Ударидагшад 5 - Библи

Дэбоораагай дуун

¹ Сисэраае һамна бута сохиһон тэрэ үдэр Дэбоораа, Абиноһаамай хүбүүн Бараак хоёр иимэ үгэнүүдтэй дуу дуулаба:

² – Ударидагшадай Израилиин сэрэгые бодхооходонь, улад зоноо байлдаанда добтолон оруулхадань, Эзэнээ магтагты!

³ Хаашуул, шагнагты! Хайхарагты, амбан һайд! Би Эзэндэ дууланаб. Би Израилиин Бурханда магтаал дуугаа үргэнэб!

⁴ Эзэн минии, Танай Сэһиирһээ гарахада, Эдоомой тала гаталхада, Газар доһолоол, огторгой бүрхэжэ, олигой ехэ уһан үүлэнһээ адхараал.

⁵ Эзэнэй, Синай хадын Бурханай урда Эзэнэй, Израилиин Бурханай урда хаданууд дорьбон хүдэлөөл.

⁶ Анаадай хүбүүн Шамгаарай засагаа барихада, тэрэ үе сагта Яһээлэй ажаһуухада, аяншад болон наймаашадай тойруу харгыгаар ябахада, урданайнь сэхэ харгынууд унаагай жэнгүйһөө хооһоршоол!

⁷ Тэндэ Дэбоораа, шинии ерэхэгүйдэш, тэдэнэй эхэнь үшөө болохогүйдэш, Израилиин тосхон һууринуудта эрэлхэг ударишагшад үгы болошоол.

⁸ Хуурмаг бурхадта шүтэхэдэнь, хотын үүдэндэ дайн эхилээл. Халхабша болон жадатай хүн Израилиин дүшэ мянган сэрэгшэд соо олдоогүйл.

⁹ Элдэ жадаяа баряад дайнда ошодог Израилиин сэрэгшэд, Минии зүрхэн таанадтайл. Эзэнээ магтагты!

¹⁰ Сагаан элжэгэнүүдые унагшад, хибэс дээрэ һуугшад, харгыгаар ябагшад, магтаал дуугаа дуулагты!

¹¹ Хонид болон малнуудай суглардаг худагуудай хажууда хүжэм дуута цимбалай абяан соностоол. Эзэнэй баатаршалга тухай, Израилиин ударидагшадай баатаршалга тухай, хотын үүдэндэхи байлдаанай илалта тухай хүнүүд магтаал дуугаа дууланал!

¹² Һэрииш Дэбоораа, һэрииш даа, һайхан дуугаа дуулыш! Бараак, Абиноһаамай хүбүүн, баряанда абагшадаа туугыш!

¹³ Таанад, амиды үлэгшэд, ударидагшадтаа ошогты. Таанад, Эзэнэй арад, Намда хүсэ асарагты.

¹⁴ Амалээгэй орондо нютагжаһан Эпрааимуудай сэрэгшэд ерээл! Шинии хойноһоо Бэньямиинэй сэрэгшэд ошолсоол! Махиирай үенүүдһээ сэрэгэй дарганар ошоол! Зэбүлүүнэй үенүүдһээ гараһан сэрэгшэд зузууртай һорьбоор хадхахадаа бэрхэл!

¹⁵ Иссахаарай тайжанууд Дэбоораатай хамтал! Бараакта үнэн сэхэ Иссахаарай арад тэдэнэй хойноһоо гол тээшэ ябгалаа. Рэүбээнэй эсэгын зон гүнзэгы бодолдо абтанхай!

¹⁶ Түүдэгэй дундуур һуужа, хонишоной жэмбүүр юугээ соносоо хүмши? Рэүбээнэй эсэгын зон гүнзэгы бодолдо абтанхай!

¹⁷ Галаадай арад Иорданай саана амгалан ажаһууна. Даанай арад онгосонууд дээрэ юундэ зөөгөө юм? Далайн эрье дээрэ, мүн далбагата онгосонуудай ерэдэг газарта Ашээрэй эсэгын зон ажаһууна.

¹⁸ Харин Напталиигай, Зэбүлүүнэй арадууд хайран ами наһаяа гамнангүй, хадалиг газарай түлөө тулалдана.

¹⁹ Хаашуул тулалдаанда ерээл. Ханаһаанай хаашуул Мэгиддооной уһан шадархи Таанаахта тэмсээл. Харин тэдэнэртэ мүнгэн олзо хүртөө үгыл.

²⁰ Тэнгэриһээ одо мүшэд туһалаа. Тэндэһээ өөрынгөө замаар Сисэраатай тулалдаа.

²¹ Урданай гол, Кишоон гол урадхалаараа дайсадые хаанаш! Уур сухални дайсадай хүсые бууруулыш!

²² Тэргэтэй моридойнь гүйлдэхэдэ, туруунуудайнь түбэрөөн дуулдана.

²³ Эзэнэй Эльгээмэл иигэжэ зарлиглана: «Мэрооздо муу хараалым хүргэгты! Тэндэхи зониие муугаар хараагты! Тэдэнэр Эзэндэ туһалхаа бү ерэг! Тэрээндэ сэрэгшэд туһалхаа бү ерэг!»

²⁴ Майхан соо ажаһуудаг эхэнэрнүүдэй дундаһаа хээн үндэһэ яһанай Хээбэрэй һамган Яһээл үреэлдэмни хүртэг!

²⁵ Сисэраагай уһа эрихэдэнь, Яһээл тэрээндэ һү аягалаа. Сисэраагай аяга соонь сүсэгы хэжэ, тэрээндэ үгөө!

²⁶ Газаа гарамсаараа тэрэ эхэнэр гадаһыень майханһаа һугалаад, баруун гартаа хүдэлмэришэдэй алха баряал! Тэрэнэй сабиргайда гадаһа тулгаад, тэрэнээ толгой соогуурнь ходор шаагаал.

²⁷ Тэрэ Яһээлэй хүл доро һунаа. Тиигэжэ тэрэ тэмсэлдэ унаа. Тэрэнэй хүл доронь һунаһан шэгтээ тэндэ Сисэраа үхөөд хэбтээ.

²⁸ Сонхоороо Сисэраагай эжы шагаагаад, сорхирсо уйлан, иигэжэ асуугаа: «Юундэ хүбүүнэйм тэргэнүүд удаашарнаб? Юундэ моридойнь түбэрөөн дуулданагүйб?»

²⁹ Тэрээндэ һахюулайнь сэсэн эхэнэрнүүд харюусабад. Тэрэ өөрөө өөртөө иигэжэ хэлэбэ:

³⁰ «Хүхилдэнэ тэдэнэр мүнөө магадгүй. Хоорондоо тэдэнэр олзоёо хубаанад. Хоёр, нэгэ басагадые сэрэгшэд өөртөө абанад. Бүдэй хоёр талаһаа оёһон хубсаһа байлдаанда илагша үмдэнэл. Элдэб үнгэтэй хубсаһануудые Эсэтэрээ Сисэраа олзо сооһоо бэдэрнэл».

³¹ Эзэн Минии, элшэ хүсөөрөө наранай мандаһан мэтээр, Танай дайсад булта хосорог! Танда дуратайшуул хүсэ орог! Энэ газар дээрэ дүшэн жэл соо энхэ тайбан байба.