Ударидагшад 8 - Библи

Эпрааим обогойхин Гидоондо сухалдана

¹ Эпрааим обогойхин суглараад: – Юундэ ши иимэ ябадал гаргабаш? Мидиануудтай дайлалдахадаа, юундэ бидэниие дуудабагүйбши? – гэжэ Гидоонһоо асуугаад, тэрээнтэй арсалдашаба.

² Гидоон тэрээндэ иигэжэ хэлэбэ: – Мүнөө би таанад шэнги ехэ юумэ хээ аалби? Абиээзэрэй гэр бүлынхидһөө һураггүй ехэ уһан үзэм түүжэ суглуулхадаа, Эпрааимайхид баярланагүй аалта?

³ Эзэн Хирээ болон Шоно гэжэ нэрэтэй мидиануудай тайжануудые таанадай гарта үгөөл! Би хэһэн өөрынгөө амжалтые таанадай хэһэн ажалтай яажа жэшэхэбиб? Иигэжэ харюусахадань, тэдэнэр номгоржо, Гидоондо зүрюу юумэ хэлэхэеэ болибод.

Гидоон мидианай хоёр хаашуулые амидыгаар бариба

⁴ Гидоон болон тэрээнтэй хамта гурбан зуун сэрэгшэд Иордан мүрэн гаталжа, нүгөөдэ эрье дээрэнь гараба. Тэдэнэр дайсадые намнан мүрдэлгэһөө эсэбэд.

⁵ Гидоон Суккоот хотодо ажаһуугшадта иигэжэ хэлэбэ: – Минии хойноһоо ябаһан сэрэгшэдтэ хилээмэ үгэгты. Эдэнэр гэдэһээ үлдөөшье, эсээшье. Харин би Мидианай хаашуул Зээбах Цалмуннаа хоёрые мүрдэжэ ябанаб.

⁶ Суккоот хотын засаг баригшад тэрээндэ иигэжэ хэлэбэд: – Таанад Зээбах Цалмуннаа хоёрые үшөө баряагүйт. Теэд бидэнэр шинии сэрэгшэдые юундэ эдеэлүүлхэ болобобди?

⁷ Тиихэдэнь Гидоон тэдэндэ иигэжэ хэлэбэ: – Зээбах Цалмуннаа хоёрые бидэнэй гарта Эзэнэй тушаахадань, үүргэнын болон нохойн хоншоорой эшээр таанадай нюсэгэн бэеын бэлсэрүүтэтэр шабхадахабди.

⁸ Гидоон Суккоодһоо Пэнүһээл ерээд, тэрэ хотынхидһоо хилээмэ эрибэ. Тиихэдэнь тэдэнэр Суккоот хотынхидтол тон адляар Гидооной сэрэгшэдтэ хилээмэ үгэхэеэ арсаба.

⁹ Гидоон Пэнүһээл хотынхидто иигэжэ хэлэбэ: – Илалта туйлаад, һөөргөө бусахадаа, би энэ аранга хэрэмытнай һандаргахаб.

¹⁰ Зээбах Цалмуннаа хоёр арбан таба мянган сэрэгшэдтэеэ суг хамта Каркоор хотодо саг зуура байрлаба. Эдэ сэрэгшэд зүүн зүгтэ ажаһуугшадай зуун хори мянган сэрэгшэдһээ амиды үлэһэн байба.

¹¹ Гидоон Нообаа болон Ёгбэһаа хотоһоо зүүн зүг тээшэ ошодог харгыгаар Каркоор хото хүрөөд, һанаа амар байһан дайсадай майхан хүреэндэ добтолон оробо.

¹² Зээбах, Цалмуннаа хоёр зугадан тэрьедэбэ. Гэбэшье Гидоон тэдэнэй хойноһоо намнажа хүсөөд, Мидианай хаашуулые барижа, тэдэнэй сэрэгүүдые үй бута сохибо.

¹³ Ёһаашай хүбүүн Гидоон дайнһаа бусахадаа, Хээрэсэй дабаае гаталба.

¹⁴ Гидоон Суккоот хотын залуу хүбүүе баряад мүшхэбэ. Тэрэ залуу хүбүүн Суккоот хотын засаг баридаг далан долоон дарганарай болон аха захатадай нэрэнүүдые бэшээд, Гидоондо үгэбэ.

¹⁵ Гидоон суккоодойхидто ерээд, иигэжэ тэдээндэ хэлэбэ: – Эдэнэр Зээбах Цалмуннаа хоёр лэ даа. Таанад намайе наада барин энеэлдээд: «Таанад Зээбах Цалмуннаа хоёрые үшөө баряагүй байнат. Бидэнэр шинии эсэһэн сэрэгшэдтэ юундэ эдеэ хоол үгэхэ болобобди?» – гэжэ хэлээ бэлэйт.

¹⁶ Тэрэ Суккоот хотын аха захатадые баряад, тэдэниие хэһээжэ, адаалхай үүргэнын болон нохойн хоншоорой эшэнүүдээр шабхадаба.

¹⁷ Тиигээд Гидоон Пэнүһээлэй аранга хэрэм һандаргаад, тэрэ хотынхидые хюдаба.

¹⁸ Гидоон Зээбах Цалмуннаа хоёрһоо иигэжэ һураба: – Табоор хада дээрэ таанадай алагша хүнүүд ямар зон байгаа һэм? Зээбах Цалмуннаа хоёр тэрээндэ иигэжэ харюусаба: – Тэдэнэр шамдал адли байгаа. Тэдэнэй хүн бүхэн хаан хүбүүн шэнги байгаа бэлэй.

¹⁹ Гидоон тэдээндэ иигэжэ хэлэбэ: – Тэдэнэр минии эжын хүбүүд, минии түрэһэн аханар байгаа. Хэрбэеэ тэдэниие амиды үлөөһэн байбалтнай, мүнөө би таанадые алахагүй һэм гэжэ Эзэндэ тангаригланаб!

²⁰ Тиигээд тэрэ өөрынгөө ехэ хүбүүн Етээртэ иигэжэ хэлэбэ: – Эдэ хаашуулые ала! Етээр үшөө залуухан байһан тула тэдээнһээ айгаад, өөрынгөө һэлмые хуйһаань һугалбагүй.

²¹ Тиихэдэнь Зээбах Цалмуннаа хоёр Гидоондо иигэжэ хэлэбэ: – Ши өөрөө бидэниие ала! Шамда зориг ба хүсэн бии ха юм. Гидоон бодоод, Зээбах Цалмуннаа хоёрые алажа, тэмээнүүдэйнь хүзүүнһээ гоёлтотой горьёнуудыень абаба.

Гидоон эфод хэбэ

²² Израильшууд Гидоондо иигэжэ хэлэбэд: – Ши, удаань шинии хүбүүд, һүүлдэнь шинии ашанар бидэниие зонхилон ударидаг. Ушар юуб гэхэдэ, ши бидэниие мидиануудһаа абарааш!

²³ Гидоон тэдээндэ иигэжэ хэлэбэ: – Таанадые би зонхилон ударидахагүйб. Таанадые минии хүбүүдшье зонхилон ударидахагүй. Зүгөөр таанадые Эзэн зонхилон ударидаха болтогой!

²⁴ Гидоон сэрэгшэдтээ иигэжэ хэлэбэ: – Таанадһаа нэгэл юумэ гуйнаб. Сэрэгшэ бүхэн өөрынгөө олоһон олзоһоо нэгэ нэгэ һиихэ намда үгэгты! Ушар юуб гэхэдэ, диилдэгшэд олон алтан һиихэтэй байба. Гэбэшье тэдэ һиихэнүүдынь израильшуудай байһан юм.

²⁵ – Үгэхэбди, – гэжэ тэдэнэр Гидоондо хэлээд, сэрэгшэ бүхэн хубсаһаяа газар дээрэ дэлгээжэ дэбдеэд, тэрээн дээрээ олоһон өөһэдынгөө олзоһоо нэгэ нэгэ һиихэ хаяба.

²⁶ Сэрэгшэдһээ эрижэ абаһан тэрэнэй алтан һиихэнүүд нэгэ мянга долоон зуун шээкэл болобо. Эдээнһээ гадуур Мидианай хаашуулай бүһэлжэ ябаһан гоёолтотой горьёнуудые, шэмэглэл зүүдхэлнүүдые, үмдэжэ ябаһан уб улаан хубсаһануудые болон тэмээнүүдэйнь хүзүүнүүдһээ алтан гэнжэнүүдыень абажа, бэлэг болгон, Гидоондо үгэбэ.

²⁷ Гидоон тэрэ алтаараа нэгэ эфод бүтээгээд, өөрынгөө Опраа хотодо тэрэнээ табиба. Тиихэдэнь бүхы израильшууд эфодтонь шүтэн мүргэжэ, тэндэ забхайралдажа эхилбэ. Тэрэ эфодынь Гидоондо болон тэрэнэй бүхы түрэлхидтэ занга болобо.

Гидооной үхэл

²⁸ Мидианууд Израилиин хүбүүдтэ һүр һүлдөөрөө дарагдажа, дахин толгойгоо үргэбэгүй. Гидооной ажаһуухада, энэ нютагта дүшэн жэл соо энхэ амгалан байба.

²⁹ Ёһаашай хүбүүн Еруббаал нютагаа бусажа, өөрынгөө гэртэ ажаһууба.

³⁰ Гидоон олон һамгатай байһан тула далан хүбүүтэй болоһон байгаа.

³¹ Шэхээмдэ байдаг баряанай эхэнэрэй Гидоонһоо хүбүүтэй болоходонь, Гидоон тэрэ хүбүүень Абимээлэх гэжэ нэрлэбэ.

³² Ёһаашай хүбүүн Гидоон үндэр наһа наһалаад үхэбэ. Тиихэдэнь тэрэниие Абиээзэрэй хубаариин газарай Опраа хотодо хүдөөлүүлһэн эсэгынь агы нүхэн хуурсагта хүдөөлүүлбэ.

³³ Гидооной наһа барахалаар израильшууд дахин Баалда шүтэн забхайралдажа, Баал-Бэриитые өөһэдынгөө бурхан болгобо.

³⁴ Израильшууд Израилиин газар дайдыень хүреэлһэн бүхы дайсадай гарһаа тэдэниие гаргажа абарһан Эзэниие, өөрынгөө Бурханиие һанажа ябабагүй.

³⁵ Мүн Израильда хамаг һайн юумэ хэһэнэйнь түлөө тэдэнэр Еруббаалай гэхэ гү, али Гидооной гэр бүлэдэ энэрэл хайра үзүүлбэгүй.