Ударидагшад 18 - Библи

Даанай обогойхид Лааһиш хотынхидые диилэбэ

¹ Тэрэ үедэ Израильда хаан үгы байба. Даанай обогойхид байрлан нютагжаха газар өөһэдтөө бэдэрбэд. Ушар юуб гэхэдэ, Израилиин бусад обогуудай хубаариин хубита газартай болоходонь, Даанай обогойхидто хубаариин хубита газар хүртөөгүй юм.

² Тиимэһээ Даанай обогой зон нютагжан байрламаар газар хараашалан бэдэржэ ерэхыень Цораа болон Эштаһоол хотонуудһаа хүсэтэй табан сэрэгшэдые шэлэжэ олоод: – Ябагты, нютагжан байрламаар газар бэдэрэгты, – гэжэ тэдэндэ хэлэбэд. Тэдэнэр Эпрааимай обогойхидой ажаһуудаг хадалиг орон нютагта байдаг Михаагай гэртэ ерээд, тэндэ хонобод.

³ Михаагай гэртэ байхадаа, тэдэнэр залуу левит хүбүүнэй дуу дуулаад, тэрэ гэртэнь ороод: – Хэн шамайе эндэ асарааб? Ши эндэ юу хэнэш? Ши юундэ эндэ байнаш? – гэжэ санаартаһаа асуубад.

⁴ Тэнэжэ тулижа ябахадань, Михаагай туһалһан тухай дурдаад, залуу хүбүүн тэдэндэ иигэжэ хэлэбэ: – Михаа намайе хүлһэлөө. Би тэрэнэй санаарта болооб.

⁵ Тэдэнэр тэрэ залуу хүбүүндэ иигэжэ хэлэбэд: – Бидэнэй зорижо ябаһан аян зам амгалан тайбан гү, хэрэгнай бүтэсэтэй байха гү гэжэ ши Бурханһаа асуужа үгэ.

⁶ Санаарта тэдэндэ иигэжэ хэлэбэ: – Энхэ амгалан ябагты. Ошожо ябаһан аян замыетнай Эзэн хараха.

⁷ Табан сэрэгшэ тэндэһээ саашаа ошожо, Лааһишта ерэбэ. Тиихэдээ тэдэнэр эндэхи арадые сидоонуудай ёһо заншал баримталжа, амгалан тайбан, аалин номгон ба һанаа амар ажаһууна, энэ орон нютагта дутаха юумэн болон засаг бариха хүн үгы гэжэ харабад. Тэдэнэр сидоонуудһаа холо байһан тула хэнтэйшье харилсаа холбоогүй байбад.

⁸ Табан сэрэгшэ Цораа болон Эштаһоол хотонуудтаа бусажа ерэбэд. Тиихэдэнь аха дүүнэрынь тэдээнһээ иигэжэ һурабад: – Таанад юу мэдэжэ ерэбэт?

⁹ Тэдэнэр иигэжэ харюусабад: – Дайгаар тэдээндэ добтолон ороёбди. Бидэ тэрэ орон нютаг хараабди. Ехэл һайн газартай орон нютаг байна. Таанад юу хүлеэнэт? Тэндэ дайгаар добтолон орохоёо бү удаашарагты! Угаймнай баялиг болохо тэрэ орон нютаг эзэлэебди!

¹⁰ Таанад һанаа амар байдаг арадые мэдэлдээ абахадаа, тэндэхи газарнуудынь үргэн ба уужам, тэндэ хамаг юумэн элбэг дэлбэг байна гэжэ харахат. Бурхан тэрэ газарнуудые бидэнэй гарта тушаанал!

¹¹ Даанай обогой зургаан зуун сэрэгшэд дайшалхы элдэеэ бүһэлжэ, Цораа болон Эштаһоол хотонуудһаа гаража ошобо.

¹² Тэдэнэр түрүүшээр Иудын Кирьяат-Еариимдэ ошоод, майхан хүреэнээ татабад. Кирьяат-Еаримай хажуудахи тэрэ газарые «Маханээ-Даан» гэжэ мүнөө болотор нэрлэдэг юм.

¹³ Тэндэһээ тэдэнэр Эпрааимай уг удамуудай ажаһуудаг хадалиг орон нютаг ошожо, Михаагай гэртэ ерэбэд.

¹⁴ Лааһиш нютаг шэнжэлэн хаража ерэһэн тэдэ табан сэрэгшэд бусад сэрэгшэдтээ иигэжэ хэлэбэд: – Эдэ гэрнүүдэй нэгэн соо эфод, терафим, шабар болон шудхамал бурхануудай хүрэгүүд байдаг. Тэдэнииень яалтайб гэжэ таанад бодожо үзэгты.

¹⁵ Тэдэнэр Михаагай гэрэй хажууда тогтожо, залуу левидэй гэртэ ороод, санаартые мэндэшэлбэд.

¹⁶ Тиихэдэнь дайшалхы зэбсэгээ бүһэлһэн Даанай обогой зургаан зуун сэрэгшэд хаалта үүдэнэйнь хажууда зогсобод.

^17-18 Хаалта үүдэнэй хажууда зургаан зуун сэрэгшэдтэй хамта санаартын зогсоходо, тэндэхи газар шэнжэлжэ хараһан табан сэрэгшэ Михаагай гэртэ орожо, шабараар болон шудхажа хэһэн бурхадай дүрсэ хүрэгүүдые, эфод, терафим абабад. Тиихэдэнь залуу левит санаарта тэдээнһээ иигэжэ асууба: – Таанад юу хэжэ байнабта?

¹⁹ Тэдэнэр залуу санаартада иигэжэ хэлэбэд: – Абяа гарангүй, аниргүй бай! Бидэнтэй хамта ябалса, бидэнэй эсэгэ ба санаарта болохош! Ганса хүнэй санаарта байнхаар Израилиин бүтэн нэгэ обогой санаарта байбал шамда дээрэ бэшэ аал?

²⁰ Санаарта баярлаад, эфод болон терафим, шабар болон шудхамал бурхануудай дүрсэ хүрэгүүдые абажа, тэдэнтэй хамта ябалсаха болобо.

²¹ Сэрэгшэд байра дээрээ эрьелдээд, үхи хүүгэдээ, үхэр малнуудаа болон зөөри зөөшэнүүдээ урдаа оруулжа, Михаагай гэрһээ холодожо эхилбэд.

²² Михаа болон тэрэнэй хүршэнэр сугларжа, хойноһоонь мүрдэн, тэдээндэ дүтэлбэд.

²³ Ара нюрганһаань тэдэнэй оог хашхаралдаа табилдахада, зургаан зуун сэрэгшэд ябадалаа зогсоожо, гэдэргээ эрьелдээд: – Шамда юун хэрэгтэйб? Ши юундэ хүнүүдые суглуулбаш? – гэжэ Михааһаа асуубад.

²⁴ Михаа тэдээндэ иигэжэ хэлэбэ: – Таанад минии бүтээлгэһэн бурхануудай дүрсэнүүдые, минии санаартые юундэ абаад ошохотнайб? Би юушьегүй үлэбэб! Шамда юун хэрэгтэйб гэжэ таанад юундэ намһаа асуубат?

²⁵ Даанай обогойхид тэрээндэ иигэжэ хэлэбэд: – Ши аниргүй боло, бү дуугара! Сухалтай зон бидэнэй дунда олон ябана. Бидэнэй дайгаар таанадта добтолоо һаа, шамда, шинии гэр бүлэдэ болон орон нютагташни хосорол ерэхэ!

²⁶ Тиигэжэ занаад, Даанай обогойхид аян замаа үргэлжэлүүлэн саашалба. Эдэнэр намһаа булюу хүсэтэй гэжэ Михаа ойлгоод, гэртээ бусаба.

²⁷ Тэдэнэр Михаагай бүтээлгэһэн бурхануудай дүрсэ хүрэгүүдые болон санаартые абаад, Лааһиш ерэжэ, номгон даруугаар ба һанаа амар ажаһууһан арадые һэлмээрээ сабшаад, тэндэхи хотонуудыень галдан шатаабад.

²⁸ Сидоонһоо холо, мүн хэнтэйшье харилсаа холбоогүй байһан тэдээндэ хэншье туһалбагүй. Тиихэдэ Лааһиш хото Бэт-Рэхообой хажуудахи хүнхэртэ байгаа. Тэдэнэр тэрэ хотые һэргээн бодхоогоод, тэндэ ажаһуухаяа нүүжэ ерээ һэн.

²⁹ Тиихэдэ тэдэнэр Израилиин хүбүүнэй, Даан элинсэгынгээ нэрээр тэрэ хотые нэрлээ юм. Урдандаа тэрэ хото Лааһиш гэжэ нэрэтэй байгаа.

³⁰ Даанай угай хүбүүд шабараар болон шудхажа бүтээһэн бурхануудай дүрсэ хүрэгүүдые өөһэдынгөө хотодо табибад. Тэдэнэр Мэнашшээһээ гараһан Гэршоомой хүбүүн Ёнатааниие өөһэдынгөө санаарта болгобод. Ёнатаан болон тэрэнэй хүбүүд Даанай обогой зоной нүүлгэхэ саг хүрэтэр тэрэ газартаа санаартад байһан юм.

³¹ Бурханай һүмын Шилоодо байха үе сагта Даанай үри һадаһад Михаагай бүтээлгэһэн тэдэ бурхадай дүрсэ хүрэгүүдтэ шүтэн мүргэжэ байһан юм.