Ударидагшад 21 - Библи

Бэньямиинэй хүбүүдэй һамгад

¹ Израильшууд Мицпаада иигэжэ тангариглабад: «Бидэнэй хэншье басагадаа Бэньямиин обогой хүбүүдтэ хадамда үгэхэгүй».

² Израильшууд Бэт-Ээл хотодо ерээд, Бурханай гэртэ үдэшэ болотор һуухадаа, шангаар уйлалдабад.

³ Тиигээд тэдэнэр иигэжэ Эзэндэ хэлэбэд: – Эзэн, Израилиин Бурхан! Израильда энэ үйлэ хэрэг юундэ болобо гээшэб? Мүнөө обогуудай нэгэн Израильда үгы болобол!

⁴ Үглөө үглөөгүүрынь израильшууд тэндэ үргэлэй шэрээ бодхоогоод, түгэс шатаалта болон амгалан байдалай түлөө үргэлнүүдые үргэбэд. Тиихэдээ израильшууд бэе бэеһээ иигэжэ асуубад: – Израилиин бүхы обогуудһаа хэн Эзэнэй гэртэ суглаанда ерэбэгүйб?

⁵ Иигэжэ тэдэнэр асуугаад, Эзэнэй гэртэхи сугларалганда, мүн Мицпаа хотодо ерээгүй хүнүүд алуурта хүртэхэ гэжэ хатуу тангариг үгэбэд.

⁶ Израильшууд аха дүү болохо Бэньямиин обогой хүнүүдые хайрлаад, иигэжэ хэлэбэд: «Мүнөөдэр Израилиин обогуудай нэгэн үгы хэгдэбэ.

⁷ Өөһэдынгөө басагадые Бэньямиин обогой хүбүүдтэ хадамда үгэхэгүй гэжэ Эзэнэй гэртэ тангариглаһан аад, бидэнэр амиды үлэгшэ хүбүүдтэнь һамга абаха басагадые хаанаһаа олохобибди?»

⁸ Һүүлдэнь израильшууд бэе бэеһээ иигэжэ асуубад: «Израилиин бүхы обогуудһаа хэн Мицпаа хото Эзэнэй гэртэ ерээгүйб?» Галаадай Ябээшдэ ажаһуугшадһаа хэншье Эзэнэй гэртэ сугларалганда ерэбэгүй.

⁹ Бүхы сэрэгүүд эндэ сугларба. Теэд Галаадай Ябээшһээ хэншье тэдэнэй энэ сэрэгтэ орохоёо ерэбэгүй.

¹⁰ Тиихэдэнь израильшуудай бүлгэм арбан хоёр мянган шамбай шиираг сэрэгшэдые тэрэ хотодо добтолон оролгондо эльгээхэдээ, тэдээндэ иигэжэ хэлэбэ: – Таанад Галаадай Ябээш хото ошожо, һэлмээрээ тэндэхи эхэнэрнүүдые үхи хүүгэдтэйнь хамта алагты!

¹¹ Тэдэнэй бүхы эрэшүүлые, эрэшүүлтэй унтаһан тэдэнэй бүхы эхэнэрнүүдые хараалай муу хараалдаа болон үхэлдэ үгэгты! Энэ хадаа таанадта үгэһэн нангин захиралта мүн!

¹² Тэдэнэр Галаадай Ябээш хотынхидой дундаһаа хурисал үзөөгүй дүрбэн зуун үхидые олоод, тэдэниие ханаһаанай газар дээрэхи Шилоодо байрлаһан израильшуудай хотон хүреэндэ асарбад.

¹³ Һүүлдэнь Израилиин бүлгэм эбтэй оролгые соносхохыень элшэдээ Риммоон байса хабсагайда хоргодоод байһан Бэньямиинэй угай сэрэгшэдтэ эльгээбэ.

¹⁴ Бэньямиинэй угай сэрэгшэд гэртээ бусабад. Израильшууд Галаадай Ябээш хотоһоо асарһан үнөөхи хурисал үзөөгүй үхидөө һамга хэхыень тэдээндэ үгэбэд. Теэд тэдээндэ үхид хүртэбэгүй.

¹⁵ Эзэн Израилиин бүхы обогуудай нэгэ эсэгын зониие үгы болгуулаа. Тиихэдэнь израильшууд Бэньямиин обогой алуулһан зониие шаналбад.

¹⁶ Израилиин бүлгэмэй аха захатад иигэжэ һанаа үнөөндэ абташабад: «Бэньямиин обогой бүхы эхэнэрнүүд алуулаа. Бидэнэр амиды үлэһэн эдэ эрэшүүлдэнь һамгадые хаанаһаа оложо үгэхэмнай гээшэб?»

¹⁷ Тэдэнэр иигэжэ хэлэбэд: «Бэньямиин обогой хосоржо үгы болгохогүйн тула угай хубита хубаариин газарыень амиды үлэһэн эдэ эрэшүүлдэ үлөөебди.

¹⁸ Теэд бидэнэр өөһэдынгөө үхидые эдэнэртэ хадамда үгэхэ аргагүйбди». Ушар юуб гэхэдэ, Бэньямиинэй угай хүбүүдтэ үхидээ хадамда үгэбэл, хараалай муу хараалда хүртэг гэжэ тэдэнэр тангариглаһан байбад.

¹⁹ Жэл бүхэндэ Эзэнэй һайндэр Шилоодо (энэ хото Бэт-Ээлһээ хойшоо Шэхээм ошодог харгын зүүн талада, Лэбонааһаа урагшаа байдаг) болодог гэжэ тэдэнэр гэнтэ һанаадхибад.

²⁰ Израилиин аха захатан Бэньямиинэй угай тэдэ хүбүүдтэ иигэжэ хэлэбэд: – Тэндэ ошогты! Уһан үзэмүүдэй эшэнүүд соо хоргодогты!

²¹ Шилоо хотын үхидэй хатархаяа дүхэригтэ гарахадань, уһан үзэмүүдэй эшэнүүд сооһоо гарагты. Һамга хэхэ басагаяа Шилоо хотын үхидэй дундаһаа баряад, Бэньямиин обогой ажаһуужа байһан орон нютаг абаашагты.

²² Тэдэ үхидэй эсэгэнэр болон аха дүүнэр гомдол барихаяа бидэндэ ерэхэдэнь, бидэнэр тэдээндэ иигэжэ хэлэхэбди: «Бэньямиин эсэгын зоной хүбүүдые хүлисэгты. Таанадай үхидые хулгайгаар һамга абахадань, тэдэниие хүлисэгты. Тэдэнэр тулалдаанай үедэ бэшэ, харин амгалан тайбан байхадань, һамга хэхэеэ таанадай үхидые абаашаба ха юм. Таанад Бэньямиинэй угай хүбүүдтэ үхидөө үгэхэгүйбди гэжэ хэлэһэн тангариг үгэдөө хүрэбэ гээшэт».

²³ Бэньямиинэй угай тэдэ хүбүүд Израилиин аха захатанай хэлэгшээр, дүхэригтэ хатархаяа гараһан басагадые хулуужа абаад, өөһэдынгөө хубаариин газарнуудта ошоод, һандарһан хотонуудаа һэргээжэ, шэнэ тосхон һууринуудые бодхоогоод, тэндээ ажаһуужа эхилээ һэн.

²⁴ Тиихэдэ израильшууд тэндэһээ өөһэдынгөө обогто, үенүүдтэ болон гэр гэртээ мүн лэ тараа бэлэй.

²⁵ Тэрэ үе сагта Израильда хаан байгаагүй. Тиимэһээ хүн бүхэн һанаһанаа бүтээжэ, һарбайһанаа абажа байһан юм.