Ударидагшад 15 - Библи

Самсоон пилиштүүдтэ гай тодхор асарба

¹ Хожомынь, шэниисэ хуряалганай боложо байха үедэ Самсоон һамгантаяа уулзаха гэжэ хадам абындаа эшэгэн бэлэгтэй ерээд, иигэжэ гуйба: – Би өөрынгөө һамгантай уулзаха гэжэ ерээб. Һамганаймни унтадаг таһалгада орохо зүбшөөл намда үгыт? Теэд хадам эсэгэнь тэрэниие хадамда үгэһэн басаганайнгаа унталгын таһалгада оруулбагүй.

² Гэбэшье тэрэ Самсоондо иигэжэ хэлэбэ: – Басагыемни голоо гэжэ шамайе һанаад, найрта нүхэсэһэн шинии нүхэдэй нэгэндэ хадамнаа һэм. Һамганайшни дүү басаган бүришье сэбэрхэн юм. Ехэ басаганайм орондо дүү басаганиинь шинии һамган болог лэ.

³ Теэд Самсоон хадам эсэгэдээ иигэжэ хэлэбэ: – Мүнөө пилиштүүд өөһэдөөл гэмтэй! Мүнөө би тэдэниие һургахал байхаб!

⁴ Самсоон ошожо, гурбан зуун үнэгэ баряад, һүүл һүлээрнь хоёр хоёроор холбоод, һүүлнүүдэйнь хоорондо бамбар дэнгүүдые уяба.

⁵ Тиигээд бамбар дэнгүүдтээ гал носоогоод, тэдэ үнэгэнүүдээ пилиштүүдэй таряалан руу табиба. Тиигэжэ Самсоон тэдэнэй боолто бухалнуудые, хадагдаагүй таряалан, уһан үзэмэй эшэнүүдые болон тоһон модонуудыень галдан шатааба.

⁶ «Хэн энэ муухай хэрэг хэбэ гээшэб?» – гэжэ пилиштүүд асууба. Тэдээндэ иигэжэ харюусабад: «Тимнааһаа хүрьгэн орогшо Самсоон энэ хэрэг хэбэ. Ушар юуб гэхэдэ, хадам эсэгэнь тэрэнэй һамгые ондоо хүндэ, тэрэнэй нүхэртэ үгөө юм». Тиихэдэнь пилиштүүд ошожо, Самсооной һамгые эсэгэтэйнь хамта гэр соонь галдажархибад.

⁷ Самсоон пилиштүүдтэ иигэжэ хэлэбэ: – Таанад энэ муу хэрэг хэбэт. Теэд би таанадһаа үһөөгөө абахадаал һанаагаа амархаб!

⁸ Самсоон олон пилиштүүдые зэрлигээр хюдажа алаад, ошожо Этаам хабсагайн хабшал соо хоргодон һууба.

⁹ Пилиштүүд ошожо, Иудада майхан хүреэнээ татажа, Лээхи хүрэтэр байрлаад, дайлалдахаар бэлэн болобо.

¹⁰ Иудада ажаһуугшад тэдээнһээ иигэжэ һураба: – Таанад юунэй түлөө бидэнтэй тулалдаха гэбэт? Пилиштүүд тэдээндэ иигэжэ харюусаба: – Бидэ Самсоониие барижа хүлеэд, бидэнэй арадта хэһэн үйлэ хэрэгтэнь тон адляар тэрэниие хэһээхэеэ ерээбди.

¹¹ Гурбан мянган иудынхид Этаам хабсагайн хабшалда ошоод, Самсоонһоо иигэжэ һураба: – Бидэниие пилиштүүдэй засаг доро мэдэлтэй гэжэ ши мэдэнэ гүш? Ши юундэ иимэ ябадал гаргаабши? – Тэдэнэр намда ямар муу юумэ хээ һэм, эгээл тиимэ муу юумэ би тэдээндэ хэхэб, – гэжэ Самсоон харюусаба.

¹² Тиихэдэнь тэдэнэр Самсоондо иигэжэ хэлэбэд: – Бидэнэр шамайе барижа хүлеэд, пилиштүүдэй гарта үгэхэбди. Самсоон тэдэндэ иигэжэ хэлэбэ: – Таанад намайе алахагүйбди гэжэ намда тангариглагты!

¹³ Иудада ажаһуугшад Самсоондо иигэжэ хэлэбэ: – Бидэ шамайе алахагүйбди. Бидэ шамайе хүлижэ уяад, пилиштүүдэй гарта тушаахабди. Тиигээд тэдэнэр Самсоониие хоёр шэнэ аргамжаар хүлижэ уяад, хабсагайн хабшалһаа гаргабад.

¹⁴ Лээхидэ тэдэнэй дүтэлхэдэ, пилиштүүд баяртайгаар хашхаралдан, тэдэниие угтабад. Эзэнэй Һүлдэ тэрэнэй толгой дээрэ эршэмтэйгээр бууба. Тиихэдэнь маалингын утаһанай галда шатагша шэнгеэр тэрэнэй гарыень хүлин уяһан аргамжа ооһор таһаршаба.

¹⁵ Самсоон һаяхан үхэһэн элжэгэнэй үрүү олоод, тэрээгээрээ мянган пилиштүүдые алаба.

¹⁶ Тиигээд тэрэ иигэжэ хэлэбэ: «Үхэһэн элжэгэнэй үрүүгээр үзэлэй олон дайсадые хюдааб. Үхэһэн элжэгэнэй үрүүгээр мянган хүниие алааб!»

¹⁷ Тиигэжэ хэлээд, Самсоон элжэгэнэйнгээ үрүүе хаяад, тэрэ газараа Раамат-Лээхи гэжэ нэрлэбэ.

¹⁸ Удангүй тэрэ ундаа ехээр хүрэхэдөө, Эзэниие дуудаад: «Би Танай богоол гээшэб. Та намда агууехэ илалта туйлалгые үршөөгөөт. Харин мүнөө Та ундыемни хүрүүлжэ, намайе бү үхүүлыт, бэлгынгээ үзүүрые отолуулаагүй пилиштүүдэй гарта бү үгыт!» – гэжэ гуйба.

¹⁹ Тиихэдэнь Эзэн Лээхиин газар доогуур һудал ангайлгажа, газар дороһоо уһа гаргаба. Уһа уужа ундаа харяахадаа, тэрэ һэргэн амидырба. Тиигээд лэ тэрэ газарыень «Дуудагшын булаг» гэжэ нэрлэгдээ һэн. Тэрэ газар Лээхидэ мүнөөшье болотор байдаг юм.

²⁰ Иигэжэ Самсоон пилиштүүдэй засагаа барижа байха үедэ хорин жэл соо ударидагша байба.