Ударидагшад 9 - Библи

Абимээлэх хаан болобо

¹ Еруббаалай хүбүүн Абимээлэх Шэхээм хотодо ажаһуудаг эхынгээ түрэлхидтэ ошоод, тэдэндэ болон эхынгээ угай бүхы хүнүүдтэ иигэжэ хэлэбэ:

² – Таанадые мэдэлдээ барижа байхын тула таанадта Еруббаалай бүхы хүбүүд гү, али тэдэнэй хэн нэгэниинь зонхилоо һаа дээрэб гэжэ Шэхээм хотынхидто ойлгуулагты. Би таанадай шуһа мяхан гээшэб.

³ Нагасанарынь тэрэнэй хэлэһэн бүхы үгые Шэхээм хотынхидто дамжуулан ойлгуулаад: – Яаба хээбэшье тэрэ бидэнэй түрэл, – гэлдэбэд.

⁴ Тиигээд тэдэнэр Баал-Бэриитэй һүмэһөө далан шээкэл мүнгэ абажа, тэрэнээ Абимээлэхдэ үгэбэ. Мүнгэеэ абаашаха болоходоо Абимээлэх юушье хэдэггүй, дура зоргоороо ябадаг эрэшүүлые хүлһэлэн абаба. Хаанашье ябахадань, тэдэнэр Абимээлэхые дахабад.

⁵ Абимээлэх Опраа хотодо байдаг эсэгынгээ гэртэ бусаад, өөрынгөө аха дүүнэр болохо Еруббаалай далан хүбүүдые нэгэ шулуун дээрэ алаба. Эгээл энэ үедэ Еруббаалай одхон хүбүүн Ётаам Абимээлэхһээ хоргодожо, ори гансаараа амиды үлэбэ.

⁶ Шэхээм болон Бэт-Миллоогой хотонуудай бүхы хүнүүд Шэхээмэй дэргэдэхи сарса модоной хажуудахи нангин шулуунай дэргэдэ сугларжа, Абимээлэхые өөһэдынгөө хаан болгожо һунгаба.

Ётаамай намтар

⁷ Энээн тухай Ётаамда хөөрэжэ үгэхэдэнь, тэрэ Гэризиим хадын орьёл дээрэ гараад, тэндэһээ хашхаран, шэхээмэйхидтэ иигэжэ хэлэбэ: – Шэхээмэйхид, намайе шагнагты:

⁸ Захиржа байха хааниие өөһэдтөө томилхо гэжэ модонууд эндэ сугларба. «Ши ерээд, бидэнэй хаан боло», – гэжэ тэдэнэр оливын модондо дурадхаба.

⁹ Теэд оливын модон тэдээндэ иигэжэ харюусаба: «Хүнүүд болон бурхад тоһонойм түлөө намда баяр хүргэнэд. Тиимэ һэн тула би тоһоёо үгэхэеэ болёод, бусад бэшэ модонуудые зонхилхо аалби?»

¹⁰ Тиихэдэнь модонууд боди модондо хандан иигэжэ дурадхаба: «Ши ерээд, бидэнэй хаан боло».

¹¹ Боди модон тэдээндэ хандажа: «Би амтатай болон һайн үрэ жэмэсээ үгэхэеэ болижо, ондоо бусад модонуудые зонхилхо болоно аалби?» – гэжэ һураба.

¹² Тиихэдэнь тэдэ модонууд уһан үзэмэй эшэдэ хандажа: «Ши ерээд, бидэнэй хаан боло», – гэжэ дурадхаба.

¹³ Уһан үзэмэй эшэ тэдээндэ хандажа: «Би бурхан болон хүнүүдые хүхеэлгэдэг уһан үзэмэйнгөө шүүһые үгэхэеэ болижо, ондоо бусад модонуудые зонхилхо болоно аалби?» – гэжэ дурагүйгөөр асууба.

¹⁴ Һүүлэй һүүлдэ бүхы модонууд үүргэнэдэ хандажа: «Ши ерээд, бидэнэй хаан боло», – гэжэ дурадхаба.

¹⁵ Үүргэнэ тэдээндэ иигэжэ хэлэбэ: «Үнэхөөрөө намайе өөһэдынгөө хаан болгожо томилхо гэбэл, таанад ерэжэ, минии һүүдэр доро хорогты. Тиигээгүй һаатнай, үүргэнэһээ гал гараад, Ливаанай хуша ойе шатааха».

¹⁶ Хэрбэеэ таанад үнэн зүрхэнһөө, бодото һэшхэлһээ Абимээлэхые өөһэдынгөө хаан болгожо табибал, таанад тэрээнтэй һайн байхат. Хэрбэеэ Еруббаалда болон тэрэнэй гэр бүлэдэ үнэн сэхээр, мүн тэрээндэ хүндэтэйгөөр таанадай хандалга һайн байха.

¹⁷ Минии эсэгэ өөрынгөө ами наһые гамнангүйгөөр таанадай түлөө тулалдажа, таанадые мидиануудай гарһаа абараа.

¹⁸ Харин таанад мүнөөдэр минии эсэгын гэр бүлын урдаһаа эсэргүүсэжэ, тэрэнэй далан хүбүүдые нэгэ шулуун дээрэ алаат. Таанад Абимээлэхые Шэхээмдэ ажаһуугшадай хаан болгожо табибат. Ушар юуб гэхэдэ, тэрэ таанадай түрэл байшоо. Гэбэшье тэрэ минии эсэгын богоол эхэнэрһээ гараһан хүбүүн лэ!

¹⁹ Хэрбэеэ таанад мүнөө Еруббаалда, тэрэнэй гэр бүлэдэ, тэрэнэй угта үнэн ябадал хэбэл, таанад өөһэдынгөө Абимээлэх хаанда баярлагты, тэрэ таанадта баярлаг.

²⁰ Тиимэ бэшэ байбалынь, Абимээлэхһээ гал гаража, Шэхээмэй болон Бэт-Миллоогой хүнүүдые галдан шатааг! Шэхээм хотынхид, Бэт-Миллоо һууринайхид Абимээлэхые үгы хэхэ гал носоог!

²¹ Иигэжэ хэлэһэнэйнгээ һүүлдэ Ётаам тэндэһээ тэрьедэн гүйгөөд, өөрынгөө Абимээлэх ахаһаа хоргодожо, Бээр хотодо ажаһуугаа юм.

Абимээлэх Шэхээмэй урдаһаа тэмсэбэ

²² Гурбан жэл соо Абимээлэх Израилиин хаан түрыень бариба.

^23-24 Абимээлэхэй өөрынгөө аха дүүнэр болохо Еруббаалай далан хүбүүдые алахадань, Шэхээмдэ ажаһуугшад тэрээндэ туһалһан байгаа. Бурхан Абимээлэх болон Шэхээмдэ ажаһуугшадай хоорондо хорото һүнэһэ һүлдэеэ эльгээбэ. Шэхээмэйхид Абимээлэхдэ дурагүй боложо, яажаб даа тэрээндэ хоро хүргэхэ гэжэ шиидэбэ.

²⁵ Шэхээмэйхид тэрэниие отон харууһалха хүнүүдые хадын оройдо һуулгаба. Тэдэнэр хадын хормойгоор ошодог харгыгаар ябаһан бүхы хүнүүдые дээрмэдэн тонодог болобо. Удангүй энээн тухай мэдээсэл Абимээлэхтэ дуулдаба.

²⁶ Ээбэдэй хүбүүн Гааһал аха дүүнэртэеэ суг хамта Шэхээмдэ нүүжэ ерээд, тэрэ хотын гудамжануудаар ябаба. Тиихэдэнь урдаа хараха тулгамнай гэжэ шэхээмэйхид тэрээндэ найдадаг болобо.

²⁷ Нэгэтэ шэхээмэйхид хээрэ гаража, уһан үзэм хуряагаад, тэрэнээ шахан даража, үзэмэй дараһан архи хэбэ. Тиигээд тэдэнэр һайндэрлэн сэнгэһэнэй һүүлдэ өөһэдынгөө бурханай һүмэ соо эдеэлбэд, ундалбад, муу муухайгаар Абимээлэхые хараажа эхилбэд.

²⁸ Ээбэдэй хүбүүн Гааһал иигэжэ асууба: – Абимээлэх хэн бэ? Шэхээм юун бэ? Юундэ бидэнэр тэрээндэ алба хэхэ болообибди? Еруббаалай хүбүүн Абимээлэх, тэрэнэй нютагай засаг баригша Зэбүүл хоёр Шэхээмэй эсэгын Хамоорой хүнүүдтэ алба хэхэ ёһотойл. Юундэ бидэнэр Абимээлэхдэ алба хэхэ болонобибди?

²⁹ Хэрбэеэ минии зонхилгон доро энэ арадай ороо һаань, би Абимээлэхые үлдэхэдөө: «Өөрынгөө сэрэгые суглуула, тулалдаанда гара», – гэжэ тэрээндэ хэлэхэ байгааб!

³⁰ Ээбэдэй хүбүүн Гааһалай хэлэһэн эдэ үгэнүүдые энэ хотын засаг баригша Зэбүүл дуулаад, тэрээндэ олиггүй ехээр сухалдаад,

³¹ иимэ захяатайгаар элшэдээ Арумда байһан Абимээлэхтэ нюусаар эльгээбэ: «Ээбэдэй хүбүүн Гааһал аха дүүнэртэеэ суг хамта Шэхээмдэ ерээд, энэ хотын бүхы зониие шинии урдаһаа эсэргүүсэлгэндэ бодхоожо байна.

³² Тиимэһээ, ши һүни бодоод, өөрынгөө сэрэгшэдтэй хамта тэрэ хотодо дүтэлэн ошожо, таряалан соонь хоргодо.

³³ Эртэ үглөөгүүр, наранай гаража байхада, хотодо добтоло. Шамтай тулалдаха гэжэ тэдэнэр Гааһал хотоһоо гараха. Шинии урдаһаа тэдэнэй добтолходонь, ши өөрынгөө хүсэ шадалые тэдээндэ гарга».

³⁴ Абимээлэх болон тэрээнтэй хамта байһан сэрэгшэд һүни бодожо, Шэхээм хотын хажууда дүтэлөөд, дүрбэн бүлэг болон хубаарба. Тиигээд тэдэнэр дайсадаа отохо нуугада һуубад.

³⁵ Үглөөгүүр Ээбэдэй хүбүүн Гааһалай газаашаа гаража, хотын хаалга үүдэндэ ерээд зогсоходонь, Абимээлэх болон тэрээнтэй хамта байһан сэрэгшэд нуугаһаа гарабад.

³⁶ Гааһал хүнүүдые хараад: «Харал даа. Хүнүүд хадаһаа буунад», – гэжэ Зэбүүлдэ хэлэбэ. «Ши хадын һүүдэрые хүнүүд гэжэ харанаш», – гэжэ Зэбүүл харюусаба.

³⁷ «Һайнаар харыш, хүнүүд уулаһаа буунад. Нэгэ бүлэг Меоннимай сарса модонһоо ерэбэ», – гэжэ Гааһал дахин хэлэбэ.

³⁸ Зэбүүл тэрээндэ иигэжэ хэлэбэ: – «Абимээлэх гэгшэ хэн бэ? Бидэнэр тэрээндэ алба юундэ хэнэбибди?» гэжэ бардамаар хэлэһэн үгэшни хаанаб? Эдэнэр шинии баһагша хүнүүд ха юм. Мүнөө ши урагшаа гараад, тэдэнэртэй тулалда.

³⁹ Гааһал Шэхээмэй хүнүүдые дахуулаад, урагшаа түрүүлжэ, Абимээлэхтэй тулалдаба.

⁴⁰ Гааһалай тэрьедэхэдэнь, Абимээлэх тэрэниие хойноһоонь намнаба. Шэхээм хотын хаалга үүдэн хүрэтэр тэрэнэй олон хүнүүд алуулба.

⁴¹ Абимээлэх сэрэгшэдтэеэ хамта Арумаа хото тээшэ зорибо. Тиихэдэнь Зэбүүл Гааһалые болон тэрэнэй аха дүүнэрые үлдэжэ, Шэхээмһээ гаргажа ябуулба.

⁴² Үглөөдэрынь шэхээмэйхид ажалаа хэхэеэ таряаланайнгаа газарта гараба гэжэ Абимээлэх мэдэбэ.

⁴³ Тэрэ сэрэгшэдээ гурбан бүлэг болгожо хубаагаад, тэдэнээ хээрэ талада хоргодуулба. Шэхээм хотынхидой таряаланайнгаа газарта ерэхэдэнь, Абимээлэх сэрэгшэдээ отон хоргодоһон газарнуудһаа бодхоожо, тэдээндэ добтолбо.

⁴⁴ Абимээлэх өөрынгөө бүлэгые абаад, хотын хаалга үүдые эзэмдэжэ, тэндээ зогсобо. Тиихэдэнь тэрэнэй нүгөөдэ хоёр бүлэгүүд шэхээмэйхидые таряаланайнь талмай дээрэ алаба.

⁴⁵ Абимээлэх бүхэли үдэр Шэхээмэй хүнүүдтэй тулалдажа, тэдэниие бултыень хюдаад, тэрэ хотые һандаргаад, тэгшэ газарнууд дээгүүрнь дабһа сасан адхаба.

⁴⁶ Шэхээмэй аранга хэрэмэй һандарһан тухай эндэ ажаһуудаг аха захатан дуулаад, аюулгүй газар бэдэржэ Эл-Бэриит һүмын Нангин таһалга соо сугларба.

⁴⁷ Шэхээмэй аранга хэрэм соо байгшад мүнөө Һүмэ соо суглараа гэһэн үгэ хүүр Абимээлэхтэ дуулдаба.

⁴⁸ Абимээлэх хамта ябагшадтаяа Цалмоон хада дээрэ гараад, абажа ябаһан һүхөөрөө модоной мүшэрнүүдые таһар сабшажа, тэдэнээ ээм мүрэ дээрээ табяад: «Минии хэһэн юумые таанад бушуу түргөөр хэгты», – гэжэ суг хамта ябагшадтаа хэлэбэ.

⁴⁹ Хүн бүхэн модоной мүшэрнүүдые таһара сабшажа, тэдэнээ ээм мүрэ дээрээ табяад, Абимээлэхые дахан, хойноһоонь ошобо. Тэдэнэр мүшэрнүүдээ Шэхээмэй һүмые тойруулан табяад, тэдээндэ гал носообо. Тиигэжэ тэдэнэр тэрэ һүмые, мүн тэрээн соо хороод байһан мянгаад эрэшүүл болон эхэнэрнүүдые галдан шатааба.

Абимээлэхэй үхэл

⁵⁰ Һүүлдэнь Абимээлэх сэрэгшэдтэеэ хамта Тэбээц хотодо добтолжо, тэрэниие эзэмдэн абаба.

⁵¹ Бата бэхи аранга хэрэм тэрэ хотын дунда байгаа. Эрэшүүл болон эхэнэрнүүд, энэ хотын бүхы хүнүүд гүйлдэжэ тэрээн соо оромсоороо, үүдыень шэбхэдээд, аранга хэрэмэй дээдэ дабхарта гараба.

⁵² Абимээлэх хамта ябагшадтаяа тэрэ аранга хэрэмые бүһэлэн тойроод, галдаха гэжэ тэрэнэй үүдэндэ дүтэлбэ.

⁵³ Тиихэдэнь нэгэ эхэнэр тээрмын түгдэрхэй шулуу дээрэһээнь хаяжа, тэрэнэй толгойе гэмтээбэ.

⁵⁴ Абимээлэх зэбсэгыень абажа ябагшаяа дары түргэн дуудажа ерүүлээд: «Эхэнэр хүн намайе алаа гэжэ хэлсэхэгүйн тула һэлмэеэ һугалаад, ши намайе ала», – гэжэ тэрээндэ хэлэбэ. Залуу хүбүүн һэлмээрээ хадхажа тэрэниие алаба.

⁵⁵ Абимээлэх үхөө гэжэ израильшууд хараад, өөр өөрынгөө гэртэ бусабад.

⁵⁶ Өөрынгөө далан аха дүүнэрые алажа, өөрынгөө эсэгэдэ муу юумэ хэһэн Абимээлэхэй нүгэлые Бурхан иимэ үхэлөөр шиидхэн харюулба.

⁵⁷ Тиигээд Бурхан Шэхээмдэ ажаһуугшадай бүхы мууень тэдэнэй өөһэдынь толгой дээрэ буулгаба. Иигэжэ Еруббаалай хүбүүн Ётаамай хараал тэдээндэ тохёолдобо.