Ударидагшад 11 - Библи

Иптаа ударидагша болобо

¹ Галаадай хүбүүн Иптаа эрэлхэг зоригтой сэрэгшэ байгаа. Зальхай эхэнэр Галаад гэжэ нэрэтэй хүнһөө тэрэ хүбүү түрөө юм.

² Галаадай һамган тэрээндэ хүбүүдые түрэбэ. Тэдэ хүбүүд томо болоод, Иптаае түрэл хотоһоо үлдэхынгөө урда тээ тэрээндэ иигэжэ хэлэбэд: «Ши бидэнэй эсэгэһээ ямаршье зөөри залгамжалан абахагүйш. Юундэб гэхэдэ, ши зальхай, ондоо эхэнэрһээ гарааш».

³ Тиихэдэнь Иптаа аха дүүнэрһээ зугадажа, Тооб орон нютагта түбхинэбэ. Тэндэ Иптаа гэмтэ ябадал хэгшэдтэй нүхэсэбэ. Тэдэнэр тэрэнэй ударидалган доро добтолгонуудые хэбэ.

⁴ Нэгэ хэдэн сагай үнгэрхэдэ, аммоонууд дайгаар Израильда добтолбо.

⁵ Тиихэдэнь Тооб орон нютагаа орхижо, Галаадаа бусуулха гэжэ Галаадай аха захатад Иптаада ошобо.

⁶ Аха захатад Иптаада ерээд, иигэжэ хэлэбэ: – Орон нютагаа бусажа, бидэнэй сэрэгэй толгойлогшо болыш даа. Аммоонуудтай дайлалдаябди.

⁷ Тиихэдэнь Иптаа тэдээнһээ иигэжэ асууба: – Урдань таанад намайе үзэн ядажа, минии эсэгын гэрһээ үлдэжэ ябуулаа бэшэ гүт? Харин мүнөө таанад ядаралда ороходоо, намда юундэ ерэбэт?

⁸ Галаадай аха захатад Иптаада иигэжэ харюусаба: – Бидэнэй болон Галаадай бүхы зоной толгойлогшо болохыншни тула бидэнэр шамда мүнөө ерээбди. Ши бидэнтэй ошолдо, аммоонуудтай тулалда.

⁹ Иптаа тэдэ аха захатадһаа иигэжэ һураба: – Һайн гээшэ. Нютагаа бусажа, аммоонуудтай дайлалда гэжэ таанадай гуйхада, Эзэнэй намда илалта үршөөбэл, би таанадай засаг баригша болохо гүб?

¹⁰ Галаадай аха захатад тэрээндэ иигэжэ хэлэбэ: – Эзэн бидэнэй гэршэ! Илалта заабол туйлахаш гэжэ бидэнэр тангаригланабди.

¹¹ Иптаа Галаадай аха захатадтай хамта ошобо. Сэрэгшэд тэрэниие өөрынгөө дарга ба толгойлогшо болгобо. Иптаа өөрынгөө хамаг бүхы үгэнүүдые үгэлэн, Мицпаа хотын Эзэнэй гэр соохи тахилай шэрээгэй урда хэлэбэ.

Аммооной хаанда Иптаагай эльгээһэн бэшэг

¹² Иптаа иимэ бэшэгтэйгээр элшэдээ Аммооной хаанда эльгээбэ: «Бидэнэй хоорондо ямар арсалдаан гарааб? Юундэ ши дайгаар бидэнэй газарта ерээбши?»

¹³ Аммооной хаан Иптаагай элшэдтэ иигэжэ харюусаба: «Израильшууд Египедһээ гараад, Арноонһоо Яббоок болон Иордан хүрэтэрхи минии газар дайдые эзэлбэ. Тиимэһээ энхэ тайбанаар тэдэ газарнуудыемни намда бусаа».

¹⁴ Элшэдэйнгээ тэрэ бэшэгыень дамжуулхадань, Иптаа элшэдээ Аммооной хаанда дахин эльгээхэдээ,

¹⁵ иигэжэ тэрээндэ хэлэбэ: – Израиль Моһаабай болон Аммооной газарнуудые абаагүй.

¹⁶ Израильшууд Египедһээ гараад, Хулһата далай тээшэ сүл губяар ошожо, Кадээшдэ хүрөө.

¹⁷ Тиихэдэ тэдэнэр элшэдээ Эдоомой хаанда эльгээхэдээ, иигэжэ гуйгаа: «Шинии газар дээгүүр гаталан ошохо зүбшөөл бидэндэ үгыш». Теэд Эдоомой хаан израильшуудта зүбшөөл үгөөгүй бэлэй. Мүн баһа тэдэнэр элшэдээ Моһаабай хаанда эльгээбэ. Тэдэнэй хаан өөрынгөө газар дээгүүр гаталха зүбшөөл израильшуудта үгөөгүй һэн. Тиихэдэнь израильшууд Кадээшдэ үлөө бэлэй.

¹⁸ Һүүлдэнь израильшууд сүл губиие гаталаад, Эдоомой болон Моһаабай газарнуудые тойрон үнгэржэ, Моһаабай зүүн хилэдэхи Арноон мүрэнэй саана майхан хүреэнээ табин байрлаа юм.

¹⁹ Тиихэдэ израильшууд элшэдээ Хэшбоон хотодо байдаг эмооршуудай хаан Сиһоондо эльгээгээ һэн. Тиихэдэнь тэрэнэй элшэд Сиһоондо иигэжэ хэлээ бэлэй: «Өөһэдынгөө газарта хүрэжэ ошохымнай тула ши өөрынгөө газар дээгүүр гаталха зүбшөөл израильшуудта үгыш даа».

²⁰ Теэд эмооршуудай хаан Сиһоон өөрынгөө газар дээгүүр гаталуулха зүбшөөл израильшуудта үгэнгүй, өөрынгөө бүхы арадые суглуулаад, Яаһцаада майхан хүреэнээ табижа байрлаад, израильшуудтай тулалдаа һэн.

²¹ Тиихэдэнь Эзэн, Израилиин Бурхан Сиһоониие болон тэрэнэй сэрэгшэдые израильшуудай гарта үгэбэ. Тиихэдэнь израильшууд эмооршуудай ажаһууһан бүхы газарыень,

²² Арноонһоо Яббоок мүрэн болон сүл губиһаа Иордан мүрэн хүрэтэрхи бүхы дайдыень эзэлбэ.

²³ Эзэн, Израилиин Бурхан газар дээрэһээнь эмооршуудые намнаад, тэрэ газарыень израильшуудта үгөө һэн. Тиихэдэнь ши тэрэ газарыень һөөргэнь абаха гэбэ гүш?

²⁴ Шинии Хэмоош бурханай үгэһэн газарые ши эзэлнэгүй аалши? Бидэнэй эзэлээд байһан эдэ бүхы газарые Эзэн, бидэнэй Бурхан угайтнай баялиг гэжэ бидэндэ үгөө юм.

²⁵ Ши Моһаабай хаан Циппоорой хүбүүн Балаагһаа юугээрээ үлүү болошоо юмши? Тэрэ Израильтай хэрэлдээ гү, али тэдэнтэй дайлалдаа гү?

²⁶ Израильшууд гурбан зуун жэл соо Хэшбоондо болон Ароһээртэ, тэдэниие тойроод байһан хотонуудта болон Арноон мүрэнэй эрье дээгүүрхи бүхы хотонуудта ажаһууна. Таанад эдэ олон жэлнүүд соо тэдэнэй газарнуудые юундэ бусаажа абаагүйбта?

²⁷ Би шинии урда ямаршье зэмэгүйб. Харин ши минии урдаһаа дайгаар добтолон, намда муу юумэ хэнэш. Эзэн, үнэн бодото зарга шиидхэгшэ мүнөө израильшуудай гү, али аммоонуудай хэниинь зүб бэ гэжэ шиидхэг лэ.

²⁸ Теэд Аммооной хаан Иптаагай эльгээһэн элшэдэйнь хэлэһэн үгые шагнабашьегүй.

Иптаагай тангариг

²⁹ Бурханай Һүлдэ Иптаагай толгой дээрэ бууба. Иптаа Галаад болон Мэнашшээе үнгэрөөд, Галаадай Мицпээ хото дайраад, тэндэһээ саашаа аммоонуудай газар тээшэ ошобо.

³⁰ Иптаа Эзэндэ иигэжэ тангариглаба: «Хэрбэеэ минии гарта аммоонуудые үгэбэлтнай,

³¹ аммоонуудһаа энхэ тайбан бусабални, намайе угтажа, минии гэрэй үүдээр гарагша хүн Эзэнэй болохо. Би тэрэниие түгэс шатаалта үргэлдэ үргэхэб».

³² Иптаа ошожо, аммоонуудтай дайлалдаба, Эзэн аммоонуудые тэрэнэй гарта үгэбэ.

³³ Иптаа Ароһээрһээ Минниит хүрэтэрхи, тэрээнһээ саашанхи Абээл-Кэрамиим хото хүрэтэрхи хорин хотонуудые үгы хэбэ. Энэнь аммоонуудай агууехэ диилдэлгэ боложо, тэдэнэр израильшуудай урда номгорбод.

³⁴ Иптаа Мицпаада байдаг гэртээ бусажа ерэбэ. Тэрэнэй урдаһаа бүлбэнүүр дуугаргажа, бүжэглэн хатарһаар угтаһан эхэнэрнүүдэй дундаһаа басаганиинь урагшаа гараба. Иптаа тэрээнһээ бэшэ бусад хүүгэдгүй, харин ори ганса басагатай байгаа.

³⁵ Иптаа басагаяа харамсаараа, тэрээндээ уйдхар гашуудалаа харуулха гэжэ өөрынгөө хубсаһые таһар татаад, иигэжэ хэлэбэ: – Хөөрхы минии үхин! Ши намда гашуудал асарбаш! Ши минии сэдьхэлые тамалагшадай нэгэн болобош. Би Эзэндэ тангариглаа һэм. Мүнөө би тэрэнээ яашье хубилгажа шадахагүйб!

³⁶ Басаган эсэгэдээ хандажа: – Минии эсэгэ! Ши Эзэндэ тангариг үгөөш. Ши намайе яахаб гэжэ Тэрээндэ хэлээ һэмши, мүнөө тэрэнээ бүтээ. Ушар юуб гэхэдэ, аммоонуудые бута сохиходошни Эзэн шамда туһалаа ха юм, – гээд,

³⁷ үргэлжэлүүлбэ. – Намда гансал нэгэ юумэ зүбшөөгыш даа. Намайе хоёр һараар табииш даа. Би хада дээрэ гараад, хэзээдэшье хурисал үзэжэ үхибүүтэй болохогүйгөө шаналан, хани басагадтаяа хамта уйлаһуулби.

³⁸ – Ошо, – гээд, Иптаа хоёр һараар басагаяа табиба. Тэрэ басаган хани басагадтаяа хамта хада дээрэ гараба. Тэдэнэр үргэлдэ үгтэһэн басагаяа шаналан булта уйлалдаба.

³⁹ Хоёр һарын үнгэрхэдэ, басаган эсэгэдээ бусаба. Иптаа Эзэндэ үгэһэн тангаригаа бүтээбэ. Тиигээд лэ тэрэнэй басаган эрэтэйшье унтажа, үхибүүтэйшье боложо үзөөгүй юм. Эндэһээ уламжалан, Израильда иимэ нэгэ ёһо заншал бии болоо бэлэй.

⁴⁰ Жэл бүхэндэ Израилиин басагад дүрбэн үдэр соо ябажа, Галаад угай Иптаагай басаган тухай дуу дууладаг юм.