй.

¹⁸ Хэрбээ Египедэй аймаг угсаатан ерээгүй һаа, газар дээрэнь бороо баһал орохогүй. Майханай һайндэрые тэмдэглэхэеэ ерэдэггүй арад үндэһэтэниие Эзэнэй сохихо гай гамшаг энэ юм.

¹⁹ Майхан баярые тэмдэглэхэеэ ерэдэггүй бүхы арад угсаатанай ба Египедэй нүгэлынь иигэжэ хэһээгдэхэ болоно.

²⁰ Эдэ үдэрнүүдтэ бүхы юумэн Эзэндэ хабаатай, моридой хонхонуудшье дээрэ «Эзэнэй арюун» гэжэ һиилэгдэһэн байха болоно. Эзэнэй үргөө соохи эдеэнэй тогоонууд үргэлэй шэрээгэй үмэнэ табяатай аяганууд мэтэ болохо.

²¹ Иерусалим болон Иудада эдеэнэй хамаг тогоонууд Түмэн Сэрэгтэ Эзэнэй арюун зүйл болохо. Тахил үргэгшэ бүхэн тэдэниие абажа, эдеэ шанаха аргатай. Тиигээд Түмэн Сэрэгтэ Эзэнэй үргөөдэ хариин наймаашад байхаяа болихо.