Ударидагшад 14 - Библи

Самсоон һамга абаба

¹ Самсоон Тимнаа хото ошоод, пилишт яһанай залуу басагые харамсаараа, тэрээндэ дурлашаба.

² Тэрэ гэртээ бусаад, эхэ болон эсэгэдээ иигэжэ хэлэбэ: – Тимнаа хотодо байдаг пилишт басагадай нэгэндэ дурлашооб. Һамга хэхыемни тэрэниие намда асарагты.

³ Эсэгэ болон эхэнь тэрээнһээ иигэжэ һураба: – Манай бүхы арадай, мүн аха дүүнэрэй дундаһаа һамга абаха басаган шамда олдоногүй юм гү? Бэлгынгээ үзүүрыень отолуулдаггүй пилиштүүдэй басагые юундэ һамга абахаяа һанабаш? Самсоон эсэгэдээ иигэжэ харюусаба: – Тэрэ намда һайшаагдаа. Тэрэниие намда һамга хэхыемни асарагты!

⁴ Пилиштүүдһээ үһөөгөө израильшууд абаг гэжэ Самсоондо Эзэнэй үршөөһэн зарлигыень хүбүүнэй эхэ, эсэгэ хоёр мэдэбэгүйд. Эгээл тэрэ үе сагта пилиштүүд израильшуудые дарлан захиржа байһан юм.

⁵ Самсоон эхэ болон эсэгэтэеэ хамта Тимнаа хото ошобо. Тэдэнэр хотын хажуудахи уһан үзэмэй таряалангай талмайда дүтэлэн ерэбэ. Залуу нэгэ арсалан эрхирээд, гэнтэ һүрэжэ, Самсоондо добтолон дүтэлбэ.

⁶ Эзэнэй Һүлдэ Самсооной толгой дээрэ бууба. Тиихэдэнь Самсоон зэр зэбсэг баряагүй нюсэгэн гараараа эшэгэн мэтээр арсаланиие таһар удар татажархиба. Теэд тэрэ хэһэн энэ үйлэ хэрэгээ эхэ эсэгэдээ хэлэбэгүй.

⁷ Тиигээд Самсоон Тимнаа хото ерэжэ, тэрэ эхэнэртэй хөөрэлдэбэ. Тэрэ эхэнэр Самсоондо һайшаагдаба.

⁸ Хэдэн хоног үнгэрөөд байхада, үнөөхи эхэнэрые гэртээ асарха гэжэ Самсоон тэрэл харгыгаар дахин ошобо. Самсоон алаһан арсаланайнгаа хүүр бэеыень хараха хүсэлэндэ абтажа, тэрээндэ дүтэлэн ерэбэ. Зүгынүүд арсаланай хүүр бэе соо үүрээ хэнхэй, балаа суглууланхай байба.

⁹ Самсоон зүгын бал гартаа баряад, тэрэнээ харгыдаа эдибэ. Самсоон гэртээ ерээд, өөрынгөө эсэгэ болон эхэдэ зүгын бал үгэбэ. Тэдэнэр зүгын бал эдибэд. Гэбэшье Самсоон арсаланай хүүр бэе сооһоо абагша зүгынгөө тэрэ бал тухай эсэгэ болон эхэдээ хэлэбэгүй.

¹⁰ Самсооной эсэгэ үнөөхи эхэнэрыень харахаяа ошобо. Самсоон тэрэ хотоһоо һамган болгожо абаха басаганайнгаа хурим найрыень хэхэ болобо. Эндэ хүрьгэн ороһон залуу хүбүүд хадам эсэгынгээ гэртэ найр хэдэг заншалтай байба.

¹¹ Хадам эсэгэнь Самсоониие хараад, хүрьгэнтэйгөө хамта басаганайгаа найрта байлсаха гушан эрэшүүлые уриба.

¹² Самсоон тэдээндэ иигэжэ хэлэбэ: – Би таанадта таабари хэлэхэмни. Хэрбэеэ найрай үргэлжэлхэ долоон үдэрэй туршада таабарииемни таанадай зүбөөр тайлбарилаа һаа, би таанадта гушан маалинга самса болон һэлгэжэ үмдэхэ гушан хубсаһа үгэхэб.

¹³ Хэрбэеэ таанадай минии таабариие тайлбарилжа шадаагүй һаа, таанад намда гушан маалинга самса, һэлгэжэ үмдэхэ гушан хубсаһа үгэхэт. – Зай, хэлыш даа таабарияа, бидэ шагнажа байнабди, – гэжэ тэдэнэр Самсоондо хэлэбэ.

¹⁴ Самсоон тэдээндэ иигэжэ хэлэбэ: – Эдиһэн юумэн эдеэн болоо. Хүсэтэйһөө амталуур бии болоо. Теэд тэдэнэр гурбан үдэрэй туршада тэрэ таабарииень тайлбарилжа шадабагүй.

¹⁵ Дүрбэдэхи үдэр тэдэнэр Самсооной һамганда ерээд: – Таабарииень тайлбарилхымнай тула ши үбгэеэ аргада. Тэрэнэй таабарииень бидэнэй тайлбарилжа хэлээгүй һаа, бидэ шамайе болон шинии эсэгын гэрыень галдан шатаахабди. Нюсэгэн болотор тонуулхымнай тула таанад бидэниие эндэ асараа гүт! – гэжэ занабад.

¹⁶ Самсооной урда һамганиинь уйлаганан, иигэжэ хэлэбэ: – Ши намайе үзэн яданаш, ши намда дурагүйш. Ши минии арадай хүбүүдтэ таабари хэлээш. Ши тэрэ таабариингаа тайлбариие намда хэлэхэ дурагүйш. Самсоон тэрээндэ иигэжэ хэлэбэ: – Би таабариингаа тайлбариие өөрынгөө эсэгэ ба эхэдэшье хэлээгүйб. Тэрэнэйнгээ тайлбариие шамда юундэ хэлэхэ болоо хүнбиб?

¹⁷ Самсооной һамган үлэгшэ тэдэ үдэрнүүдтэ уйлаба. Уйлажа байжа, һамганайнгаа аргагүй ехээр гуйхадань, һүүлэй һүүлдэ долоодохи үдэр Самсоон һамгандаа таабариингаа тайлбарииень хэлэбэ. Тиихэдэнь үнөөхи эхэнэр өөрынгөө арадай хүбүүдтэ үбгэнэйнгөө таабариин тайлбариие хэлэжэ үгэбэ.

¹⁸ Долоодохи үдэр хадын саана наранай орохын урда тээ тэдэнэр Самсоондо ерээд, иигэжэ хэлэбэ: – Зүгын балһаа үлүү ехэ амтатай юун бэ? Зэрлиг арсаланһаа үлүүсэ ехэ хүсэтэй хэн бэ? Самсоон тэрээндэ иигэжэ хэлэбэ: – Таанад минии эмэ тугалаар газар хахалаагүй һаа, таабарииемни таахагүй байгаат.

¹⁹ Эзэнэй Һүлдэ Самсооной толгой дээрэ хүсэтэйгөөр бууба. Тэрэ Ашхэлоон хото ошожо, гушан пилиштүүдые алажа, самсануудыень болон һэлгэхэ хубсаһануудыень абаад, тэдэнээ таабарииень таагшадта үгөөд, эсэгынгээ гэртэ ерэбэ.

²⁰ Харин хадам эсэгэнь хадамда үгэжэ байһан басаганайнгаа найрта хүрьгэн орожо байһан Самсоонтой танилсажа нүхэсэһэн гушан эрэшүүлэй нэгэндэ тэрэ басагаяа үгэһэн байба.