Цэпаанияа 3 - Библи

Иерусалимда гай гасалан тудаха!

¹ Тэршээ, бузар муухай хэрэгүүдтэй, дарладаг хотодо гай гасалан тудаха!

² Тэрэ үгэ дууланагүй, заабари хүлеэн абанагүй, Эзэндэ этигэнэгүй, өөрын Бурханһаа туһа эрин, ойртохоо һананагүй.

³ Түшэмэлнүүдынь архирагша арсалангуудтал, шүүгшэдынь шонодол адли: үдэшэлэн тэдэ добтолбол, үглөө болотор нэгэшье яһа үлөөдэггүй хомхойнууд юм.

⁴ Лүндэншэдынь бодолгүй, урбагша зон; санаартадынь арюун нангин зүйл бузарлагша, һургаал хуули дэбһэгшэд.

⁵ Эзэн хотын дотор зүб шударга хэрэг эрхилнэ, буруу юумэ хэдэггүй, үүр сайхада, үглөө бүри Тэрэ заабол зарга шүүбэри үйлэдэнэ. Теэд шударга бэшэ зон эшэхэ гээшые мэдэдэггүй.

⁶ Эзэн иигэжэ айладхана: – Арадуудые усадхааб, буланта самхагуудыень дууһан һандаргааб. Гудамжануудаарнь хэншье ябанагүй: иигэжэ Би хооһолооб! Хотонуудынь хооһороо: нэгэшье хүн тэндэ ажаһуунагүй.

⁷ «Үнэхөөр Намайе хүндэлөөд байгаарайгты, заабаринуудые дуулажа, сахин байгты, тиигэбэл, байратнай һандаргагдахагүй, таанад тушаа Минии түсэблэһэн гай тодхор танда хүрэхэгүй!» – гэжэ айладхаа бэлэйб. Теэд тэдэ заабол муу муухай хэрэг хэхэеэ оролдодог байба.

⁸ Тиимэһээ Намайе хүлеэгты! Минии ерэхэ үдэр хүрэтэр! Арадуудые суглуулжа, хан түрэнүүдые дуудажа, уур сухалаа, уур хилэнсэгэйнгээ бүхы гал дүлэн тэдээн дээрэ адхахаб! Иигэжэ Би зарга шүүбэри ябуулхаб, иигэжэ Минии уур сухалай гал дүлэндэ бүхы дэлхэй шатаха!

Израилиин үлөөшэ зон гэмтэ ябадал бэшэ үйлэдэхэгүй

⁹ Удаань Би арадуудай үгэ хүүр хубилгахаб, тиихэдэм тэдэ гансал Намда мүргэн зальбаржа, бултадаа Намдал алба хэн байха.

¹⁰ Эфиопиин гол горходые гаталан, Минии тараагдаһан арад түмэн, Минии үнэнхэ мүргэлшэд Намда үргэлнүүдые асарха.

¹¹ Тэрэ үе сагай ерэхэдэ, таанар, Минии арад түмэн, урдаһаам буһалгаалан хэрэг ябуулхагүйт, эшхэбтэр юумэ хэхэгүйт. Үгы һаатнай, Би таанарай дундаһаа бардам, дээрэлхүү зантай зониие зайлуулхаб, Минии арюун нангин хада уула дээрэ таанар бардамлан ябахаа болихот.

¹² Харин юрын, даруу зантай зониие үлөөхэб, тиихэдэм тэдэ Намда зальбаран байха.

¹³ Израилиин үлдөөсэ зон буруу хэрэг үйлэдэхэгүй, худал хэлэхэгүй, мэхэ гохо хэрэглэхэгүй. Тэдэ эдеэ хоолоо барин, амаран, аюулгүй амгалан амидарха.

Сионой басаган, дуугаа дуула! Израилиин зон, баяртайгаар хашхаралдыт!

¹⁴ Сионой басаган, дуугаа дуула! Израилиин зон, баяртайгаар хашхаралдыт! Иерусалим, үнэнхэ зүрхэнһөө баясан, сэнгэн байгаарай!

¹⁵ Эзэн шам тушаа шиидхэбэреэ болюулаа! Дайсадыеш зайлуулаа! Израилиин хаан, Эзэн таанартай хамта! Саашадаа таанар юунһээшье айхагүйт.

¹⁶ Тэрэ үдэрэй ерэхэдэ, Сион хададахи Иерусалим хотодо: «Бү ай! Айһандаа гартнай бэшэ бү һуладаг!» – гэжэ хэлэгдэхэ.

¹⁷ Эзэн Бурхантнай таанартай хамта. Тэрэ таанадые абарха баатар хүсэтэй. Тэрэ таанар тушаа баясан хүхихэ, хайра дуран соогоо аалихан, таанар тушаа баяртай зугаалан сэнгэхэ.

¹⁸ Эзэн иигэжэ айладхаа: «Танай гашуудал дууһаха, һайндэрлэхэ аргатай болохот.

¹⁹ Хараарайгты даа, тэрэ сагай ерэхэдэ дарлагшадыетнай Би суглуулхаб, дохолон эрэмдэгүүдые абархаб, тараһан арадаа суглуулхаб, тиигээд шоо үзэжэ байһан энэ газартань тэдэниие хүндэтэй, нэрэ түрэтэй зон болгохоб.

²⁰ Тэрэ сагай мандахада таанарые суглуулан асархаб, хараһаар байтартнай сүлэлгэһөө таанадые бусаахаб, тиигээд дэлхэйн арадуудай дунда хүндэ ямбатай, нэрэ түрэтэй болгохоб!» Эзэн иигэжэ айладаал!