Тимофейдэ 1-дэхи 4 - Библи

Хуурмаг һургагшад тухай һургаал

¹ Һүүлшын үдэрнүүдтэ зарим хүнүүд һүзэгөө алдаха, ада шүдхэрнүүдэй альбанда орохо, шолмосой һургаалые анхарха гээд Арюун Һүлдэ элеэр хэлэнэ.

² Тэрэ хуурмаг һургаал халуун түмэртэ хайруулжа, һэшхэлээ алдаһан билдагууша худалшадай оролдолгоор тараха.

³ Тэдэ зон гэрлэхые, зарим юумэ эдихые хорихо. Зүгөөр Бурхан тэрэ эдеэ хоолые баясхалан хүргэһэн зальбаралай һүүлдэ һүзэглэгшэдтэ, үнэн зүбые мэдэрһэн хүнүүдтэ эдихыень бүтээгөө.

⁴ Бурханай бүтээһэн бүхы юумэн һайн, тиимэһээ ямаршье юумэнһээ арсангүй, харин баясхалангай зальбарал хүргэн абаха ёһотойбди.

⁵ Ушарынь гэхэдэ, Бурханай үгөөр, зальбаралаар тэдэ юумэнүүд арюудхагдана.

Иисүүс Христоосой һайн албатан

⁶ Иимэ заабаринуудые һүзэглэгшэдтэ үгэжэ байбал, өөрыгөө зорюулһан үнэн зүб һургаалаар ба һүзэгэй үгэнүүдээр һанал бодолоо дүүргэжэ, ши Христоос Иисүүсэй һайн албатан болохош.

⁷ Бурханиие буруушааһан үльгэр зугаануудһаа холодожо, Бурханай мэдэлдэ байжа һура.

⁸ Бэеын һорилго бага зэргэ туһатай, гэхэдэ оюун ухаанай дадалга алишье сагта туһатай, ушарынь хэлэбэл, тэрэ эндэ газар дэлхэй дээрэшье, ерээдүйдэ тэнгэридэшье амидарал найдуулна.

⁹ Минии хэлэһэн үнэн зүб юм, тэрээндэ этигэжэ болохо.

¹⁰ Амиды Бурханда найдажа байһан хадаа бидэ тэмсэжэ, хүндэ ажал хэжэ байнабди. Ушарынь юуб гэхэдэ, амиды Бурхан бүхы хүнүүдэй, илангаяа һүзэглэгшэдэй Абарагша мүн.

¹¹ Эдэ бүхэниие хүнүүдтэ захи, эдэ бүхэндэ хүнүүдые һурга.

¹² Залуухан байнаш гээд шамда хайхарамжагүйгөөр бү хандаг. Ши хэлэһэн үгөөрөө, амидаралаараа, хайра дураараа, һүзэгөөрөө, арюун сэбэрээрээ һүзэглэгшэдтэ жэшээ харуулжа байгаарай.

¹³ Шамда ошоторни, ши хүнүүдтэ Нангин Бэшэг уншажа, номножо, тайлбарилжа байгаарай.

¹⁴ Бүлгэмэй хүтэлэгшэдэй уридшалан хэлээд, дээрэшни гараа табихадань, шамда абьяас бэлиг үгтөө. Тэрэ абьяас бэлигээ хэрэглэжэ байгаарай.

¹⁵ Хүн бүхэндэ амжалтануудайшни элеэр харагдажа байхынь тула ши эдэ үүргэнүүдээ дүүргэжэ бай, өөрыгөө бүрин тэдэндэ зорюула.

¹⁶ Ажабайдалдаа, һургажа байһан юумэндээ анхаралаа хандуула. Тиигэжэ байбал, ши өөрыгөөшье, өөрынгөө шагнагшадыешье абархаш.