Ударидагшад 16 - Библи

Самсоон Гааза хотодо ерэбэ

¹ Нэгэтэ Самсоон Гааза хото ошобо. Тиихэдээ тэрэ янхан эхэнэрые хараад, тэрээнтэй гэртэнь оробо.

² – Самсоон эндэ ерээ, – гэжэ хэн нэгэн гаазайхидта хэлэбэ. Тэндэхи зон Самсоониие алаха һанаатайгаар ороһон тэрэ газарыень бүһэлэн хүреэлбэ. Тиихэдээ тэдэнэр хотын хаалта үүдэнэй эргэдэ бэеэ нюужа хоргодоод: – Үүр сайтар хүлеэебди, Самсоониие алаябди, – гэлсэбэд.

³ Самсоон һүниин тэн болотор янхан эхэнэртэй дулаахан хэбтэридэнь хэбтээд, унтариһаа бодожо, газаашаа гараад, хотын хаалта үүдые хоёр тээхи баханануудтайнь болон шэбхэ хаалтатайнь хамта газарһаа һугалжа, тэдэнээ дала мүрэ дээрээ үргэлөөд, Хэброоной хажуудахи хада дээрэ абаашаба.

Самсоон ба Далиилаа

⁴ Тэрэнэй һүлээр Самсоон Сорээк хүнхэртэ ажаһуудаг Далиилаа гэжэ нэрэтэй эхэнэртэ дурлашаба.

⁵ Пилиштүүдые зонхилогшод Далиилаада ерээд: – Тэрэниие диилэжэ бидэнэй хүлихын тула ши тэрэниие аргадажа, үгэдөө оруулаад, хаанаһаа тэрэ агууехэ хүсэтэй болоноб гэжэ мэдэ. Тиибэлшни, бидэнэй хүн бүхэн шамда мянга нэгэ зуун мүнгэн зоос үгэхэ, – гэжэ хэлэбэд.

⁶ Далиилаа Самсоонһоо иигэжэ һураба: – Ши хаанаһаа агууехэ хүсэ шадал олонобши? Шамайе диилэхын тула ямар юумээр уялтайб гэжэ намда нюусаяа хэлэжэ үгыш?

⁷ Самсоон тэрээндэ иигэжэ хэлэбэ: – Хэрбэеэ намайе һурша номо хүбшэлдэг хатаагаагүй долоон шэнэ хүбшээр хүлибэлнь, би юрын хүнүүд шэнги агууехэ хүсэ шадалгүй болохоб.

⁸ Тиихэдэнь пилиштүүдые зонхилогшод һурша номо хүбшэлдэг хүсэд һайнаар хатаагаагүй долоон шэнэ хүбшэнүүдые Далиилаада үгэбэд. Далиилаа тэдээгээрнь Самсоониие хүлижэ уяба.

⁹ Тиихэдэнь тэдэнэй нэгэн Далиилаагай унтадаг таһалга соо хоргодоод байба. Далиилаа Самсоондо иигэжэ хэлэбэ: – Самсоон! Пилиштүүд шамайе барихаяа ерэбэд! Самсоон олһон һабагшые галда дүргэһэн шэнгеэр һурша ном хүбшэлдэг тэдэ хүбшэнүүдыень тоосоогүй бэлэхэнээр таһалба. Тиихэдэнь тэдэнэр Самсооной агууехэ хүсэ шадалайнь нюусые мэдэбэгүй.

¹⁰ Далиилаа Самсоондо иигэжэ хэлэбэ: – Ши намайе мэхэлээш! Мүнөө намда хэлэл даа, юугээр шамайе уялтайб?

¹¹ Самсоон Далиилаада иигэжэ хэлэбэ: – Хэзээдэшье хэрэглэгдээгүй шэнэ аргамжануудаар намайе хүлибэлнь, би юрын хүнүүд шэнги агууехэ хүсэ шадалгүй болохоб.

¹² Далиилаа Самсоониие шэнэ аргамжануудаар хүлеэд, тэрээндэ иигэжэ хэлэбэ: – Самсоон! Пилиштүүд шамайе барихаяа ерэбэд! Тиихэдэнь тэдэнэй нэгэн Далиилаагай унтадаг таһалга соо хороод байба. Самсоон тэдэ аргамжануудыень һабагша шэнгеэр таһалба.

¹³ Далиилаа Самсоондо иигэжэ хэлэбэ: – Ши намайе дахин мэхэлжэ, худалаар хэлэбэш. Шамайе юугээр уялтайб гэжэ намда нюусаяа хэлыш даа? Самсоон тэрээндэ иигэжэ хэлэбэ: – Хэрбэеэ минии толгойһоо долоон багса үһэ абажа, тэдээнээрни утаһануудтай хамта бүдэй һуури табижа гүрөөд, тэдэнээ бүд нэхэдэг станогто модон хадааһаар хадаа һааш, би юрын хүн шэнги агууехэ хүсэ шадалгүй болохоб.

¹⁴ Далиилаа Самсоониие өөрынгөө үбдэг дээрэ унтуулба. Тэрэнэй унтахадань, Далиилаа тэрэнэй толгойһоо долоон багса үһэ хайшалжа абаад, тэдээгээрнь утаһануудтай хамта бүдэй һуури табижа гүрөөд, тэдэнээ бүд нэхэдэг станогто модон хадааһаар хадаад: «Самсоон! Пилиштүүд шамайе барихаяа ерэбэ!» – гэжэ Далиилаа хашхарба. Самсоон нойрһоо һэреэд, станогоо бүдтэйнь хамта газарһаа һуга татан бодобо.

¹⁵ Далиилаа тэрээндэ иигэжэ хэлэбэ: – Хэрбэеэ ши намда үнэн зүрхэнһөө этигэн найдадаггүй аад, намда дуратайб гэжэ юундэ хэлэнэш? Ши намда нюусаяа хэлэхэ дурагүйш. Хаанаһаа агууехэ хүсэ шадал абанабиб гэжэ ши намда хэлэнгүй, намайе гурба дахин мэхэлээш.

¹⁶ Далиилаа үдэр бүхэндэ нюусыень мэдэжэ абахаяа Самсоониие гуйһан үгэнүүдээрээ хашараан зобоожо, тэрэнэй һэргэлэмжые мохообо.

¹⁷ Һүүлэй һүүлдэ Самсоон Далиилаада иигэжэ хэлэбэ: – Минии толгойн үһые хайшалжа болохогүй. Ушар юуб гэхэдэ, би эхынгээ умай соо байхадаа, өөрыгөө Эзэндэ зорюуланхайб. Хэрбэеэ үһыемни хайшалаа һаань, минии агууехэ хүсэ шадал бууража, юрын хүн шэнги болохоб.

¹⁸ Самсоон өөрынгөө нюусые намда хэлэбэ гэжэ Далиилаа мэдээд, пилиштүүдые зонхилогшодто хүниие эльгээхэдээ, тэрээндэ иигэжэ хэлэбэ: – Ерэгты. Энэ удаа тэрэ намда өөрынгөө нюусые хэлэбэ. Пилиштүүдые зонхилогшод мүнгэн зоос абаад, Далиилаада ерэбэд.

¹⁹ Далиилаа Самсоониие өөрынгөө үбдэг дээрэ унтуулаад, хүниие дуудажа ерүүлбэ. Тэрэ хүн Самсооной толгойн долоон багса үһыень хайшалба. Тиихэдэнь Самсооной агууехэ хүсэн бууража, тэрэ юрын лэ хүн болошобо.

²⁰ Далиилаа тэрээндэ иигэжэ хэлэбэ: – Самсоон! Пилиштүүд шамайе барихаяа ерэбэ! Самсоон нойрһоо һэреэд, иигэжэ сэдьхэбэ: «Гэмгүйдөө. Би энэшье удаа бэеэ абарха нэгэ арга олохол байхаб». Теэд тэрэ Эзэндэ орхюулһанаа мэдэбэгүй.

²¹ Пилиштүүд тэрэниие барижа, нюдыень тэһэ хадхаад, Гааза асархадаа, тэрэниие хүрэл хоёр гэнжээр гэнжэлбэ. Тиигээд тэрэниие түрмэдэ һуулгажа, тэндэ һуугшадтай хамта шэниисын хоолос сохилгондо зараба.

²² Тэндэ шэниисын хоолос сохихо ажалда ябахадань, тэрэнэй толгойн дээрэхи хайшалуулһан газартань үһэн дахин ургажа эхилбэ.

Самсооной наһа баралга

²³ Пилиштүүдые зонхилогшод өөһэдынгөө бурхан Дагоондо асари ехэ үргэл үргэжэ, хүхилдэн сэнгэхэеэ эндэ суглараад, иигэжэ хэлэбэд: – Бидэнэй бурхан бидэнтэй дайлалдаһан Самсоониие бидэнэй гарта тушааба!

²⁴ Пилиштүүд Самсоониие хараад, өөһэдынгөө бурханиие магтан, иигэжэ дуулалдабад: – Бидэнтэй дайлалдагшые, бидэнэй газар хооһологшые, бидэнэй үхэһэн бэеэр, орон нютагыемнай дүүргэгшые бидэнэй бурхан бидэнэй гарта тушаагаал!

²⁵ Найрлан сэнгэжэ байһан пилиштүүд иигэжэ хашхаралдабад: – Түрмэһөө Самсоониие эндэ асарагты! Тэрэ бидэниие сэнгүүлэн хүхеэг! Тэдэнэр Самсоониие харанхы түрмэһөө асаруулаад, бидэниие сэнгүүлэн хүхеэ гэжэ тэрээндэ захирба. Хүтэлөөд ябагша залуухан хүбүүн Самсоониие Дагоон бурханай һүмын досоохи хоёр бахана тулгын хоорондо хүтэлэн асарба.

²⁶ Самсоон гарһаань хүтэлөөд ябаһан залуу хүбүүндэ иигэжэ хэлэбэ: – Би энэ гэрые бүхэлжэ баридаг бахана тулгыень барижа үзэһүүб. Ши намайе хүтэлжэ, тэндэ абааша. Би тэрэ бахана тулга түшэжэ, халта амарһууб. Залуу хүбүүн Самсоониие хүтэлжэ, бахана тулгада абаашаба.

²⁷ Эрэшүүл болон эхэнэрнүүд тэрэ һүмэ соо багтажа ядан зогсобод. Тэндэ бүхы пилиштүүдые зонхилогшод байба. Һүмын орой дээрэнь гурба мянган эрэшүүл болон эхэнэрнүүд Самсооной сэнгүүлжэ хүхеэлгэхыень хүлеэнэд.

²⁸ Самсоон Эзэниие дуудан, иигэжэ хэлэбэ: – Эзэн минии, намайе һаныт! Мүнөө Бурхан намда хүсэ шадал үгыт! Өөрынгөө хоёр нюдэнэй түлөө эдэ пилиштүүдһээ үһөөгөө абаһуулби!

²⁹ Самсоон һүмые бүхэлжэ баридаг хоёр бахана тулгын хоорондо орожо, баруун гараараа нэгыень, зүүн гараараа нүгөөдыень тулган бариба.

³⁰ Тиигээд Самсоон иигэжэ хэлэбэ: – Би пилиштүүдтэй хамта үхэһүүб! Тэрэ бүхы хүсөөрөө тэдэ бахана тулгануудые хоёр тээшэнь түлхибэ. Тиихэдэнь тэндэ байһан бүхы пилиштүүдые зонхилогшод болон хүнүүд һандаржа унаһан һүмэдэ даруулжа үхэбэд. Тиигэжэ Самсоон амиды ябахадаа алаһан хүнүүдһээ бүри олон хүнүүдые өөрынгөө үхэлөөр алаба.

³¹ Тэрэнэй аха дүүнэр болон тэрэнэй эсэгын бүхы гэр бүлэ ерэжэ, тэрэнэй хүүр бэеыень абабад. Тиигээд тэдэнэр Самсоониие Цораа болон Эштаһоол хоёрой хоорондо эсэгыень хүдөөлүүлһэн Манооһаагай агы нүхэн хуурсагта хүдөөлүүлбэ. Самсоон хорин жэл соо Израилиин ударидагша байһан юм.