Ударидагшад 13 - Библи

Самсоон түрэбэ

¹ Израильшууд Эзэндэ дахин муу юумэ хэжэ эхилбэ. Тиихэдэнь Эзэн тэдэниие дүшэн жэл соо пилиштүүдэй гарта тушааба.

² Тэрэ сагта Цораа хотодо түрэһэн Даанай угһаа гарбалтай Манооһаа гэжэ нэрэтэй хүн ажаһууба. Һамганайнь түрэдэггүй байһан тула тэрэ үхибүүдгүй байгаа.

³ Эзэнэй Эльгээмэл Манооһаагай һамганай урда бии болоод, тэрээндэ иигэжэ айладаба: – Ши үхибүүтэй болодоггүй байнаш, харин мүнөө хээлитэй боложо, хүбүү түрэхэш.

⁴ Тиихэдээ болгоомжолжо, үзэмэй дараһан архи болон шара ундаа бү уу, бузартай эдеэ хоол бү эди.

⁵ Үхибүүнэйнгээ үһыень бү хайшала. Юундэб гэхэдэ, нарайлха нялхашни умай сооһоо өөрыгөө Эзэндэ зорюулан үгэнхэй юм. Таанадай энэ хүбүүн израильшуудые пилиштүүдэй гарһаа абаран аршалжа эхилхэ.

⁶ Тэрэ эхэнэр өөрынгөө үбгэндэ гүйжэ ерээд, иигэжэ хэлэбэ: – Бурханай хүн намда ерээл. Тэрэнэй шарайнь аймшагтай байба. Би тэрэнэй хаанаһаа ерэһые һураагүйб. Тэрэ намда нэрэеэшье хэлээгүйл.

⁷ Бурханай тэрэ хүн намда иигэжэ хэлээ юм: «Хээлитэй болобош, хүбүү түрэхэдөө, үзэмэй дараһан архи болон һогтоодог шара ундаа бү уу, бузартай эдеэ хоол бү эди. Ушар юуб гэхэдэ, нарайлха нялхашни умай сооһоо наһалха наһанайнгаа эсэс хүрэтэр өөрыгөө Эзэндэ зорюулан үгөө».

⁸ Манооһаа Эзэндэ зальбараад, иигэжэ хэлэбэ: – Эзэн минии! Танай эльгээһэн Бурханай хүн дахин бидэндэ ерэг лэ! Түрэхэеэ байһан үхибүүнэй томо болотор юу хэбэл дээрэб гэжэ бидэниие һургаг лэ.

⁹ Эзэн Манооһаагай хэлэхые дуулаба. Эзэнэй Эльгээмэл дахин тэрэ эхэнэртэ ерэбэ. Тиихэдэнь тэрэнэй хажуудань Манооһаа үгы, харин тэрэ эхэнэр ори гансааран таряаланайнгаа талмай дээрэ байба.

¹⁰ Үнөөхи эхэнэр үбгэндөө гүйжэ ерээд, тэрээндэ иигэжэ хэлэбэ: – Үсэгэлдэр ерэгшэ Бурханай хүн дахин намдаш ерээл!

¹¹ Манооһаа бодоод, һамгаяа дахажа, таряаланайнгаа талмайда ошоод, тэрэ хүнһөө иигэжэ һураба: – Минии һамгантай хөөрэлдэһэн хүн ши болоно гүш? – Билби даа, – гэжэ Эзэнэй Эльгээмэл харюусаба.

¹² Тиихэдэнь Манооһаа тэрээнһээ иигэжэ һураба: – Хэлэһэн үгыншни бэелүүлэгдэхэдэ, манай хүбүүн яажа ажаһууха болоноб? Тэрэмнай юу хэхэ ёһотойб?

¹³ Эзэнэй Эльгээмэл тэрээндэ иигэжэ харюусаба: – Минии хэлэһэн тэдэ бүхы юумэнүүдһээ һамганшни һэргылэг.

¹⁴ Уһан үзэмэй эшэһээ гараһан бүхы юумэнүүдые бү эдиг, үзэмэй дараһан архи болон һогтоодог шара ундаа бү ууг, бузартажа муу болоһон эдеэ хоол бү эдиг. Шинии һамган Минии хориһон эдэ бүхы юумэнүүдһээ сээрлэг.

¹⁵ Тиихэдэнь Манооһаа Эзэнэй Эльгээмэлые иигэжэ гуйба: – Бидэнэй эшэгэ шанаад асартар ши намайе эндээ хүлеэгыш даа.

¹⁶ Эзэнэй Эльгээмэл тэрээндэ иигэжэ айладаба: – Шамайе би хэды хүлеэгөөшье һаа, шанаад асарһан эдеэ хоолыешни эдихэгүйб. Хэрбэеэ тэрэнээ Эзэндэ үргэхэ гэбэл, ши тэрэнээ түгэс шатаалта үргэлдэ үргөөрэй. Манооһаа тэрэ хүниие Эзэнэй Эльгээмэл гэжэ мэдэбэгүй.

¹⁷ Манооһаа Эзэнэй Эльгээмэлһээ иигэжэ асууба: – Шинии хэлэһэн үгын бэелүүлэгдэхэдэ, бидэнэр шамайе магтан алдаршуулха гэнэбди. Тиимэһээ ши бидэндэ өөрынгөө нэрые хэлэжэ хайрлыш.

¹⁸ Эзэнэй Эльгээмэл Манооһаада иигэжэ айладаба: – Ши юундэ минии нэрые һурабаш? Минии нэрэ юрэ бусын юм.

¹⁹ Манооһаа шанаһан эшэгэеэ болон хилээмэн үргэлнүүдээ асаржа, Эзэндэ үргэхэеэ шулуун дээрэ табиба.

²⁰ Үргэлэй шэрээһээ галай дүлэн огторгой өөдэ дэгдэбэ. Тиихэдэнь Эзэнэй Эльгээмэл тэрэ дүлэнтэй хамта дэгдэлсэбэ. Манооһаа ба тэрэнэй һамган эдэ бүгэдые хараад, нюураараа газар дэрлэн унажа, Тэрээндэ зальбаршабад.

²¹ Эзэнэй Эльгээмэл дахин харагдабагүй. Тиихэдэнь Манооһаа тэрэниие Эзэнэй Эльгээмэл байба гэжэ мэдэбэ.

²² Манооһаа ухаа алдажа, өөрынгөө һамганда иигэжэ хэлэбэ: – Бидэ Бурханиие хараһан тула үхэхэмнайл!

²³ Теэд һамганиинь үбгэндөө иигэжэ хэлэбэ: – Хэрбэеэ Эзэн бидэниие алаха гэбэл, Тэрэ бидэнэй гарһаа түгэс шатаалта ба хилээмэн үргэлнүүдые абахагүй, бидэндэ эдэ бүгэдые харуулха, хэлэхэ үгы байгаал!

²⁴ Үнөөхи эхэнэр хүбүү түрөөд, тэрээндээ Самсоон гэжэ нэрэ үгэбэ. Самсоон томо болобо. Эзэн тэрэниие адислаба.

²⁵ Цораа болон Эштаһоол хоёрой хоорондо оршодог Маханээ-Даан хотодо Самсооной ажаһуухадань, Эзэнэй Һүлдэ тэрэнэй толгой дээрэ буужа, ажал ябуулгыень эрхилүүлсэжэ эхилбэ.