Цэпаанияа 2 - Библи

Абарагдаха гэбэл, Эзэниие бэдэрэгты

¹ Өөрыгөө хаража үзыт, бэеэ барижа шадахагүй улад зон, өөһэдыгөө шэмхэжэ абыта!

² Мэхиинэ мэтээр һалхинда туугдан хиидэхэ үдэрэйтнай ерэхын урда тээ, Эзэнэй гал дүлэн мэтэ уур хилэнсэгэй таанад руу хүрэтэр

³ үрдижэ, дэлхэйн юрын улад зон, Эзэнэй үгэ дуулыта, тогтоол хуулинуудыень сахижа, үнэн зүб хэрэгүүдые хэгты, даруу номгон байгты. Тиигэбэл, Эзэнэй хилэнсэгтэ үдэр таанад амиды үлэжэ магадгүйт.

Эзэн пилиштын газар дайдые шүүн хэһээнэ

⁴ Гаазада хэншье үлэхэгүй, Ашхэлооншье хооһорхо. Гэгээн сагаан үдэр дунда Ашдоодой улад зон гэрһээ үлдүүлхэ, Экроонойшье зон үлдэн гаргуулха.

⁵ Далайн эрьеэр ажаһуудаг хэрээдэй зон, таанарта гай гасалан ушарха! Пилиштын Ханаһаан һуури, Эзэн шамайе буруушааһан зарлигаа буулгаа! Тэрэ таанарые хюдаха, нэгэшье хүн амиды үлэхэгүй.

⁶ Иигэжэ далайн эрьеын газар дайда хонидой бэлшээри, малай байра болохо.

⁷ Сүлэлгэдэ байжа амиды мэндэ гарасалдаһан Иудын зоной үлдөөсэ энэ газарта байрлажа, малаа тэндэ адуулха, Ашхэлооной гэрнүүдтэ амаран унтаха. Эзэн Бурханиинь тэдээн тушаа һанаагаа табижа, сүлэлгэһөө бусааха.

Эзэн Моһаабай болон Аммооной улад зониие шүүн хэһээнэ

⁸ Эзэн иигэжэ айладхана: «Минии арад түмэниие Моһаабай болон Аммооной улад зоной баһажа байхые, хараахые, нютагыетнай эзэмдэхэмнай гэжэ байгаад бардамлахыень Би дуулааб.

⁹ Тиимэһээ Би, Израилиин Түмэн Сэрэгтэ Эзэн Бурхан, Өөрөөрөө тангаригланаб! Содом болон Гоморродол адли Моһааб болон Аммоон һандаргагдаха! Халаахай һөөгүүдэй ургадаг газар, дабһанай нүхэ уурхай, сүл губи тэдэ хэтэдээ болохо! Арад түмэнэйм үлдөөсэ зон тэдэ газарые угай газар гэжэ олзолон абаха!»

¹⁰ Энэ болбол Моһаабтай болон Аммоонтой юундэ ушарааб гэбэл, тэдэнэй бардамлаһандань, Түмэн Сэрэгтэ Эзэнэй арад түмэниие шоо үзэн баһаһанайнь түлөө!

¹¹ Эзэн тэдээндэ угаа аймшагтай болохо. Юуб гэхэдэ, Тэрэ дэлхэйн бурхадые ямаршье хүндэгүй бологохо, арад бүхэн байдаг газарһаа Тэрээндэ зальбаран мүргэдэг болохо.

Эзэн Эфиопиин арад зониие шүүн хэһээнэ

¹² Эзэн Эфиопиин арад зониие һэлмээр сабшан усадхаха.

Эзэн Ассириин улад зониие шүүн хэһээнэ

¹³ Тэрэ гараа хойто зүг руу һунгажа, Ассири үгы хэхэ. Нинэвээ хотые эзэгүйрүүлэн, сүл губи мэтэ болгон хатааха.

¹⁴ Тэндэ мал һүрэг, элдэб ан амитад бэлшэхэ, шара шубуун һандархай шулуунууд соо байрлажа, сонхоорнь һүхирэн байха. Үүдэнэй бахананууд дээр мүн лэ һандарал үзэгдэхэ, юуб гэхэдэ, үнэтэ хуша модон бүреэһэниинь үгы болохо.

¹⁵ Аюулгүй оршогшо, баяр зугаатай байгша, «бил гээшэб, намһаа ондоо һайхан хото байхагүй» гэжэ досоогоо бардамлажа байгааша хото иимэ болохо! Ан арьяатанай байра, һандаралай үүр тэрэл! Хажуугаарнь үнгэрөөшэ хүн бүхэн шоо үзэн, гараараа занган гараха.