Ударидагшад 10 - Библи

Зарга шүүгшэ Толаа

¹ Абимээлэхэй алуулһанай һүүлдэ израильшуудые абархын тула Иссахаарай үеын Пуһаагай хүбүүн Толаа ударидагша болобо. Тэрэ Пуһаа Додоогой аша мүн. Тэрэ Эпрааимай уг удамуудай байдаг хадалиг газарай Шамиир хотодо ажаһуугаа.

² Тэрэ хорин гурбан жэл соо Израилиин ударидагша байба. Тэрэнэй наһа барахадань, тэрэниие Шамиир хотодо хүдөөлүүлбэ.

Зарга шүүгшэ Яһиир

³ Толаагай үхэһэнэй һүүлдэ Галаад хотын Яһиир ударидагша болобо. Тэрэ хорин хоёр жэл соо Израилиин ударидагша байһан юм.

⁴ Яһиир гушан хүбүүтэй, унадаг унаагай гушан элжэгэтэй байгаа. Тэдэнэр Галаадай газар дээрэ гушан хототой байба. Тэдэниие Яһиирай хотонууд гэжэ мүнөөшье болотор нэрлэдэг.

⁵ Яһиирай наһа барахадань, тэрэниие Камоондо хүдөөлүүлбэ.

Израильшууд Эзэндэ дахин шүтэдэг болобо

⁶ Израильшууд Эзэндэ дахин муу юумэ үйлэдэжэ, хуурмаг бурханууд Баалда, Аштаартуудта болон араамшуудай, сидоонуудай, моһаабуудай, аммоонуудай, пилиштүүдэй бурхануудта шүтэн мүргэжэ эхилбэ. Тиихэлээрээ тэдэнэр Эзэнээ орхижо, Тэрээндэ шүтэн мүргэхэеэ болибо.

⁷ Тиихэдэнь Эзэн израильшуудта сухалдажа, тэдэниие пилиштүүдэй болон аммоонуудай гарта үгэбэ.

⁸ Тэрэ жэлһээ эхилжэ найман жэл соо тэдэнэр Иордан мүрэнэй зүүн эрьеһээ саашанхи эмооршуудай Галаад нютагта ажаһууһан израильшуудые хашан дарлаба.

⁹ Аммоонууд Иордан мүрэн гаталаад, Иудын, Бэньямиинэй болон Эпрааимай обогуудай урдаһаа эсэргүүсэн дайлалдахаяа ошобо. Израильшууд тон ехэ дарлалтада орожо доройтобо.

¹⁰ Тиихэдээ израильшууд Эзэндэ иигэжэ хашхаралдаба: – Бидэ Танда эсэргүүсэжэ, нүгэл хээбди. Бидэ өөһэдынгөө Бурхан орхёод, Баалай бурханда шүтэн мүргөөбди.

¹¹ Эзэн израильшуудта иигэжэ айладаба: – Таанад египедүүдтэ, эмооршуудта, аммоонуудта, пилиштүүдтэ,

¹² сидоонуудта, амалээгүүдтэ болон моһаабуудта харшалуулан дарлуулбат. Таанадай Намда хашхаралдан гуйхада, Би таанадые тэдэнэй гарһаа абараагүй аалби?

¹³ Таанад Намайе орхёод, ондоо бурхануудта шүтэн мүргөөт. Би таанадые дахин абархагүйб.

¹⁴ Таанад шэлэжэ абагша өөһэдынгөө бурхануудта ошоод, тэдээнһээ туһа эрин хашхаралдагты. Тэдэнэр таанадые харшалта болон дарлалтаһаа гаргаг лэ.

¹⁵ Израильшууд Эзэндэ иигэжэ хэлэбэ: – Танай урда бидэнэр нүгэл хээбди. Та бидэнтэй дураараа болооройт, теэд Та мүнөө гансал бидэниие аршалжа хайрлыт!

¹⁶ Тэдэнэр үнэнхэ зүрхэнһөө хариин бүхы бурхануудые буруушаажа, Эзэндэ шүтэжэ эхилбэ. Тиихэдэнь Эзэн тэдэнэй зобохо тулихыень хараад, тэдэниие хайрлаба.

Удамаршые бэдэрһэн тухай

¹⁷ Аммоонууд дайлалдахаяа суглараад, Галаадай газар дээрэ өөһэдынгөө майхан хүреэн татажа байрлаба. Израильшууд сэрэгээ суглуулаад, Мицпаа хотодо байрлаба.

¹⁸ Галаадай сэрэгшэд болон ударидагшад бэе бэедээ иигэжэ хэлэбэд: «Аммоонуудтай дайлалдахада хэн бидэниие дахуулхаб? Тэрэ Галаадай бүхы зоной ударидагша болохо».