Тоололго 16 - Библи

Ударидагшадай Моисейдэ эсэргүүсэл

¹ Коорах Ицһаарай хүбүүн, Ицһаар Кэһаадай, Кэһаат Левиин хүбүүн юм. Тэрэ Элиаабай хүбүүд Датаан ба Абираамтай, Пээлэдэй хүбүүн Оонтой (Датаан, Абираам болон Оон Рэүбээнэй үринүүд) хамта

² Моисейдэ эсэргүүсэжэ, буһалгаа эмхидхэбэ. Тэдэнтэй хамта Израиль угсаатанай хоёр зуун табин нэрэтэй солотой, бүхы зоноор һунгагдаһан дарганар Моисейдэ эсэргүүсэһэн буһалгаанда хабаадалсаба.

³ Тэдэнэр булта Моисей Аһароон хоёрто ерээд, иигэжэ хэлэбэд: – Болигты бидэндэ һургаал заабари хэлэхэеэ! Бидэнэр булта нангин бүлгэм гээшэбди! Маанадай дунда Эзэн байна! Таанад Эзэнэй арадһаа юугээрээ үлүү дээрэ болошоо юмта?

⁴ Моисей тэдэнэй хэлэхые шагнажа, уруугаа харан унаад,

⁵ Коорахта болон тэрээнтэй үгэеэ нэгэдэн үгэсэлдэгшэдтэ иигэжэ хэлэбэ: – Үглөө үглөөгүүр Эзэн үнэхөөрөө хэн Тэрэнэйб, хэн арюун нангин бэ, Өөр руугаа хэниие дүтэлүүлдэг байха тухайгаа харуулха даа. Тэрэнэй шэлэһэн хүн лэ Тэрээндэ дүтэлдэг байха.

⁶ Харин мүнөө ши, Коорах, шамтай үгэеэ үгэсэлдэгшэд, иимэ юумэ хэгты: улаан согтой амһарта абаад,

⁷ Эзэнэй урда үглөө үглөөгүүр асараад, аһажа байгаа нүүрһэ, дээрэнь санзай үбэнүүлэгты. Тиихэдэтнай Эзэн хэниие шэлэнэб, Тэрэ хүн нангин гэжэ мэдэгдэхэ. Таанад, Левиин хүбүүд, даншье үлүү хэтэржэ байнат.

⁸ Моисей хэлэхэ гэһэн бодолоо саашань үргэлжэлүүлэн, Коорахта иигэжэ хэлэбэ: – Шагнагты намайе, левидүүд!

⁹ Таанадые Израилиин Бурхан Израилиин бүхы арад түмэнһөө шэлэжэ абаад, зондо алба хэжэ, хүнүүдэй урда зогсожо, Эзэнэй Нангин һүмэдэ албалхын түлөө шэлээл. Энэнь таанадта багадаа гү?!

¹⁰ Таанадые, левидүүдые, Эзэн Өөртөө дүтэлүүлээ. Тиихэдэнь мүнөө таанад улам саашаа нэтэржэ, тахилай санаартад болохоёо эрмэлзэбэт.

¹¹ Эзэндэ эсэргүүсэжэ, ши, шамтай үгэеэ үгэлсэгшэд, буһалгаа хэхэ гэбэ гүт? Муу юумэ Аһароон таанадта хээгүйл! Теэд юундэ таанад Аһароондо дураа гутаа, гэмэрэлдээ юмта?!

¹² Тиигээд Моисей Элиаабай Датаан Абираам хоёр хүбүүдые дуудан ерүүлхэ гэжэ тэдээндэ зарасаяа эльгээбэ. Теэд тэдэ иигэжэ хэлэбэ: – Бидэ ошохогүйбди!

¹³ Эдеэ хоолоор элбэг дэлбэг газарһаа энэ сүл губида асаржа, бидэниие тураажа алахашни багадаад, маанадые зонхилхо гээбши?!

¹⁴ Шинии хойноһоо юундэ дахаха болообибди? Эзэнэй үгэхэб гэһэн эдеэ хоолоор элбэг дэлбэг газарта бидэниие асараа гүш? Үзэм жэмэстэ мододой ургадаг үрэжэлтэй газар бидэндэ үгөө аалши? Бидэниие энэ үгөөр мэхэлхэ гэжэ борохон ухаандаа оруулаа гүш? Бидэнэр ошохогүйбди!

¹⁵ Моисей аргагүй ехээр уурлажа, Эзэндэ иигэжэ хэлэбэ: – Эдэнэй нэгэндэшье би муу юумэ хээгүйб. Эдилгэ болгожо нэгэшье элжэгэ абаагүйб. Эзэн, тэдээнһээ үргэл бэлэг бү абыт!

¹⁶ Моисей Коорахта иигэжэ хэлэбэ: – Ши болон шамтай үгэеэ үгэсэлдэгшэд үглөөдэр Эзэнэй урда зогсогты. Ши, шамтай үгэеэ нэгэдэн үгэлсэгшэдтэй хамта Аһароон тэндэ байлсаха.

¹⁷ Тахилай шэрээгэй урда таанадай хүн бүхэн өөр өөрынгөө бойпуур асаржа, тэрээн соогоо улаан сог хээд, дээрэнь аятай һайхан үнэртэй уталга үбэнүүлэгты. Хоёр зуун табин бойпууртай хамта Аһароон ши хоёрой бойпуурнууд оролсохо.

¹⁸ Хүн бүхэн өөр өөрынгөө бойпуур асаржа, тэрээн соогоо улаан сог хэжэ, дээрэһээнь уталга үбэнүүлээд, майхан һүмын үүдэндэ сугларба. Моисей Аһароон хоёр баһал тэндэ зогсобод.

¹⁹ Коорах бүхы арад зоноо Моисей Аһароон хоёрой урдаһаа харуулан, майхан һүмын үүдэнэй урда суглуулба. Тэндэ байһан хүн бүхэн Эзэнэй ялбама гэрэл харажархиба!

²⁰ Эзэн Моисей Аһароон хоёрто иигэжэ айладаба:

²¹ – Та хоёр эндэһээ холодогты. Ушар юуб гэхэдэ, Би тэдэниие энэ дары үгы хэхэм.

²² Моисей Аһароон хоёр нюураараа газар дэрлэн унажа зальбараад, Эзэндэ иигэжэ хэлэбэ: – Өө, хүлисыт, Бурхан, амиды голтой алишье амитанай Бурхан! Ори ганса хүнэй нүгэл хэхэдэнь, бүхы арад зондо Та уураа бү гаргыт!

²³ Тиихэдэнь Эзэн Моисейдэ иигэжэ айладаба:

²⁴ – Коорах, Датаанай болон Абираамай майхануудһаа холодогты гэжэ арад зондо хэлэ.

²⁵ Моисей Датаанай болон Абираамай майханууд тээшэ ошобо. Израильшуудай ахалагшад тэрэниие дахабад.

²⁶ Моисей арад зондо иигэжэ мэдээсэбэ: – Эдэ нүгэлтэй хүнүүдэй майхануудһаа холодогты, юумэнүүдтэнь гар бү хүрэгты. Хэрбэеэ тэдээндэ гар хүрэбэл, хэһэн нүгэлэйнь түлөө хосорхот!

²⁷ Улад зон Коорахай, Датаанай болон Абираамай майхануудһаа холодон ошобод. Теэд Датаан ба Абираам газаашаа гараад, өөһэдынгөө һамгад, хүбүүд, нарай үхибүүдтэеэ хамта майхануудайнгаа үүдэндэ зогсобод.

²⁸ Моисей иигэжэ хэлэбэ: – Өөрын дура зоргоор бэшэ, харин Эзэнэй эльгээхэдэ, эдэ бүгэдые минии бүтээһые таанад мүнөө иимэ юумэнһээ мэдэхэт:

²⁹ эдэнэрэй юрын үхэлөөр үхөө һаань, Эзэн намайе эльгээгээгүй гэжэ мэдэхэт.

³⁰ Харин хэрбэеэ юрын бэшэ юумэ Эзэнэй хэбэл, хэрбэеэ газар ангайгаад, бүхы зөөри хогшолтойнь хамта эдэниие газарай залгибал, хэрбэеэ эдэнэй амидыгаар Үхэлэй орон руу ошобол, мэдэжэ абаарайгты – эдэ зон Эзэндэ харша юумэ хээ.

³¹ Иигэжэ Моисейн хэлэхэтэй сасуу тэдэнэй хүл доро газар хаха гантан ангайжа,

³² Коорахай уг удамууд гэр бүлэнүүдтэеэ, зөөри хогшолтоёо газарай тэрэ ган руу унабад.

³³ Тэдэнэр амидыгаар эд зөөритэеэ хамта Үхэлэй орондо ошобод. Тэдэнэй дээрэ газарай ган хаагдаба. Тиигэжэ тэдэнэр түрэл арадайнгаа дундаһаа үгы болобо.

³⁴ Хажуугаарнь байгаа израильшууд тэдэнэй хашхаралдаае дуулаад: «Бидэнииешье баһал газар үрэбхижэ магад!» – гэлдэн, тэндэһээ тэрьедэн гүйлдэшэбэд.

³⁵ Эзэнһээ ялбама гал гаража, уталга асарһан 250 хүниие шатаан галдаба.

Аһарооной һүлдэ тулгуур

³⁶ Эзэн Моисейдэ иигэжэ айладаба:

³⁷ – Тэндэ галдуулагшадһаа үлэһэн бойпуурнуудые суглуулжа, нүүрһэ, нурмынь хаяжа сэбэрлэ гэжэ санаарта Аһарооной хүбүүн Эльазаарта хэлэ. Юуб гэбэл, тэдэ арюун болоо.

³⁸ Тэдэнэй эзэдынь нүгэлэйнгөө түлөө үхөө. Бойпуурнуудые дабтан хабтайлгажа, нимгэн түмэр болгуулаад, үргэлэй шэрээнүүдые бүрхөөн хушаг. Тэдэ амһартануудые Эзэн руу асардаг байгаа, тиигээд тэдэ арюун болонхой. Тэдэ хушалтанууд уридшалан һэргылэмжын тэмдэг израильшуудта боложо үгэг.

³⁹ Санаарта Эльазаар галда шатажа дүрэһэн зэд бойпуурнуудые бурма сооһоо суглуулаад, үргэлэй шэрээнүүдые бүрхөөн хушаха нимгэн хушалтанууд болгон дабтуулжа,

⁴⁰ израильшуудай хэтын хэтэдэ һанажа ябахын тула һүлдэ тэмдэг болгожо хабтайлгуулба. Моисей Эзэнэй айладаһан захяаень дүүргэжэ, Аһарооной үринэрһээ бэшэ хэншье Эзэнэй урда уталга носоохо ёһогүй болобо. Хэрбэеэ ондоо хүн уталгые носоогоо һаа, Коорах болон тэрээнтэй үгэеэ үгэсэлдэгшэд мэтээр үхэхэ.

Аһароон арад зониие абарба

⁴¹ Үглөөдэрынь бүхы израильшууд Моисей Аһароон хоёрто эсэргүүсэн ерээд: – Та хоёр лэ Эзэнэй зониие алаат! – гэжэ хашхаралдаба.

⁴² Арад зоной тэндэ сугларжа, буһалгаа хэгшэдые дэмжэхэдэнь, Моисей Аһароон хоёр майхан һүмэ тээшэ эрьелдэн хараба. Одоо тэндэ майхан һүмые үүлэн бүрхөөн хушаад байба. Тэрэ үүлэнһээ Эзэнэй һаруул гэрэл туяаржа эхилбэ.

⁴³ Моисей Аһароон хоёр майхан һүмэдэ туласа дүтэлбэ.

⁴⁴ Эзэн Моисейдэ иигэжэ айладаба:

⁴⁵ – Эдэ хүнүүдһээ таанад холо бологты. Энэ дары эдэниие үгы хэхэм! Моисей Аһароон хоёр нюураараа газар дэрлэн, Эзэндэ һүгэдэн зальбарбад.

⁴⁶ Моисей Аһароондо иигэжэ хэлэбэ: – Өөрынгөө бойпуур абаад, үргэлэй шэрээ дээрэһээ улаан сог болон уталга тэрээн соогоо хээд, аятай һайхан үнэр хангалтуулан, арад зондоо түргэн ошожо, тэдэниие аршалан арюудха. Ушар юуб гэхэдэ, Эзэнэй уур сухал хүрэжэ, гай тодхор эхилбэ, тэрэниие болюулха хэрэгтэй!

^47-48 Аһароон Моисейн захиралтые дүүргэжэ, һайхан үнэртэй уталга абаад, арад зондоо ошобо. Тиихэдэнь тэдэнэй дунда үхэл тахал таража эхилээд байба. Аһароон үхэгшэдэй болон амиды хүнүүдэй хоорондо зогсоод, тэдэниие уталгаараа арюудхажа, үхэл тахалһаа абарба.

⁴⁹ Коорахай гэм зэмээр үхэгшэдһөө гадуур 14 700 хүн үхэбэ.

⁵⁰ Үхэл тахалай замхахадань, Аһароон Моисейдэ бусажа, майхан һүмын үүдэндэ ерэбэ.