Тоололго 5 - Библи

Арюун сэбэр байха тухай хуули

¹ Эзэн Моисейдэ иигэжэ айладаба:

² – Арһанай һэлхэнгээр, эдеэрэ болон шуһанай гоожон гарадаг үбшэнүүдээр үбшэлһэн бүхы үбшэнтэдэй болон үхэгшэдэй бэедэ гар хүрэжэ бузарлагшадые тогтон байрлаһан хотон хүреэнүүдһээ үлдэжэ ябуулха захиралта израильшуудта үгэ.

³ Минии саг үргэлжэ таанадай дунда байхада хотон хүреэ бузарлахагүйн тула эдеэрэ гарадаг үбшэнгүүдээр үбшэлһэн бүхы эрэшүүлые, мүн эхэнэрнүүдые үлдэжэ, хотон хүреэнүүдэйнгээ газаа гаргагты.

⁴ Моисейдэ айладаһан Эзэнэй захиралтые дүүргэжэ, израильшууд арһанай эдеэрэ болон шуһа гоожоһон үбшэнтэниие үлдэжэ, хотон хүреэнүүдһээ гаргаба.

Зэмын түлөө гарза харюулга

⁵ Эзэн Моисейдэ иигэжэ айладаба:

⁶ – Израильшуудта иигэжэ хэлэ: Хэрбэеэ эрэ гү, али эхэнэрэй ямар нэгэ муу юумэ хүндэ хэбэлнь, энэнь Эзэндэ нүгэл хэһэнтэй адли болохо һэн тула гэмтэ ябадалай зэмэдэ ороходоо,

⁷ сэдьхэлээрээ өөһэдынгөө нүгэлые мэдэрэг. Тиигээд тэрэ хүн өөрынгөө зэмын түлөө хохидогшодо ялын түлбэриие хуу дууһан түлэжэ, хуулита түлбэридөө үшөө тэрэнэйнгээ табан хубииень нэмэг.

⁸ Хэрбэеэ үхэгшын түрэлхидһөө түлбэрииень абаха хүнэй үгы байгаа һаань, гэмтэ ябадалайнгаа түлбэриие Эзэндэ зорюулжа, гэмтэ ябадал хэгшэ хүн бүхы түлбэриеэ санаартада түлэжэ, санаарта тэрэнэй хэһэн гэмые хуса үргэлөөрнь сагааруулаг.

⁹ Хэрбэеэ израильшуудай хэн нэгэнэйнь үргэлэй юумэ – нангин бэлэг асараа һаань, тэдэ бултадаа санаартын болохо.

¹⁰ Санаарта өөртэнь асарһан бэлэгүүдые өөртөө үлөөхэ, тэрээндэ үгтэһэн юумэн өөрынь лэ болохо.

Атаа жүтөөн тухай

¹¹ Эзэн Моисейдэ иигэжэ айладаба: –

¹² Израильшуудта тунхаглан иигэжэ хэлэ: Хэрбэеэ эхэнэр хүн үбгэндөө урбажа,

¹³ ондоо эрэтэй хурисал хэжэ, энээнииень үбгэниинь хараагүй һаа, тэрэ эхэнэр нюусаар бузарлагдаа, гэмынь гэршэлхэ хүн үгы, тэрэ баригдаагүй.

¹⁴ Теэд жүтөөндэ абтаһан үбгэниинь бузарлагдаһан һамгаяа жүтөөрхэнэ гэе. Үгышье һаа, жүтөөндэ абтаһан үбгэн һамгаяа жүтөөрхэжэ, харин тэрэнь бузарлагдаагүй байгаа һаа,

¹⁵ үбгэниинь һамгаяа санаартада абаашаг. Тиихэдээ һамганайнгаа түлөө эфаагай арбанай нэгэ хуби ешмээнэй гурил асараг. Тэрэ ешмээнэйнь гурилда оливын тоһон болон уталга хэгдээгүй байха ёһотой. Ешмээнэй гурил – Эзэндэ үргэһэн хилээмэн үргэл атаа жүтөөрхэлэйнь үргэл болоно. Энэ үргэлынь өөрынгөө һамгые үнэн сэхэ бэшэ гэжэ үбгэнэйнь сэдьхэн бодоһоной тэмдэг болоно.

¹⁶ Санаарта тэрэниие дахуулжа, Эзэнэй урда абаашаад,

¹⁷ шабар амһарта соо нангин уһа эюулэг. Майхан һүмын досоохи газарһаа шэмхэ шорой абаад, тэрэнээ онсо тусгаар уһан соо хэг.

¹⁸ Тиигээд санаарта тэрэнэй һамгые үргэлэй шэрээгэй урда толгой нюсэгөөр зогсоожо, атаа жүтөөрхэлгын үргэлдэ үбгэнэйнь асарһан хилээмэн үргэл болохо ешмээнэй гурил гартань барюулаг. Тэрэ эхэнэртэ хараалай муу хараал шэнгээжэ болохо нангин уһатай шабар домбо санаартын гарта байг.

¹⁹ Санаарта тэрээндэ иигэжэ тангариглан хэлэг: «Хэрбэеэ өөрынгөө үбгэндэ урбажа, ондоо эрэтэй унтажа, бузартаагүй һааш, энэ онсо тусгаар уһан шамда хоро хэхэгүй.

²⁰ Харин үбгэндөө урбажа, ондоо эрэтэй унтажа, бузартаһан байгаа һааш,

²¹ энэ онсо тусгаар уһа уухадаа, ши Эзэнэй харааһан муу хараалда хүртэжэ, хуурмаг хээлитэй болохош. Харин шинии түрэл арад хараалда хүртэһэн шамайе харахадаа, шамһаа булта буруу хараха».

²² Санаарта тэрэ эхэнэртэ тангариглан иигэжэ хэлэг: «Хараалай муу хараал шэнгээдэг энэ онсо тусгаар уһан бэеэршни тараг. Хэрбэеэ шинии нүгэл хэһэн байгаа һаа, умайш доошоо унажа, умайнгаа газаа хээлитэхэш». Тэрэ эхэнэр «Тиихэ болтогой!» гэжэ хэлэг.

²³ Санаарта хуйламал саарһан дээрэ хараал бэшэг. Тиигээд тэрэнээ онсо тусгаар уһаар угаажа, үзэг болон үгэнүүдыень үгы болгог.

²⁴ Тэрэ эхэнэр хараалай муу хараал һануулдаг онсо тусгаар тэрэ уһа ууг. Тэрэ уһан тэрэнэй досоо орожо, аймшагтай зоболон үзүүлэг.

²⁵ Санаарта тэрэ эхэнэрэй гарһаа атаа жүтөөнэй үргэлыень абажа, үргэлэй шэрээгэй урда абаашаад, дээрэнь табиг.

²⁶ Санаарта үргэлэй тэмдэг хуби болгон орооһон үргэлһөөнь нэгэ адха абаад, тэрэнээ үргэлэй шэрээ дээрэ табижа шатааг. Тиигээд онсо тусгаар уһа уухыень тэрэ эхэнэртэ үгэг.

²⁷ Хэрбэеэ тэрэ эхэнэрэй һэбхиржэ, өөрынгөө үбгэндэ урбаһан байбалнь, онсо тусгаар уһан шуһа мяхан соогуурнь таран урдажа, тэрээндэ аймшагтай зоболон асарха. Хойшодоо тэрэ эхэнэр хэзээдэшье үхибүүтэй болохогүй. Тиигэжэ тэрэ эхэнэр өөрынгөө арадай дунда шоо үзүүлэн, нэрэ хүндэгүй болохо.

²⁸ Хэрбэеэ тэрэ эхэнэр үбгэндөө урбаагүй, ондоо эрэтэй унтаагүй байбал, онсо тусгаар уһанда хорлогдонгүй үлэжэ, хожомынь үхи хүүгэдтэй болохо.

²⁹ Энэ хадаа үбгэнтэй эхэнэрэй нүгэл хэжэ һэбхирэлгэн тухай атаа жүтөөрэлгын хуули юм.

³⁰ Эрэ хүн һамгамни намдаа урбажа, ондоо эрэтэй гүйлдэнэ гэжэ һэжэглэн тухайлаад, тэрээндэ атаархан жүтөөрхэбэл, иимэ юумэ бүтээг. Санаарта тэрэнэй һамгые Эзэнэй урда абаашаг, энэ хуулиин ёһоор тэрэнэй үргэл мүргэлыень бүтээг.

³¹ Тиихэдэнь тэрэнэй үбгэн ямаршье нүгэлгүй сэбэр үлэхэ, харин һамган нүгэлтэй байбал, өөрөө тэрэ һамганиинь зоболон үзэхэ.