Захарияа 1 - Библи

Оршол

¹ Даариин Персиин хаан боложо үргэмжэлэгдэһөөр хоёрдохи жэлэй наймадахи һарада Иддоогой аша Бэрэхияагай хүбүүн, лүндэншэн Захарияада Эзэн үгэ айладхаба:

² – Танай үбгэ эсэгэнэртэ Би, Эзэн, ехэтэ хилэнлэһэн гээшэб.

³ Гэбэшье тэдэндээ хэлэлши: Түмэн Сэрэгтэ Эзэн иигэжэ айладажа байна: Нам руу эрьегты, тиигэбэл Би таанар руу эрьехэб.

⁴ «Нүгэлтэ харгыһаа, хилэнсэгтэ үйлэ хэрэгүүдһээ зайлагты», – гэжэ урданай лүндэншэд таанарай үбгэ эсэгэнэртэ хэлэдэг байгаашье һаань, тэдэ Намайе дуулаагүй, үгыем анхараагүй. Тиимэрхүү үбгэ эсэгэнэртээ адляар бү байгты гэжэ Түмэн Сэрэгтэ Эзэн айладажа байна.

⁵ – Танай эсэгэнэр хаанаб мүнөө? Лүндэншэдшье хэтэдэ һууха аал?

⁶ Минии богоол болохо лүндэншэдтэ һургаал болгон дамжуулһан Минии үгэнүүд, Минии гаргаһан шиидхэбэринүүд танай эсэгэ элинсэгүүдтэ бэелээгүй гэжэ байгаа гү? Тэдэ хэлэгшэ бэлэй: «Ябаһан харгыемнай, хэһэн хэрэгыемнай Эзэн яажа сэгнээ һэм, тиимээр лэ үйлэ бүтээгээ», – гэжэ Түмэн Сэрэгтэ Эзэн тунхаглаба гэбэ.

Нэгэдэхи үзэгдэл: Моритой хүнүүд

⁷ Даариин хаан боложо үргэмжэлэгдэһөөр хоёрдохи жэлэй шэбаат һарын хорин дүрбэнэй үдэртэ Иддоогой аша, Бэрэхияагай хүбүүн лүндэншэ Захарияада Эзэнэй үгэ бууба:

⁸ – Энэ һүни үзэгдэл харабаб: миртын һөөгүүдэй дунда хонхосог соо зээрдэ мори унаһан хүн зогсоно, ара тээнь зээрдэ, алаг, сагаан морид байна.

⁹ «Эдэ юун морид гээшэб?» гэжэ би асуубаб. Намтай хөөрэлдэжэ байһан Эльгээмэл: «Эдэнэй юу хэжэ байһые би шамда харуулхаб» – гэбэ.

¹⁰ Мирт мододой дунда зогсоошо нэгэн: «Дэлхэй эрьеэд ерэхыень Эзэнэй эльгээгшэд мүн» гэбэ.

¹¹ Миртын хажууда зогсоһон Эзэнэй Эльгээмэлдэ тэдэ харюу үгэбэ: «Газар дэлхэйе тойрожо ерээбди. Бүхы амитан зон ан бун, ажана тэгшэ һууна».

¹² Удаань Эзэнэй Эльгээмэл хэлэбэ: «Түмэн Сэрэгтэ Эзэн! Хэзээ болотор Иерусалимда, Иудын хотонуудта үршөөл хайраяа хүртөөнгүй байха юмта, аяар далан жэл соо тэдээндэ уурланалта».

¹³ Гэхэдэнь намтай ярилдажа байһан Эльгээмэлдэ Эзэн һанааень заһан, урихан үгэнүүдые айладаба.

¹⁴ Намтай хөөрэлдэжэ байһан тэнгэриин мүнөөхи Эльгээмэл намда хандан үгүүлбэ: – Иигэжэ зарлагты: Түмэн Сэрэгтэ Эзэн иигэжэ айладажа байна: Би Иерусалим болон Сионой түлөө һанаан болоод байнам.

¹⁵ Амар тайбан һууһан арадуудта Би маша ехээр уурлажа байнаб. Сухалаа номгоруулхадам, тэдэнэй хоро шараниинь бусална.

¹⁶ Иерусалим тээшэ эрьежэ хайраяа хүртөөнэм, тэрэ хото соо Минии үргөө бодохо. Түмэн Сэрэгтэ Эзэнэй зарлигаар Иерусалим дээгүүр газар хэмжэлгын зурлаа татагдаха.

¹⁷ Үшөө иигэжэ зарлаарай: Түмэн Сэрэгтэ Эзэн иигэжэ айладаа: Минии хотонууд хүгжэн һалбарха. Эзэн Сиониие дахяад тайбшаруулжа, Иерусалимые дахин шэлэхэ.

Хоёрдохи үзэгдэл: Эбэрнүүд болон дархашуул

¹⁸ Толгойгоо дээшэнь үргэхэдэм, дүрбэн эбэр харагдаба.

¹⁹ Намтай хөөрэлдэһэн Эльгээмэлдэ хандан асуубаб: – Энэ юун бэ? Тэрэ харюусаба: – Иуда, Израиль болон Иерусалимые һандарган тарааһан эбэрнүүд гээшэ.

²⁰ Удаань Эзэн намда дүрбэн дархашуулые үзүүлбэ.

²¹ Би асуубаб: – Эдэ юу хэхэеэ ерээб? Тэрэ иигэжэ ойлгуулба: – Эдэ эбэрнүүд Иудын орон нютагые һандарган тараагаа, хэншье тархияа үргэхэ шадалгүй болонхой, харин дархашуул Иудын урдаһаа бодожо, сүйд татаһан үндэһэтэдэй эбэрынь хуха сохижо, һүр һүлдынь дараха гэжэ ябана.