Захарияа 13 - Библи

Онгонууд болон худал лүндэншэдһээ сүлөөрэлгэ

¹ Тэрэ үдэр Давидай гэр бүлынхидтэ, Иерусалимай оршон һуугшадта шэнэ булаг урдаха. Тэрэ булаг нүгэл наманшалхын ба бузар арилгахын түлөө дэлбэрхэ.

² Түмэн Сэрэгтэ Эзэн иигэжэ айладхана: – Тэрэ үдэр Би онгон шүтөөнүүдые үгы хэхэб. Тэдэ саашадаа дурсагдахагүй. Худал үзэл тунхагладаг лүндэншэдые болон бузар һүнэһэ газарай нюрууһаа зайлуулхаб.

³ Хэрбээ хэн нэгэн худал үзэл үзүүлбэл, тэрэ хэһээгдэхэ. Түрэһэн эхэ эсэгэньшье «Эзэнэй нэрээр худалаар хэлэнэш, ушар тиимэһээ ши үхэхэ ёһотойш» гэхэ.

⁴ Мүн тэрэ үдэр лүндэншэд өөһэдын үзэл үзэлгэһөө эшэжэ, мэхэлхын тула үмдэдэг шэрүүн нэмэргэеэ үмдэхэгүй,

⁵ харин «Би лүндэншэн бэшэ, хара багаһаа газарай ажал хэжэ ябаһан хүм» гэлдэхэ.

⁶ Ямар нэгэ хүнэй «Тиигэбэл, бэедэшни байһан эдэ шарханууд хаанаһаа гээшэб?» гэжэ асуухада, «Хархис үзэлтэ онгонуудта сохюулаа һэмби», – гэжэ тэрэ харюусаха.

⁷ Түмэн Сэрэгтэ Эзэн иигэжэ айладхана: Эритэ илдэ, Минии хони адуулагшада, Намда дүтын болохо хүндэ эсэргүү бодон таһа сабшыш! Хонишонииень дайража һалгаахадаш, һүрэг хонидынь тарашаха. Би мутараа хорхойдо хорогүй хурьгадта эсэргүү эрьюулхэм.

⁸ Энэ дэлхэйн зоной гурбанай хоёр хубинь хюдагдан хосорхо. Гурбанай нэгэ хубинь үлэхэ.

⁹ Үлэгшэ эдэ зон Минии туршалгада оролсохо. Мүнгэ хайлуулдаг гал дундуур тэдэниие гарган туршахаб. Алта тунгаадаг шэнги тэдэниие тунгаажа сэбэрлэхэб. Тиихэдэ тэдэ Намайе дуудаха. Би харюудань «Энэ Минии арад түмэн», – гэжэ айладхахаб. «Эзэн болбол манай Бурхан», – гэжэ тэдэ хэлэхэ.