Ударидагшад 1 - Библи

Иуда ханаһаануудтай дайлалдаба

¹ Иисүүсэй наһа бараһанай һүүлдэ израильшууд Эзэнһээ иигэжэ асууба: – Хэн бидэнэй дундаһаа эгээн түрүүн ханаһаануудтай дайлалдахаяа ошохо ёһотойб?

² Эзэн тэдээндэ иигэжэ айладаба: – Иудын обогойхин дайлалдахаяа ошог. Тэдэнэй газар эзэмдэхыень Би тэдээндэ зүбшөөнэб.

³ Иуда өөрынгөө аха Симеоной уг удамуудһаа туһа эрин иигэжэ хэлэбэ: – Минии аха дүүнэр, хүн бүхэндэ хубаариин газар үгэхэб гэжэ Эзэн бидэндэ найдуулаа. Хэрбэеэ ханаһаануудай газар дайдыень дайгаар эзэмдэлгэдэ таанадай бидэндэ туһалаа һаа, бидэнэр танай газарай түлөө тулалдахаар бэлэнбди. Симеоной үеынхид өөһэдынгөө ахын үеынхидтэ туһалха гэжэ шиидэбэ.

⁴ Ханаһаан болон пэриззии арадуудые үй бута сохилгондо Эзэн Иудынхидтэ туһалба. Бээзэк хотодо арбан мянган хүн алуулба.

⁵ Тэрэ тулалдаанда тэдэнэр Адони-Бээзэгтэй уулзаад, тэрээнтэй тулалдажа, ханаһаан болон пэриззии арадуудые үй бута сохибо.

⁶ Адони-Бээзэгэй тэрьедэхэдэнь, тэдэнэр тэрэниие хүсэжэ баряад, гарайнь болон хүлэйнь эрхы хургануудые таһар сабшаба.

⁷ Адони-Бээзэг тэдээндэ иигэжэ хэлэбэ: – Би далан хаашуулай хүлэйнь болон гарайнь эрхы хургануудые таһар сабшаа һэм. Минии шэрээ доро мухарин унаһан тэдэ эрхы хургануудые тэдэнэр суглуулаа бэлэй. Мүнөө Эзэн эгээл тэрэ минии хэһэн үйлэ хэрэгээрни намайе хэһээбэ. Тэрэниие Иерусалимда асарба. Тэрэ тэндэ наһа бараа.

⁸ Иудын обогой сэрэгшэд Иерусалимда дайгаар добтолон орожо, тэрэ хотые эзэлбэ. Тэдэнэр һэлмээрээ тэндэхи хүнүүдые алаад, тэрэ хотыень галдан шатааба.

⁹ Тиигээд тэдэнэр хадалиг газарта ажаһуудаг ханаһаануудтай дайлалдахаяа баруун хилынь болодог тала газар болон Иудаһаа урагшаа нэмжыһэн губи тээшэ ошобо.

¹⁰ Иудын обогойхид Хэброондо (Урдандаа энэ хото Кирьяат-Арбаа гэжэ нэрэтэй байгаа) ажаһуудаг ханаһаануудтай дайлалдахаяа урагшаа дабшаба. Тэндэ тэдэнэр Анаагай обогой Шэшайе, Ахимааниие, Талмаайе алабад.

Халээб ба тэрэнэй басаган

¹¹ Тиигээд Иудынхид тэрэ газараа орхижо, Дэбиир хотынхидтой дайлалдахаяа ошобо (урдань Дэбиирые Кирьяат-Сээпэр гэдэг байгаа).

¹² Тэдэнэй дайгаар добтолон орохын урда тээ Халээб хэлэбэ: – Дайгаар добтолжо, Кирьяат-Сээпэрые абаһан хүндэ өөрынгөө Ахсаа басагые һамга хэхыень үгэхэб.

¹³ Кирьяат-Сээпэрые Халээбэй дүү болохо Кэнаазай хүбүүн Отниһээл эзэлээ, тиигээд тэрээндэ Халээб Ахсаа басагаяа һамган болгожо абахыень үгөө.

¹⁴ Отниһээл Ахсаа хоёрой хуримаа хэхэ үдэрэй гаргагдахада, эсэгэһээ тала газар эри гэжэ Отниһээл гэрлэхэ басагандаа заагаа. Ахсаагай эсэгэдээ ошоод, унажа ябаһан элжэгэнһээ буухадань, Халээб басаганһаа: «Юун шамда хэрэгтэйб?» – гэжэ асууба.

¹⁵ Ахсаа эсэгэдээ иигэжэ харюусаба: «Ши намда үршөөлөө хайрла. Ши намда Нээгэбэй газар үгөөш. Мүнөө газараа уһалдаг булагуудые үгыш даа». Халээб басаганайнгаа гуйлтыень дүүргэжэ, дээдэ болон доодо булагуудые үгэбэ.

¹⁶ Моисейн хээн үндэһэ яһанай хадамай хүбүүд Пальма модоной хотоһоо гараад, Араад хотоһоо урагшаа нэмжыдэг Иудын сүл губида хүрэжэ, тэндэ нютагжан тогтобо.

¹⁷ Иудынхид өөрынгөө Симеон ахынхидтай суг хамта тиишээ ошожо, Цэпаадта ажаһуудаг ханаһаануудта дайгаар добтолоод, тэрэ хотыень һандарган һүйдхэбэ. Тиигээд тэрэ хотонь мүнөө болотор Хормаа гэжэ нэрлэгдэдэг юм.

¹⁸ Иудынхид Гааза болон Ашхэлоон хотонуудые, тэдэниие тойроод байһан тосхон һууринуудые, мүн Экроон ба тэрэниие тойроод байһан тосхон һууринуудые булимтаран эзэлбэ.

¹⁹ Эзэн Иудынхидэй талада байба. Иудынхид тэндэхи үндэрлиг газарнуудыень булимтаран эзэлээд, тала газарта ажаһуудаг хүнүүдыень намнан үлдэжэ шадабагүй. Ушар юуб гэхэдэ, тэдээндэ дайшалхы түмэр тэргэнүүд байгаа.

²⁰ Моисейн хэлэгшээр Халээб Анаагай гурбан хүбүүдэй үри һадаһадыень тэндэһээ намнан үлдөөд, Хэброон хото эзэлбэ.

Бэньямиинэй уг удамууд

²¹ Бэньямиинэй уг удамууд Иерусалимда ажаһуудаг евүүсүүдые орон нютагһаань намнан үлдэжэ шадабагүй. Тиимэһээ тэндэ евүүсүүд мүнөө болотор Бэньямиинэй уг удамуудай дунда ажаһуудаг юм.

Иосифой уг удамууд Бэтээлые эзэлбэ

²² Иосифой уг удамууд дайлалдахаяа Бэт-Ээл хото тээшэ ошобо. Эзэн тэдэнтэй хамта ябалсаба.

²³ Бэт-Ээл хотые (Урдандаа энэ хото Лүүз гэжэ нэрэтэй байгаа) мэдэжэ абахын тула тэдэнэр тагнуулшадые тиишэнь эльгээбэ.

²⁴ Тагнуулшад тэрэ хотоһоо гаража ябаһан хүниие зогсоогоод, тэрээндэ иигэжэ хэлэбэ: – Хото руу ородог нюуса харгы бидэндэ хэлэжэ, заажа үгэ. Тиигэбэлшни бидэнэр харюудань шамда һайе хэхэбди.

²⁵ Тэрэ хүн хото руу ородог нюуса харгы тагнуулшадта хэлэжэ, заажа үгэбэ. Иосифой уг удамууд нюуса харгыгаар тэрэ хото руу орожо, тэндэ ажаһуудаг хүнүүдые һэлмээрээ алаба. Тиигээд тэдэнэр нюуса харгы заагшые болон тэрэнэй гэр бүлые сүлөөдэ табибад.

²⁶ Тэрэ хүн хээдүүдэй ажаһуудаг газар нютагта ошожо хото баряад, тэрэнээ Лүүз гэжэ нэрлэбэ. Мүнөө болотор тэрэ хотые энэ нэрээрнь нэрлэдэг юм.

Ондоо обогууд ханаһаануудтай дайлалдаба

²⁷ Ханаһаануудай уг удамууд Бэт-Шэһаан, Таанаах, Доор, Иблэһаам ба Мэгиддоо хотонуудта, мүн тэдэниие тойроод байһан тосхон һууринуудта ажаһуудаг байба. Мэнашшээгэй уг удамууд эдэ хотонуудһаа ханаһаануудые үлдэн гаргажа шадабагүй. Тиигээд лэ ханаһаанууд ажаһууһан тэдэ газарнуудтаа үлэһэн байгаа.

²⁸ Хожомынь хүсэтэй болоходоо, израильшууд ханаһаануудай газарыень буляажа абаад, хүндэ ажал тэдээндэ хүүлэдэг өөһэдынгөө албатад болгоо һэн.

²⁹ Эпрааимай уг удамууд Гээзэртэ ажаһуудаг ханаһаануудые тэндэһээнь намнажа гаргангүй, тэдэнэртэй суг хамта ажаһуужа эхилбэд.

³⁰ Зэбүлүүнэй уг удамууд Китроон, Наһалаал хотонуудта ажаһуугшадые газар дайдаһаань үлдэжэ гаргангүй, ханаһаануудые хүндэ ажалаа хүүлэдэг албатад болгоод, тэдэнэй дунда ажаһуужа эхилбэд.

³¹ Ашээрэй уг удамууд Аккоо, Сидоон, Ахлааб, Ахзииб, Хэлбаа, Апиик болон Рэһооб хотонуудта ажаһуугшадые тэндэһээнь үлдэжэ гаргабагүй.

³² Ашээрэй уг удамууд өөрынгөө газар дайдые орхёод ошогты гэжэ ханаһаануудые идхан баалажа шадабагүй. Ушар тиимэһээ, тэдэнэр ханаһаануудай дунда ажаһуужа эхилбэ.

³³ Напталиигай уг удамууд Бэт-Шээмэштэ болон Бэт-Анаадта ажаһуугшадые тэндэһээнь үлдэн гаргажа шадабагүй. Тэдэнэр ханаһаануудай дунда ажаһуухаяа үлөөд, тэдэниие хүндэ ажалаа хүүлэдэг албатад болгобо.

³⁴ Даанай уг удамууд зэбсэгтэ хүсөөрөө эмооршуудые хадата газарнууд тээшэнь хашан түрижэ, гол газартань тэдэниие дахин буулгабагүй.

³⁵ Тиихэдэнь эмооршууд Һар-Һээрэсэй хада дээрэ, Аялоон болон Шаалбиимдэ ажаһууха гэжэ шиидэбэд. Гэбэшье хожомынь хүсэтэй болоходоо, Иосифой уг удамууд эмооршуудые хүндэ ажал хүүлэдэг өөһэдынгөө албатад болгобо.

³⁶ Эмоорой газар дайда Акраббиимэй дабааһаа Сээла хүрэтэр һунан нэмжыбэ.