Ударидагшад 19 - Библи

Левит ба тэрэнэй баряанай эхэнэр

¹ Тэрэ үе сагта Израильда хаан үгы байгаа. Эпрааимай зоной ажаһуудаг орон нютагта нэгэ левит хүн ажаһууба. Тэрэ хүн Иудын Бэтлэһээм хотоһоо баряанай эхэнэрые гэртээ асаржа, тэрээнтэй хамтарба.

² Тэрэ залуу һамганиинь үбгэнтэеэ хэрэлдэжэ эрхээд, гэрһээ арилжа, Иудын Бэтлэһээмдэ байдаг эсэгынгээ гэртэ ошоод, дүрбэн һара болобо.

³ Левит хүн зарасаяа болон хоёр элжэгэ абаад, үнөөхи эхэнэрээ аргадажа, өөрынгөө гэртэ асархын тула тэрэ хото ерэбэ. Тэрэ эхэнэр үбгэеэ эсэгынгээ гэртэ оруулба.

⁴ Залуу эхэнэрэй эсэгэ хүрьгэнөө хаража баяртайгаар угтаад, гэртэнь хонохые тэрээндэ дурадхаба. Левит хүбүүн хадам эсэгындээ гурбан хоногто эдеэлбэ, ууба, унтаба.

⁵ Левит хүбүүн дүрбэдэхи үдэрэй эртэ үглөөгүүр бодоод, гэртээ харихаяа түхеэршэбэ. Тиихэдэнь хадам эсэгэнь тэрээндэ иигэжэ дурадхаба: – Эдеэлжэ хүсэ шадал ороод, гэртээ харииш даа.

⁶ Левит хүбүүн аян замда гарахаяа болижо, хадам эсэгэтэеэ хамта эдеэлбэ, ууба. Хадам эсэгэнь тэрээндэ иигэжэ дурадхаба: – Үшөө нэгэ һүни хоножо амара, сэнгэ.

⁷ Теэд левит хүбүүн ябаха тээшээ түхеэршэбэ. Тиихэдэнь хадам эсэгэнь тэрэниие аргадажа, гэртээ хонуулха болгобо.

⁸ Левит хүбүүн табадахи үдэрэй эртэ үглөөгүүр бодоод, ябахаяа түхеэршэбэ. Тиихэдэнь залуу эхэнэрэй эсэгэ хүрьгэндөө иигэжэ хэлэбэ: – Эдеэлжэ хүсэ шадал оро, үдэ болотор амара. Тэдэ хоёр хамта һуугаад, эдеэлбэд, уубад.

⁹ Залуу хүбүүн бодожо, баряанайнгаа эхэнэртэй болон зарасатаяа хамта ябахаяа түхеэршэбэ. Тиихэдэнь залуу эхэнэрэй эсэгэ хүрьгэндөө иигэжэ хэлэбэ: – Үдэр үнгэржэ, үдэшын боро хараан буужа дүтэлөө. Эдеэлжэ, сэнгэжэ эндээ хоныш даа. Үглөөдэр эртэхэн бодоод, гэртээ бусахаяа аян замда гараарайш.

¹⁰ Теэд левит үшөө дахин хонохоһоо арсажа, һууриһаа бодоод, өөрынгөө элжэгэнүүдые болон баряанай эхэнэрые абаад, Евүүс (мүнөө Иерусалим) хото тээшэ ошобо.

¹¹ Тэдэнэй Евүүс хотодо дүтэлхэдэнь, наран хадын саана орохо дүтэлөөд байба. Тиихэдэнь зараса өөрынгөө эзэндэ иигэжэ дурадхаба: – Евүүсүүдэй энэ хотодо орожо хоноёбди.

¹² – Үгы. Бидэнэр израильшуудай бэшэ, ондоо арадай ажаһуудаг хотодо оронгүй, Гибаа хүрэтэр ошоёбди, – гэжэ левит хүбүүн харюусаад, зарасадаа иигэжэ дурадхаба:

¹³ – Гибаа гү, али Рамаа хүрэебди, тэдэнэй али нэгэндэнь хонуужабди.

¹⁴ Тэдэнэр саашалбад. Бэньямиинэй угайхидай ажаһуудаг Гибаада тэдэнэй дүтэлхэдэнь, наран хадын саана оробо.

¹⁵ Тиихэдэнь тэдэнэр Гибаа ошоһон харгыгаар хото руу хонохоёо ошобод. Тиигээд тэрэ хотын талмай дээрэ ерэжэ һуубад. Теэд хэншье тэдэниие хонуулхаяа гэртээ урибагүй.

¹⁶ Үдэшэлэн нэгэ үбгэн ажалаа дүүргээд, таряаланһаа бусахадаа, тэрэ талмай дээгүүр гэртээ ошожо ябаба. Тэрэ үбгэн Эпрааимай угай хүн аад, Гибаада ажаһуугаа. Харин энэ хотын ехэнхи зон Бэньямиинэй обогой һэн.

¹⁷ Үбгэжөөл хотын талмай дээрэ һууһан тэрэ левидые хараад: – Ши хайшаа зорибош? Ши хаанаһаа ябанаш? – гэжэ асууба.

¹⁸ Үнөөхи эрэ хүн үбгэжөөлдэ иигэжэ харюусаба: – Бидэ Иудын Бэтлэһээмһээ Эпрааимай угайхидай ажаһуудаг хадалиг орон нютаг руу ошожо ябанабди. Би тэндэхиб. Би Иудын Бэтлэһээм ошооб, харин мүнөө өөрынгөө гэртэ бусажа ябанаб. Теэд хэншье намайе урижа, гэртээ оруулнагүй.

¹⁹ Элжэгэдтэмни һолоомон болон тэжээл бии, намда, минии эхэнэртэ болон зарасада хилээмэн ба үзэмэй дараһан архи бии. Бидэндэ юуншье хэрэггүй.

²⁰ – Һанаагаа бү зобо. Шамда байһан юумэн намдашье байха. Гансал ши газаа бү хоныш даа, – гэжэ тэрэ үбгэжөөл хэлээд,

²¹ тэдэниие гэртээ оруулба, элжэгэнүүдтэнь тэжээл үгэбэ. Тэдэнэр хүлөө угаагаад, һуужа эдеэлбэд, уубад.

²² Тэдэнэй найрлажа һуухадань, энэ хотодо хэрэгээ дүүрэһэн яндан эрэшүүл тэрэ гэр хүреэлбэ. Тиигээд тэдэнэр үүдэ тоншожо, үбгэжөөлдэ иигэжэ хашхаралдабад: – Шинии гэртэ орогшые газаашань гарга! Бидэнэр тэрэнииеш хүсөөрөө эдлэхэмнай!

²³ Гэрэй эзэн газаашаа гараад, тэдэниие аргадан, иигэжэ хэлэбэ: – Болохогүйл, минии аха дүүнэр, гэмтэ ябадал бү хэгты! Энэ хүниие хүсөөрөө бү эдлэгты! Юундэб гэхэдэ, гэртэмни байгша хүн – минии айлшан.

²⁴ Намда үхин басаган, тэрээндэ баряанай эхэнэр байна. Би тэдэниие газаашань гаргаһууб. Таанад хамаагүй тэдэниие хүсөөрөө эдлэгты. Харин минии айлшанда бузгай ёһо буруу хэрэг бү хэгты!

²⁵ Теэд тэдэнэр гэрэй эзэнэй гуйлтыень дуулабагүй. Тиихэдэнь үнөөхи левит өөрынгөө баряанай эхэнэрые түлхижэ газаашань гаргаад, тэдээндэ үгэбэ. Тэдэнэр баряанай эхэнэрые эмэ гэжэ мэдэмсээрээ, бүхэли һүниндөө тэрэниие хүсөөрөө эдлээд, үүр хираанаар табибад.

²⁶ Үүр сайжа байхада үнөөхи залуу эхэнэр үбгэнэйнгөө хоноһон гэртэ бусажа, үүдэнэйнь хажууда унаад, газаа һаруул болотор хэбтэбэ.

²⁷ Эртэ үглөөгүүр үнөөхи левит хүбүүн бодоод, аян замаа үргэлжэлүүлхэеэ газаашаа гараба. Тиихэдэнь үнөөхи баряанайнь эхэнэр гараа үүдэнэй богоһо дээрэ табяад хэбтэбэ.

²⁸ Левит тэрээндэ иигэжэ хэлэбэ: – Бодо, ябаябди! Теэд тэрэ эхэнэр харюусабагүй. Тэрэ эхэнэр үхэшэһэн байба. Левит хүбүүн тэрэ эхэнэрээ өөрынгөө элжэгэн дээрэ тээгээд, гэртээ бусаба.

²⁹ Тэрэ эрэ гэртээ ерээд, хутагаяа абажа, үхэгшэ баряанайнгаа эхэнэрые арбан хоёр хэсэг болгожо, үе мүсөөрынь булгалан отолоод, тэдэнээ Израилиин арбан хоёр обогуудай ажаһууһан орон нютагуудта тарааба.

³⁰ – Израильшуудай Египедһээ гараһан үдэрһөө энэ үдэр болотор иимэ муухай үйлэ хэрэг бидэнэй дунда болоошье, харагдаашье үгыл! Харагты! Энэ үйлэ хэрэгтэ һанал бодолоо табижа, яаха хээхэ тухай зүбшэн хэлсэгты! – гэжэ энэ муухай үйлэ хэрэг хараһан хүн бүхэн хэлэбэд.