Ударидагшад 4 - Библи

Дэбоораа – эхэнэр ударидагша

¹ Эһуудай наһа бараһанай һүүлдэ израильшууд дахин Эзэнэй урда муу муухай үйлэ хэрэгүүдые хэжэ эхилбэ.

² Тиихэдэнь Эзэн израильшуудые засаглан бариха хүсэ шадал Ханаһаанай хаан Ябиинда үршөөбэ. Ябиин тэрэ үе сагта Хацоор хотодо засаг барижа байгаа. Хароошэт-Хагойиимдэ ажаһуудаг Сисэраа болбол тэрэ хаанай сэрэгэй ноён байһан юм.

³ Юһэн зуун түмэр тэргэтэй Сисэраа израильшуудые хорин жэл соо дошхон хэрзэгыгээр дарлаба.

⁴ Израильда ударидагшадай ажаһууһан тэрэ үе сагта Лаппидоотын һамган Дэбоораа Бурханай мэдээ асарагша эхэнэр байба.

⁵ Тэрэ Эпрааимай хадалиг газар дээрэхи Рамаа ба Бэт-Ээл хотонуудай хоорондохи Дэбоораагай Далдуу модотын адагта ажаһуудаг байгаа. Нэгэтэ Израилиин уг удамай хүбүүд тэрэ эхэнэртэ ерэжэ, Сисэраае яаха хээхэ тухай һураба.

⁶ Дэбоораа Напталиигай уг удамай ажаһуудаг Кээдэш хотоһоо Абиноһаамай хүбүүн Бараакые дуудажа ерүүлээд, тэрээндэ иигэжэ хэлэбэ: – Эзэн, Израилиин Бурхан шамда иигэжэ зарлиглана: Напталиигай болон Зэбүлүүнэй уг удамуудта ошожо, арба мянган сэрэгшэдыень суглуулаад, тэдэниие дахуулжа, Табоор хада дээрэ гара.

⁷ Би Ябиинай сэрэгүүдэйнь жанжан Сисэраае, тэрэнэй бүхы тэргэнүүдые, тэрэнэй үй түмэн сэрэгшэдые Кишоон мүрэнэй гол газарта дахуулжа асараад, шинии гарта тушаахаб. Тэндэ илалта туйлахадатнай, таанадта Би туһалхаб.

⁸ Бараак тэрэ эхэнэртэ иигэжэ хэлэбэ: – Хэрбэеэ намтай шинии ошолдоо һаа, би дайлалдахаяа ошохоб. Хэрбэеэ ошолдоогүй һаашни, би дайлалдахаяа ошохогүйб.

⁹ Дэбоораа тэрээндэ иигэжэ хэлэбэ: – Би шамтай ошолдохоб. Теэд байлдаанай энэ аян зам шамайе алдаршуулхагүй. Гэбэшье Эзэн Сисэраае эхэнэрэй гарта үгэнэ. Дэбоораа Бараактай суг хамта Кээдэш хото ошобо.

¹⁰ Тэндэ Бараак Напталиигай болон Зэбүлүүнэй уг удамуудһаа арба мянган сэрэгшэдые суглуулаад, тэдэнээ хойноо дахуулжа, дайлалдахаяа ошобо. Дэбоораа тэдэнтэй суг хамта ябалсаба.

¹¹ Тэрэ үе сагта өөрынгөө хээн уг удамуудһаа таһарһан Хээбэр гэжэ нэрэтэй хүн тэндэ ажаһууба. Хээн үндэһэ яһанай Хобаабай үри һадаһануудай нэгэн Моисейн хадам эсэгэ болохо юм. Кээдэшһээ холо бэшэ Цаананниимэй сарса модонуудай хажууда Хээбэр өөрынгөө майхан хүреэнүүдые татаба.

¹² Абиноһаамай хүбүүн Бараак Табоор хада дээрэ гараа гэжэ Сисэраада дуулдаба.

¹³ Тиихэдэнь Сисэраа өөрынгөө юһэн зуун тэргэнүүдээ болон бүхы сэрэгүүдээ суглуулаад, Хароошэт-Хагойиим хотоһоо гаража, Кишоон мүрэндэ ошобо.

¹⁴ Дэбоораа Бараакта иигэжэ хэлэбэ: – Урагшаа! Мүнөөдэр Сисэраагай сэрэгүүдые һамна бута сохиходошни, Эзэн шамда туһалха. Харгы замыешни сүлөөлжэ, шинии урда Эзэн ябаха. Бараак арбан мянган сэрэгшэдээ дахуулжа, Табоор хада руу бууба.

¹⁵ Дайшалхы тэмсэлэй үедэ Эзэн Сисэраае, тэрэнэй бүхы тэргэнүүдые болон тэрэнэй бүхы сэрэгые бахардалганда оруулба. Тиихэдэнь тэдэнэр юу хэхэеэ мэдэхэеэ болишоод, хүл хөөрсэг табилдаба. Сисэраа өөрынгөө тэргэһээ һүрэжэ буугаад, ябагаар тэрьелбэ.

¹⁶ Бараак болон тэрэнэй сэрэгшэд Сисэраагай тэргэнүүдые болон сэрэгшэдые Хароошэт-Хагойиим хото хүрэтэр намнан мүрдэжэ, һэлмэнүүдээрээ сабшан, нэгэшье хүнииень амиды үлөөбэгүй.

¹⁷ Сисэраа Хээбэрэй һамган Яһээлэй байдаг майхан тээшэ гүйжэ ерэбэ. Хээн үндэһэ яһанай Хээбэр Хацоорой хаан Ябиинтай эбтэй эетэй ажаһуудаг байгаа.

¹⁸ Яһээл дүтэлжэ ябаһан Сисэраае харамсаараа, тэрэниие угтахаяа майханһаа гараад: – Хүндэтэ минии эзэн, майхандамни орыт! Орогты бү айгты! – гэжэ уриба. Сисэраа тэрэнэй майханда оробо. Яһээл хибэсээрээ тэрэниие хушаба.

¹⁹ Сисэраа хибэсээ сэлеэд, Яһээлдэ иигэжэ хэлэбэ: – Би ундаа хүрөөб. Намда ууха уһа үгыш. Яһээл һү хэнхэй арһан хүхүүрэйнгөө амһарые нээжэ, тэрэнэй ундыень харяагаад, тэрэниие хибэсээр дахин хушаба.

²⁰ Сисэраа хибэс дороһоо Яһээлдэ иигэжэ хэлэбэ: – Ошоод, майханайнгаа үүдэндэ зогсо. Хэрбэеэ хэн нэгэнэй ерээд, «Эндэ хүн бии гү?» гэжэ шамһаа һураа һаань, «Хэншье үгы» гэжэ харюусаарай.

²¹ Сисэраа ехээр эсэһэн тула тэрэ дары унташаба. Теэд Хээбэрэй Яһээл һамган газарһаа һугалжа майханайнгаа гадаһыень абаба. Тиигээд тэрэ эхэнэр нүгөөдэ гартаа алха барижа, маряаһаар Сисэраада ерээд, гадаһанайнгаа үзүүрыень тэрэнэй сабиргайда тулган шэглүүлэмсээрээ, узуурыень алхаар сохибо. Тэрэ гадаһан Сисэраагай сабиргай соогуур һэтэ гараад, газар руу шаагдашаба. Сисэраа үхэбэ.

²² Эгээл энэ үедэ Сисэраае мүрдэн бэдэржэ байһан Балаак Яһээлэй майханда хүрэжэ ерэбэ. Яһээл тэрэниие угтажа урдаһаань ошоод, тэрээндэ иигэжэ хэлэбэ: – Майхан соом орыш даа, мүрдэн бэдэржэ ябаһан хүнииешни би шамда харуулхаб. Майхан соо ороходоо, Бараак сабиргай руугаа гадаһа шаалгуулжа үхэһэн Сисэраагай хүүр бэеын газарта хэбтэхыень хараба.

²³ Тиигэжэ тэрэ үдэр Эзэн израильшуудай урда Ханаһаанай хаан Ябиинай хан түрые номгоруулба.

²⁴ Ханаһаанай хаан Ябиинай сэрэгые Тэрэнэй дууһан хюдатар, израильшуудай сэрэг үдэр бүхэндэ хүсэтэй ба улам олон боложо байба.