Тоололго 12 - Библи

Мириамые хэһээлгэ

¹ Мириам Аһароон хоёр Моисейдэ дураа гутажа, Күүшһээ уг гарбалтай эхэнэрые һамга абаһанайнь түлөө зэмэлбэд.

² – Эзэн гансал Моисейгээр дамжуулан һургаал заабаринуудаа арад зондо хэлүүлнэ гэжэ гү? Эзэн бидэнэрээршье дамжуулан, ерээдүйн сагта болохо юумэнүүдые уридшалан арад зондо хэлэнэл, – гэжэ тэдэ хоёрой хэлэхые Эзэн дуулаба.

³ Моисейһээ бэшэ даруу номгон зантай хүн энэ дэлхэй дээрэ үгы байгаа.

⁴ Тэрэ дары Эзэн Моисей, Аһароон, Мириам гурбанда иигэжэ айладаба: – Та гурбан майхан һүмэдэ ошогты. Тэдэ гурбан майхан һүмэ руу шэглэбэ.

⁵ Эзэнэй үүлэн бахана майхан һүмын үүдэн дээрэ тогтоод, Аһароон Мириам хоёрые дуудахадань, тэдэ хоёр дүтэлэн ошобо.

⁶ Эзэн тэдэ хоёрто иигэжэ айладаба: – Минии үгэ шагнагты! Хэрбэеэ Минии лүндэншэн таанадай дунда бии болоһон байбал, Би, Эзэн, тэрээндэ үзэгдэл үзүүлдэгби. Зүүдэлжэ байхадань, тэдээндэ айладхал буулгадагби.

⁷ Моисейтэй тад ондоогоор харилсанаб, Моисей – Минии үнэн сэхэ зараса. Тэрэ Минии гэртэ бүримүһэн түгэс этигэмжэтэ мүн!

⁸ Тэрээнтэй Би улаан нюураараа уулзалдан, далда хэлээр бэшэ, сэхэ хөөрэлдэнэб. Тэрэ Минии дүрсэ үзэдэг. Тиигээд таанад Моисейдэ, Минии зарасада, юундэ эсэргүүсэхэ болообта?!

⁹ Тэдээндэ Эзэн уур сухалаа орьёлуулба. Тиигээд Тэрэ тэндэһээ зайлаба.

¹⁰ Үүлэн баханын майхан һүмэһөө холодоходонь, Мириамай бэе саһан мэтэ сагаан арһанай үбшөөр хушагдаба. Аһароон эрьелдээд, арһанай үбшэндэ Мириамай нэрбэгдэһые хараба.

¹¹ Аһароон Моисейдэ иигэжэ хэлэбэ: – Минии эзэн, гуйнаб, мунхажа тэнэгээр дуугарһан маанадай нүгэлые хүлисыт.

¹² Эхын умай соо һамшаад, хахад бэень үжэһэн, амигүй түрэһэн үхибүүн мэтэ бү болгыт Мириамые.

¹³ Моисей Эзэндэ шанга дуугаар хандан, иигэжэ гуйба: – Бурхан, тэрэниие аргалыт даа!

¹⁴ Эзэн Моисейдэ иигэжэ айладаба: – Эсэгэнь тэрээндэ уурлажа, нюуртань нёлбоо һаань, эшэгүүридэ тэрэ орохогүй байгаа гү? Долоон хоногто тэрэ хотон хүреэнһөө арилаг. Долоон хоногой үнгэрһэн хойно дахинаа тэрэ хотон хүреэндээ бусаг.

¹⁵ Мириам долоон хоногоор сүлүүлжэ, хотон хүреэнһөө гаража ошобо. Израильшууд аян замаа үргэлжэлүүлэнгүй, Мириамай бусатар тогтон байрлаһан газартаа байба.