Ударидагшад 2 - Библи

Эзэнэй Эльгээмэл Бохиимдо ерэнэ

¹ Эзэнэй Эльгээмэл Гилгаалһаа Бохиимдо ерээд, Эзэнэй хэлэһэн зарлигыень израильшуудта иигэжэ дамжуулба: «Би таанадые Египедһээ гаргааб, таанадай үбгэ эсэгэнэртэ тангариглан найдуулагша газартаа таанадые асарааб. Таанадтай баталһан хэлсээгээ хэзээдэшье эбдэхэгүйб гэжэ Би хэлээ һэм.

² Орондонь таанад тэрэ газар дээрэ ажаһуудаг хүнүүдтэй хэзээдэшье хэлсээ бү баталагты, тэдэнэй үргэлэй шэрээнүүдые һандаргагты. Гэбэшье таанад Минии үгэ дууланагүйт! Таанад юу хээ гээшэбта?

³ Мүнөө Би эндэхи уул хүнүүдые таанадһаа холодхон үлдэхэгүйб. Тэдэнэр таанадта урьха, тэдэнэй бурхад таанадта гүльмэ боложо үгэхэ гэжэ мүнөө Би таанадта хэлэнэб!»

⁴ Эзэнэй Эльгээмэлэй эдэ үгэнүүдые дамжуулхадань, тэндэ байһан израильшууд оог хуугай табилдан бархиралдаба.

⁵ Тиигээд израильшууд бархиралдагша газараа Бохиим гэжэ нэрлээд, тэрэ газартаа Эзэндэ үргэл үргэбэд.

Үгэ дуулалга ба диилдэлгэ

⁶ Арад зоноо Иисүүсэй табихадань, израильшууд үбгэ эсэгэнэртэнь үгтэһэн өөһэдынгөө хубаарин газарнуудта ошобо.

⁷ Иисүүсэй амиды һэрүүн ябахада, мүн тэрэнэй наһанһаа нүгшэһэн хойно Эзэнэй Израильда бүтээһэн агууехэ хэрэгүүдыень хараһан ахамадуудай амиды һэрүүн ябахада, Израиль бүхы үдэрнүүдтэ Эзэндэ һүгэдэн, Тэрээндэ алба хээ.

⁸ Нүүнэй хүбүүн, Эзэнэй үнэн сэхэ зараса Иисүүс зуун арбатайдаа наһа бараба.

⁹ Израильшууд тэрэниие Тимнаат-Хээрэс гэжэ газарай Гааһаш хадаһаа хойшоо Эпрааимай хадануудай нэгэн дээрэ хүдөөлүүлбэ.

¹⁰ Тэрэнэй наһа бараһанай һүүлдэ энэ обогһоо шэнэ үенүүд гараба. Тэдэнэр Израильда хэһэн Эзэнэй агууехэ хэрэгүүдыень мэдэхэгүй байбад.

¹¹ Тиихэдэ тэдэнэр Эзэндэ муу муухай ябадал хэжэ, хуурмаг бурхан Баалда шүтэн мүргэдэг болобо.

¹² Тэдэнэр угайнгаа үбгэ эсэгэнэрэй шүтэн мүргэдэг байһан, мүн бүхы израильшуудые Египедэй газарһаа гаргаһан Эзэниие орхижо, оршон тойрон ажаһуудаг арадуудай хуурмаг бурхадта шүтэн мүргэдэг болобо. Тиихэдэнь Эзэн тэдээндэ сухалдашаба.

¹³ Израильшууд Эзэнээ орхижо, Баалда болон Аштаартуудта шүтэн мүргэжэ эхилбэ.

¹⁴ Эзэн израильшуудта сухалдаад, тэдээндэ добтологты, тэдэнэй эд зөөрииень тоногты гэжэ оршон тойрон ажаһуудаг арадуудта зарлиглаба.

¹⁵ Эзэн израильшуудһаа холодобо. Тиихэдэнь израильшууд хаанашье дайлалдахадаа, ходол дайсадта диилдэдэг болобо. Хэрбэеэ оршон тойрон ажаһуудаг арадуудай хуурмаг бурхадта шүтэн мүргөө һаа, таанад ходол диилдэхэт гэжэ Эзэн уридшалан израильшуудта айладаа, тангариглаа һэн. Израильшууд олиггүй ехээр тулин зобобо.

¹⁶ Тиихэдэнь Эзэн тэдэнэй дундаһаа ударидагшадые һунган шэлэжэ, тэдэнээ ударидагшад гэжэ нэрлэбэ. Тэдэ ударидагшад тонон дээрмэдэдэг дайсадһаа израильшуудые аршалан хамгаалдаг болобо.

¹⁷ Гэбэшье арад зон ударидагшадайнгаа үгыень дуулабагүй. Израильшууд үбгэ эсэгэнэрэйнгээ шүтэжэ ябаһан Эзэнһээ урбажа, эндэхи бусад ондоо арадуудай хуурмаг бурхадта шүтэдэг, мүн мүргэдэг болобо.

¹⁸ Дайсад оло дахин израильшуудта добтолбо. Тиихэдэнь тэдэнэр өөрынгөө Бурханһаа туһа эрижэ мүргэбэд. Эзэн тэдэниие хайрлаад, дайсадһаа өөрынгөө арад зониие аршалан хамгаалхынь тула тэдээндэ ударидагшадые эльгээдэг болобо. Ударидагшадай амиды мэндэ ажаһуухада, Эзэн Өөрөө тэдэнэй ударидагшадай ахалагша боложо, дайсадһаа израильшуудые ходол аршалан абардаг байба. Гэбэшье дарлалта болон харшалалтада орожо, зобохо тулихадаа, тэдэнэй гэмэрэлдээ болон бархиралдаае дуулаад, Эзэн тэдэниие хайрлажа эхилбэ.

¹⁹ Теэд ударидагшын үхэхэдэ, тэдэнэр өөһэдынгөө үбгэ эсэгэнэрһээ бүри ехээр нүгэл хэжэ, хуурмаг бурхадта шүтэдэг ба үргэл мүргэл хэдэг болошобо. Тиигэжэ тэдэ израильшууд үсэрэлдэжэ, сэхэ сэбэр замһаа гараад, нүгэлтэ зам руу зорибод.

²⁰ Эзэн израильшуудта сухалдаад, иигэжэ айладаба: – Эдэнэрэй үбгэ эсэгэнэртэй Би хэлсээ баталаа һэм. Эдэнэр Минии үгые дуулабагүй. Эдэнэр Намтай баталһан үбгэ эсэгэнэрэйнгээ хэлсээе эбдэбэ.

²¹ Тиимэһээ Би Нүүнэй хүбүүн Иисүүсэй орхиһон энэ арадай дундаһаа эндэхи уул хүнүүдые эндэһээ үлдэжэ гаргабагүйб. Үхэхэдөө, Иисүүс эдэ арадуудые эндэ орхёо юм. Би эдээндэ энэ газар дээрэ үлэхэ зүбшөөл үгэнэб.

²² Израильшуудые туршахын тула Би эдэниие хэрэглэхэмни. Эдэ израильшууд үбгэ эсэгэнэр мэтээр Эзэнэй заагша замаар ошохо үгыень Би туршан хаража үзэхэб.

²³ Иигэжэ Эзэн тэдээндэ энэ газар дээрэ үлэхэ зүбшөөл үршөөгөөд, эндэ үлэһэн уул хүнүүдые Иисүүсэй гарта тушаабагүй.