Тоололго 6 - Библи

Өөрыгөө Эзэндэ зорюулагшад

¹ Эзэн Моисейдэ иигэжэ айладаба:

² – Израильшуудта соносхон иигэжэ хэлэ: Хэрбэеэ эрэ гү, али эхэнэр хүн Эзэндэ шахаа тангаригаа үгэжэ, толгойдоо оливын тоһо түрхюулээд, ямар нэгэ болзор саг соо өөрыгөө Эзэндэ зорюулха гэжэ шиидэбэл,

³ үзэмэй дараһан архи, жэмэсээр хэһэн шара унда бү ууг, үзэмэй дараһан архиһаа, мүн һогтоодог унданһаа хэһэн эдеэ хоол хатааһан гү, али хатаагаагүй уһан жэмэс бү эдиг.

⁴ Өөрыгөө Эзэндэ зорюулһан тэрэ хүн саг болзоройнгоо үнгэртэр уһан үзэм жэмэсэй үрэһэнһөө эхилээд, хальһан хүрэтэршье хэһэн унда бү ууг, тэрээгээр хэһэн эдеэ хоол бү эдиг.

⁵ Өөрыгөө Эзэндэ зорюулһан болзор саг соо тэрэ хүн үһэеэ бү хайшалуулаг. Эзэндэ өөрыгөө зорюулһан саг болзоройнгоо үнгэртэр тэрэ хүн эдэ бүхы юумэнүүдые эдихэ, уухаяа сээрлэжэ, һахал һамбайгаа ургуулаг.

⁶ Эзэндэ зорюулһан болзор сагайнгаа үнгэртэр тэрэ хүн үхэгшын бэедэ гар бү хүрэг.

⁷ Хэрбэеэ өөрынгөө эсэгын ба эхын гү, али ахын болон эгэшын үхэбэл, тэрэ хүн тэдээндэ гар хүрэхэ ёһогүй, гар хүрэбэл, тэрэ хүн бузарлаха. Тэрэ хүн Эзэндэ өөрыгөө зорюулжа байһан тэмдэг болохо толгойнгоо үһые бү абаг.

⁸ Тиигээд тэрэ өөрыгөө Эзэндэ зорюулжа байһан бүхы үдэрнүүдтэ арюун байха ёһотой.

⁹ Хэрбэеэ өөрыгөө Эзэндэ зорюулжа байгшын хажуудахи хүн гэнэ боложо гэнтэ үхэшөө һаань, тэрээнһээ тэрэ бузарлаад, тангариглалайнгаа хубинь болохо толгойнгоо үһые болон һахалые долоодохи үдэртөө абхуулаг. Ушар юуб гэхэдэ, энэ үдэр дахинаа сэбэрлэгдэн арюудхагдаха.

¹⁰ Наймадахи үдэр Эзэндэ өөрыгөө зорюулагша хоёр зэрлиг гү, али тэжээмэл хоёр залуу гулабхаа абаад, санаартада асаржа, Уулзалгын майхан һүмын үүдэндэ үгэг.

¹¹ Санаарта тэдэ шубуудайнь нэгые нүгэл сагааруулгын, нүгөөдыень түгэс шатаалта үргэл болгон тахилай шэрээ дээрэ табижа, үхэгшэһөө бузарлаһан тэрэнэй бэеые сэбэрлэн, толгойень арюудхаг.

¹² Тиигээд тэрэ хүн өөрыгөө Ззэндэ зорюулһан болзор сагаа дахин шэнээр эхилжэ, Эзэндэ мэдэлээ үгэлгын үргэлдэ түлгэн хуса асараг. Юуб гэхэдэ, өөрыгөө Эзэндэ зорюулһан тэрэнэй болзор саг бузартажа, миин хосороо.

¹³ Энэ хадаа өөрыгөө Эзэндэ зорюулһан тухай хуули юм. Өөрыгөө Эзэндэ зорюулалгын болзор сагай үнгэрхэдэнь, тэрэ хүн Уулзалгын майхан һүмын үүдэндэ ерэг.

¹⁴ Тиихэдээ тэрэ хүн Эзэндэ үргэл болгожо эрэмдэг бэшэ нэгэ түлгэн хуса түгэс шатаалта үргэлдэ эрэмдэг бэшэ үшөө нэгэ эмэ түлгэ, нүгэлөө сагааруулгын үргэлдэ эрэмдэг бэшэ бэеэ хүсэһэн нэгэ хуса амгалан байдалай түлөө үргэл болгон асараг.

¹⁵ Шэниисын гурилые тоһонтой холижо, эһээлтэгүйгөөр болгоһон шаангинуудые, эһээлтэгүйгөөр болгоод, тоһо түрхиһэн хайрмагуудые болон үзэмэй дараһан архи энэ тусгаар үргэлэй хубинуудые түрсүүг соо хээд асаржа болоно.

¹⁶ Санаарта эдэ бүхы үргэлнүүдыень Эзэндэ айладхаад, нүгэл сагааруулгын болон түгэс шатаалта үргэлнүүдые үргэг.

¹⁷ Эзэнтэй эб нэгэтэй болохын тула эрэмдэг бэшэ нэгэ хуса, нэгэ түрсүүг хилээмэ болон үзэмэй дараһан архи үргэг.

¹⁸ Эзэндэ бэеэ зорюулагша Уулзалгын майхан һүмын үүдэндэ ошожо, Эзэндэ зорюулан ургуулжа байһан үһэеэ абхуулаад, тэрэ үһэеэ хани барисаатай болохо гэһэн үргэлэй гал дээрэ хаяг.

¹⁹ Өөрыгөө Эзэндэ зорюулагшын толгойнгоо үһые абхуулхадань, санаарта шанаһан хониной дала, эһээбэригүйгөөр талха зууража бариһан нэгэ зузаан хайрмаг, нэгэ шаанги түрсүүг сооһоо абаад, тэрэнэй гар дээрэ табиг.

²⁰ Тиихэдэнь санаарта тэдэ үргэлнүүдыень үргэл хэдэг үргэлэй шэрээдэ абаашаад, сээжэ болон ээм мүрэ хоёройнгоо хоорондо даллаг. Энэ хадаа нүгэл хэгшэдые санаартын арюудхалга болоно. Һүүлдэнь эдэ үргэлнүүд санаартын болодог юм. Энэ ёһололой һүүлээр өөрыгөө Эзэндэ зорюулагша үзэмэй дараһан архи уухадань болохо.

²¹ Энэ хадаа өөрыгөө Эзэндэ зорюулжа тангариг үгэхэ гэжэ шиидэгшын хуули болон бэлэг үргэлнүүдынь гээшэ. Энээнһээ гадна тэрэ хүн шадал соогоо Эзэндэ үшөө ямар бэ даа үргэл үгэхэ, Эзэндэ үшөө ехэ тангариг үгэхэ гэбэл, тэрэ хүн тэдэнээ бэелүүлхэ ёһотой. Тиигээд тэрэ хүн өөрыгөө Эзэндэ зорюулалгын тангариглалай хуулиин эдэ бүхы ёһололнуудые болон үргэлнүүдые түгэс дүүрэн бэелүүлэг.

Санаартадай үреэлнүүд

²² Эзэн Моисейдэ иигэжэ айладаба:

²³ – Аһароондо ба тэрэнэй хүбүүдтэ иигэжэ хэлэ: Таанад израильшуудые иигэжэ үреэдэг байгты:

^24-26 «Эзэн таанадые адислаг, аршалаг лэ! Эзэн таанад тээшэ энхэрэн хаража, үршөөл хайра хүртөөг лэ! Эзэн таанадай мүргэлдэ харюусажа, амгалан тайбаниие үршөөг лэ!»

²⁷ Эзэн үшөө иигэжэ нэмэбэ: – Мүнөөдөө Аһароон хүбүүдтэеэ хамта Минии нэрэһээ иигэжэ израильшуудые үреэг лэ! Би тэдэниие үреэнэб!