Ударидагшад 6 - Библи

Мидианууд Израилиие эзэмдэбэ

¹ Израильшууд Эзэнэй дурагүй муу муухай юумэнүүдые дахин хэжэ эхилбэ. Тиихэдэнь Эзэн тэдэниие долоон жэл соо зонхилхыень мидиануудай гарта үгэбэ.

² Мидианууд израильшуудһаа булюу хүсэтэй байһан тула тэдээндэ олиггүй хэрзэгыгээр хандаба. Тиихэдэнь израильшууд хабсагай хадануудта нюуса агынуудые олоод, өөһэдынгөө эдихэ эдеэ хоолой зүйлнүүдые тэдээн соо хадагалба.

³ Ушар юуб гэхэдэ, зүүн зүгтэ ажаһуудаг мидианууд болон амалээгүүд тэдэнэй ургуулһан таряаень үхэр малнуудаараа үлтиртэр гэшхүүлээд гарадаг,

⁴ Гааза хүрэтэрхи таряаланайнь газарнууд дээгүүр өөһэдынгөө майхануудые тодхон татажа, тэдэнэй эдеэ хоолынь болодог хонидой, үхэрнүүдэй болон элжэгэнүүдэй нэгыеньшье үлөөнгүй буляажа абадаг байба.

⁵ Ушар тиимэһээ тэдэнэй асарһан өөһэдынь майханууд болон үхэр малнууд таршаа шумуул мэтэ олон байгаа. Тоо томшогүй олон тэмээнүүдтэ ашаагаа тээһэн тэдэнэр Израилиин газарай хара шорой болотор ябабад.

⁶ Тиихэдэнь израильшууд мидиануудай хэрзэгы энэ аашаһаа үгырэн хооһоржо, Эзэнһээ туһа эрин, Тэрээндэ зальбарба.

⁷ Мидиануудай хэрзэгы энэ аашыень болюулыт гэжэ бүхы израильшуудай уйлалдан байжа, туһа эрин зальбархадань,

⁸ Эзэн тэдээндэ Лүндэншэеэ эльгээбэ. Лүндэншэн тэдээндэ иигэжэ хэлэбэ: – Эзэн, Израилиин Бурхан таанадта иигэжэ хэлэнэ: «Би таанадые Египедһээ, богоолшолгын гэрһээ гаргааб.

⁹ Би таанадые Египедэй дарлалтаһаа зайсуулааб. Бусад дайсадһаатнай абарааб. Таанадһаа тэдэниие үлдөөб. Таанадта тэдэнэй газарыень үгөөб.

¹⁰ „Би – Эзэн, таанадай Бурханби. Тэдэнэй газар дээрэ ажаһуухадаа, эмооршуудай бурхадта бү шүтэгты“, – гэжэ таанадта Би хэлэгшэ һэм. Теэд таанад Минии үгые дуулаагүйт!»

Эзэнэй Эльгээмэл Гидоонтой уулзаба

¹¹ Тэрэ үдэр Эзэнэй Эльгээмэл Гидоонтой уулзахаяа Опраада ерээд, сарса модон доро һууба. Тэрэ сарса модон Абиээзэрэй уг удамай Ёһаашай мэдэлэй байгаа. Ёһааш Гидооной эсэгэ байһан юм. Шэниисын орооһо сохилгоной үедэ Гидоон мидиануудһаа хоргодохын тула уһан жэмэс шахан дарадаг шахуургын хажууда байба.

¹² Эзэнэй Эльгээмэл Гидооной урдань бии болоод, тэрээндэ иигэжэ айладаба: – Хүсэтэй сэрэгшэ, Эзэн шамтай оршоно.

¹³ Гидоон тэрээндэ иигэжэ хэлэбэ: – Хүлисэгты, минии Эзэн. Хэрбэеэ бидэнтэй Эзэнэй байгаа болбол, юундэ бидэнэр ходол гай тодхорто оронобибди? «Эзэн бидэниие Египедһээ гаргаа» гэжэ бидэнэй үбгэ эсэгэнэрэй хөөрэлдэдэг Тэрэнэй эди шэдинүүдынь хаанаб? Мүнөө Эзэн бидэниие орхижо, мидиануудай гарта үгөөл!

¹⁴ Эзэн тэрэниие хараад, иигэжэ айладаба: – Ши хүсэтэйш. Ошо, мидиануудай гарһаа израильшуудые абара. Мүнөө Би шамайе эльгээнэб!

¹⁵ Гидоон Тэрээндэ иигэжэ харюусаба: – Эзэмни! Би израильшуудые яагаад абархабиб? Минии гэр бүлэ Мэнашшээгэй обог соо эгээ үгытэйнь лэ. Би өөрынгөө эсэгын гэр бүлэ соо эгээл одхониинь гээшэб.

¹⁶ Тиихэдэнь Эзэн тэрээндэ иигэжэ айладаба: – Би шамтайб! Ши нэгыньшье үлөөнгүйгөөр бүхы мидиануудые үгы хэхэш.

¹⁷ Гидоон Тэрээндэ иигэжэ хэлэбэ: – Хэрбэеэ Танда һайшаагдабални, Та, Эзэн энэ гээшэб гэжэ дүлгэеэ намда харуулыт.

¹⁸ Минии бусатар Та эндэһээ холо бү ошыт даа. Танда бэлэг асаржа, тэрэ бэлэгээ урдатнай табиха зүбшөөл намда үгэжэ хайрлыт даа. – Би эндэ һуухаб, шамайе хүлеэхэб, – гэжэ Эзэн тэрээндэ айладаба.

¹⁹ Гидоон гэртээ ошоод, эшэгэнэй мяха бүхэлеэр шанаба, нэгэ эфаа гурил эһээнгүйгөөр шаанги бариба. Тиигээд тэрэ бүхэли мяхаяа түрсүүг соо, һула шүлыень түмпэн соо хээд, сарса модоной узуурта хүлеэжэ һууһан Эзэндэ тэдэнээ асарба.

²⁰ Эзэнэй Эльгээмэл Гидоониие иигэжэ захирба: – Шанаһан бүхэли мяхаяа, эһээбэригүйгөөр болгоһон шаангияа энэ шулуун дээрэ таби, уһан шүлыень газарта адха. Гидоон Тэрэнэй зарлиг дүүргэн бэелүүлбэ.

²¹ Эзэнэй Эльгээмэлэй гартаа баригша һүлдэ тулгуурайнгаа үзүүрээр мяханда болон шаангида хүрэхэдэнь, тэрэ шулуунһаа гал гараад, Гидооной асарһан мяхые болон шаангиие тэрэ гал үрэбхиһэн юумэдэл үгы хэжэрхибэ. Эзэнэй Эльгээмэлшье тэрэ дары үгы болошобо.

²² Гидоон Эзэнэй Эльгээмэлтэй хөөрэлдэһэнөө һаял ойлгоод, иигэжэ хашхарба: «Минии Эзэн Бурхан, би үхэхэмни гээшэ гү? Би нюур нюураараа золгожо, Эзэнэй Эльгээмэлые харабаб!»

²³ Тиихэдэнь Гидоондо Эзэн иигэжэ айладаба: – Хуу һайн, бү ай! Ши үхэхэгүйш!

²⁴ Гидоон тэндэ үргэлэй шэрээ бүтээгээд, тэрэнээ «Эзэн энхэ тайбан үршөөнэ» гэжэ нэрлэбэ. Абиээзэрэй уг удамуудай ажаһуудаг Опраа хотодо үргэлэй тэрэ шэрээ мүнөө болотор байдаг юм.

Гидоон Баалай тахилай шэрээе һандаргаба

²⁵ Тэрэ һүни Эзэн Гидоондо иигэжэ айладаба: – Ши эсэгынгээ һүрэгһөө долоо наһатай тарган нэгэ буха аба. Тиигээд эсэгынгээ Баалда зорюулһан тахилайнь шэрээе һандарга, тэрэнэй хажуудахи Ашэраагай модо отолжо унагаа.

²⁶ Тиимсээрээ хабсагай дээрэ Эзэндэ, өөрынгөө Бурханда үргэлэй шэрээ барижа бүтээгээд, отологшо Ашэраагайнгаа модо түлеэн болгожо тэрээн дээрээ хээд, үшөө тэрээн дээрээ бухаяа табяад, тэрэнээ түгэс шатаалта үргэл болгон асара.

²⁷ Эзэнэй хэлэгшээр Гидоон өөрынгөө зарасануудһаа арбан нэгэн хүниие шэлэжэ абаба. Тиигээд үдэр байхадань гэртэхидни болон хотын зон хаража болохо гэжэ айгаад, эдэ бүхы хэрэгүүдээ үдэшэлэн бүтээбэ.

²⁸ Үглөөгүүр хотын зон һэреэд, Баалда тахидаг шэрээе һандаргаһан, тэрэнэй хажуудахи модоной отологдоһон байхые, мүн шэнээр баригдаһан үргэлэй шэрээе болон дууһан шатааһан бухын үлэгдэлнүүдые хараба.

²⁹ Тэдэнэр бэе бэеһээн иигэжэ һурабад: «Хэн эдэ бүгэдые хээ гээшэб?» Хэн бэ даа тэдээндэ иигэжэ харюусаба: «Ёһаашай хүбүүн Гидоон эдэ бүгэдые хээ юм».

³⁰ Энэ хойтын зон Ёһаашда ерээд, тэрээндэ иигэжэ хэлэбэ: – Ши өөрынгөө хүбүүе гэрһээ гарга. Баалай үргэлэй шэрээень һандаргаһанай, хажуудахи модыень отолһоной түлөө шинии хүбүүн үхэхэ ёһотой.

³¹ Хүнүүдэй хүреэлгэн соо ороһон Ёһааш тэдээндэ иигэжэ хэлэбэ: – Таанад Баалые үмөөрнэ гүт? Баалые хамгаалха гэнэ гүт? Тэрэниие үмөөрэгшэ үглөө үглөөгүүр болотор үхэлдэ үгтэхэ. Хэрбэеэ Баал үнэхөөр бурхан байбал тэрэ өөрөө өөрынгөө түлөө тахилайнгаа шэрээе һандаргагшадтай тэмсэг.

³² Ёһааш саашань үгэлэн иигэжэ нэмэбэ: – Хэрбэеэ тахилайнь шэрээе Гидооной һандаргаа һаа, Баал өөрөө тэрээнтэй тэмсэг! Тэрэ үдэрһөө хойшо Гидоониие Еруббаал гэжэ нэрлэбэ.

Гидоон мидиануудые бута сохибо

³³ Израильшуудтай тэмсэхэ гэжэ зүүн зүгтэ ажаһуудаг мидиан, амалээг болон бусад арадууд бултадаа нэгэдэбэ. Тэдэнэр Иордан мүрэн гаталаад, майхан хүреэнүүдээ Езрээлэй хүнхэртэ татаба.

³⁴ Эзэнэй Һүлдэ Гидооной досоо орожо, тэрээндэ эрэлхэг зориг, хүсэ шадал үгэбэ. Абиээзэрэй уг удамуудые дуудан ерүүлжэ, тэдэниие толгойлон дахуулха гэжэ Гидоон үхэр бүреэгээ үлеэбэ.

³⁵ Дайн байлдаанда зэр зэбсэгээ абаад ерэгты гэһэн захяатайгаар тэрэ элшэдээ Мэнашшээгэй, Ашээрэй, Зэбүлүүнэй болон Напталиигай обогуудта эльгээбэ. Тэдэнэр тэрэ дары Гидоондо, тэрэнэй сэрэгтэ ерэбэ.

³⁶ Гидоон Эзэндэ иигэжэ хэлэбэ: – Израильшуудые аршалан хамгаалхадаш туһалхаб гэжэ Та намда айладаа һэнта. Гэршэлгэеэ намда харуулжа хайрлыт!

³⁷ Би таряа сомодог газарта хониной арһа дэбдихэб. Хэрбэеэ гансал нооһон дээрэнь шүүдэрэй унаад, оршон тойронхи газарайнь хуурай байбалнь, минии гараар израильшууд абарагдаха гэжэ Танай хэлэгшын үнэн байһыень би мэдэхэб.

³⁸ Үглөө үглөөгүүрынь Эзэнэй хэлэгшээр болобо. Гидоон эртэ үглөөгүүр бодоод, арһанайнгаа нооһыень бажуужа, шүүдэрэй уһаар улхангаа дүүргэбэ.

³⁹ Тиигээд Гидоон Эзэндэ иигэжэ хэлэбэ: – Намда Та бү сухалдаарайт. Нэгэ юумэн тухай Танһаа асууха зүбшөөл намда хайрлыт. Хониной арһаар туршалгаяа үшөө дахин намда харуулыт. Мүнөө хониной арһан хуурай, харин бүхы газар шүүдэрөөр бүрхөөгдэг лэ!

⁴⁰ Эзэн тэрэнэй гуйлтые тэрэ һүни бэелүүлжэ, хониной арһые хуурай үлөөгөөд, бүхы газар шүүдэрээр бүрхөөбэ.