Захарияа 11 - Библи

¹ Ливаан, хаалгаяа нээ. Хуша модыеш гал үрэбхиг.

² Агар зандан уйлаха, юуб гэхэдэ хуша модон хосороо. Башаанай сарса модон уйлаха, үдхэн ой усадхагдаа.

³ Тунга ногоон бэлшээри халсаржа, малшадай уйлаха дуулдана. Иорданай һүр жабхалан һүйдхэгдэжэ, залуу арсалангуудай хэрхирхэнь соностоно.

Һайн һанаата хонишон

⁴ Эзэн Бурхамни иигэжэ айладхана: – Нядалагдаха үйлэ руунь һүрэг малаа харюулагты.

⁵ Адуулагшадынь эзэд ба мүнгэ олзо намнаашадта адли. Эзэдынь малаа алажархёод, хэһээлтэгүй үлэнэ. Хони худалдагшадынь «Эзэндэ магтаал соло дуудая! Би баяжааб» гэлсэнэ.

⁶ Би тэндэ һуудаг зониие энэрхэгүйб гэжэ Эзэн тунхаглаад, «Би хүн бүхэниие хүршынь гарта, хаанай дарлалтада унагаанаб. Тэдэнэй орон газараа һандаргаажа байхадань абархагүйб» гэнэ.

⁷ Нядалхаар илгагдаһан, хариин наймаашадта хабаатай хонин һүрэг Би харюулдаг болобоб. Өөртөө хоёр дулды абабаб. Нэгыень Үршөөл гэжэ дуудаад, нүгөөдыень Нэгэдэлгэ гэжэ нэрлэбэб.

⁸ Би нэгэ һарын туршада гурбан хонишодые үлдэбэб. Ушарынь хадаа тэдэниие тэсэжэ байха Минии тэсэбэри дууһаа бэлэй, тэдэшье үзэн ядадаг болобо.

⁹ Би хэлэбэб: «Таанадые бэшэ адуулхагүйб. Үхэхэтнай үхүүжэг, хюдуулхатнай хюдуулуужаг, үлэгшэдынь бэе бэеынгээ мяха эдюужэг».

¹⁰ Удаань Би бүхы арадуудтай баталһан Өөрын хэлсээ һалгабаб гэжэ харуулхын тулада Үршөөл гэжэ дулдыгаа хухалбаб.

¹¹ Иигэжэ Эзэнэй арадуудтай баталһан Хэрээ хүсөө алдаба. Намайе хаража байһан хонин һүрэг энэ хадаа Эзэнһээ бууһан үйлэ гэжэ ойлгоо.

¹² Би тэдээндэ хэлэбэб: «Таанар зохихо гэжэ һанаа һаа, Намда хүлһэ түлэгты. Хэрэггүй гэжэ һанаа һаатнай, хэрэггүй юм ааб даа». Тиихэдэм гушан хэсэг сагаан мүнгэ түлэбэ.

¹³ Эзэн иигэжэ айладаба: – Намайе үнэлэн сэгнэһэн гайхамшагта түлбэрииень Һүмын мүнгэ хадагалдаг һаба руу хая. Би гушан хэсэг мүнгэн шээкэл абажа, Эзэнэй үргөө дотор түмэршэндэ шэдэбэб.

¹⁴ Удаань би Иуда болон Израилиин хоорондо аха дүүгэй харилсаан һалаба гэжэ харуулхын тула Нэгэдэл гэжэ дулдые хоёр болгожо хухалбаб.

¹⁵ Эзэн намда айладаба: – Тэнэг хонишоной хэрэгсэлые өөртөө дахин аба.

¹⁶ Юуб гэхэдэ, энэ газарта би ондоо хонишониие табихамни. Тэрэ хадаа үхэжэ байһан хонин тухай һанаа зобохогүй, үгы болоһониие бэдэрхэгүй, үбшэнтэниие эмшэлхэгүй, элүүртэниие эдеэлүүлхэгүй һэн тула тарган хониной мяха эдижэ, гансал турууень үлөөхэ.

¹⁷ Һүрэгөө орхиһон адуулагша хараалда хүртүүжэг. Тэрэнэй гар болон баруун нюдэн дээрэнь эритэ илдэ буулгагты. Гарынь бүхэлеэрээ хатажа, баруун нюдэниинь огто харахаяа болюужаг!