Яковай хандалга 1 - Библи

Һүзэг этигэл болон ухаан бодол

¹ Бүхы газар дэлхэйгээр тараһан арбан хоёр угсаата Бурханай зон, таанадые Бурханай болон Эзэн Иисүүс Христоосой Яков зараса мэндэшэлнэ.

² Аха дүүнэрни, элдэб олон бэрхэшээл зоболонгуудые үзэхэдөө, өөһэдыгөө жаргалтайбди гэжэ тоологты.

³ Һүзэгэйтнай туршагдахада, тэсэбэритэй болонобди гэжэ өөһэдөө мэдэнэ гүбта даа.

⁴ Эрхим түгэс, алишье талаһаа болбосон, дутагдал эрэмдэггүй байхын тула таанад ямаршье юумые эсэс хүрэтэрнь тэсэжэ гараха ёһотойт.

⁵ Хэрбээ хэн нэгэнэйтнай сэсэн ухаагаар дуталдабалнь, тэрэ тиимэ сэсэн ухаае таанадта хайрладаг Эзэн Бурханиие гуйг лэ, Эзэн Бурхан хүн бүхэндэ гуйһанииень элбэг дэлбэгээр, гэмэрэлтэгүй үгэдэг ха юм.

⁶ Зүгөөр Бурханиие гуйхадаа, һүзэгтэйгөөр, маргангүй гуйгты. Маргаһан хүн далайн долгинуудай һалхинда иишэ тиишээ туугдаһантай адли гүб даа.

^7-8 Тиимэһээл һанаа бодолоо хубилгадаг, хэжэ байһандаа гүйсэд этигэдэггүй хүн Эзэнһээ ямаршье юумэ абахаб гэжэ бү найдаг.

Үгытэй болон баян хүнүүд

⁹ Бурханай үгытэй һүзэглэгшые дээгүүр үргэһэндэ тэрэ хүн баярлажа байг.

¹⁰ Баяншье хүниие Бурханай доошонь дарахадань, тэрэ хүн баярлажа байг, юуб гэбэл, тэрэ уданшьегүй талын сэсэгтэл һүнэхэ ха юм.

¹¹ Наран шангаар шаража, сэсэг ногоое хатаана, һалбарһан сэсэгэй үнгэнь буурана. Энээндэл адляар баян хүн өөрынгөө замаар ябахадаа, хосорон һаладаг.

Хорхойтуулгаар туршалга

¹² Туршалгануудые дабажа гараһан хүн жаргалтай, юуб гэбэл, туршалгануудые дабахадаа, тэрэ хүн Бурханай Өөртэнь дуратай зондо найдуулһан мүнхын амидаралда хүртэнэ.

¹³ Хорхойтуулгада ороходоо, «Бурхан намайе хорхойтуулна» гэжэ бү хэлээрэйт, юундэб гэбэл, Бурханиие харатай юумээр хорхойтуулдаггүй, тиин Тэрэ Өөрөөшье хүнүүдые хорхойтуулдаггүй.

¹⁴ Харин хүн бүхэн өөрынгөө нүгэлтэ хүсэлэнгүүдтэ хүтэлүүлэн, альбандань орон, хорхойтуулгада абтадаг.

¹⁵ Харата хүсэлэнгүүднай бүрилдэһөөр нүгэл түрүүлнэ, харин нүгэлнай ехэ боложо халихадаа, үхэл түрүүлнэ.

¹⁶ Хайрата нүхэдни, өөһэдыгөө бү мэхэлүүлэгты.

¹⁷ Бүхы үлзытэй, эгээн эрхим бэлэгүүд дээрэһээ, тэнгэриин одо мүшэдые, нара һарые бүтээһэн, хэзээдэшье хубилдаггүй, тэдэ ододто адли һүүдэр хэзээшье татадаггүй Бурханһаа үгтэдэг.

¹⁸ Бурхан Өөрынгөө һайн дураар үнэн зүб мэдээсэлэй ашаар бүхы зохёон бүтээгдэһэн юумэнүүдэйнгээ дээжэнь болгохын тула маанадые мүндэлүүлээ.

Бурханай үгэ дуулалга, тэрэниие баримталга

¹⁹ Тиимэһээл, инаг хайрата аха дүүнэрни, шагнахадаа, шамдуухан, хэлэхэдээ, уурлахадаа, яаралгүй байгты.

²⁰ Таанад уурлаха сухалдахадаа, Бурханай хүсэһэн дэмбэрэлтэй юумэнүүдые бүтээжэ шадахагүйт.

²¹ Элдэб янзын забхай зальхай, нүгэлтэ юумэнүүдые үйлэдэхэеэ болёод, зүрхэ сэдьхэлдэтнай һуулгагдаһан, таанадые абарха аргатай мэдээсэлые зосоогоо тогтоожо байгаарайгты.

²² Тэрэ мэдээсэлые гансал шагнан, өөһэдыгөө мэхэлнэгүй, ажамидаралдаа хэрэгжүүлжэ байгаарайгты.

²³ Тэрэ үгые шагнаад, харин ажамидаралдаа хэрэглээгүй хүнүүд өөһэдыгөө толидо хараад, дүрэмни бодото гэжэ үзэһэн хүнүүдтэл адли.

²⁴ Тэдэнэр өөһэдыгөө толидо харахаяа болихотойгоо сасуу ямар дүрэтэй байһанаа мартажархидаг.

²⁵ Хүнүүдые эрхэ сүлөөтэй болгодог эрхим түгэс хуули та бүгэдын мэдэржэ, анхаржа байбалтнай, шагнаад, һүүлээрнь мартадаггүй, ажамидаралдаа хэрэглэдэг байбалтнай, ажамидаралтнай үлзы буянтай байхал.

²⁶ Хэн нэгэнтнай һүзэг һүлдэтэйб гэжэ өөр тухайгаа һанана гү? Хэрбээ таанад хэлэ амаа татажа шададаггүй һаа, һүзэг һүлдэтнай дэмы хооһон гээшэ, таанад миин лэ өөһэдыгөө мэхэлнэт.

²⁷ Үншэн үхибүүдтэ, бэлбэһэн эхэнэрнүүдтэ туһалха, юрын байдалаар өөрыгөө бузарлахаһаа болгоомжолхонь лэ Эсэгэ Бурханда һайшаагдадаг һүзэг һүлдэ мүн.