Тидтэ 3 - Библи

Христиан һүзэглэгшэд өөһэдыгөө ямараар абажа ябахаб

¹ Засаглагша болон захирагшадай үгыень дуулажа, эрхэ мэдэлдэнь байхые, ямаршье сагта дэмбэрэлтэ һайхан хэрэгүүдые хэхээр бэлэн байхые һүзэглэгшэ зондо һануулжа байгаарай.

² Хүниие хардажа бү хэлэгты, харин эбтэй эетэй, амгалан тайбан байгты, хүн бүхэндэ ходо дарууханаар хандагты гэжэ тэдэндэ баһал хэлэжэ байгаарай.

³ Бидэшье өөһэдөө урдань баһал тэнэг, үгэ дууладаггүй, эндүүржэ ябадаг һэмди. Ташаяан хүсэлэнгүүдэй болон элдэб янзын сэдьхэлээ ханалгын мэдэлдэ байгаабди. Бидэ атаархалдан, хара һанаатайгаар амидардаг, бэе бэеэ үзэн ядадаг һэмди.

⁴ Харин манай Абарагша, Бурхан аша буянгаа, хайра дураяа үршөөжэ,

⁵ бидэниие абараа. Хэһэн дэмбэрэлтэй хэрэгүүдэймнай ашаар бэшэ, харин Өөрынгөө үршөөл хайраар Арюун Һүлдын ашаар Бурхан бидэниие арюудхан угаажа, шэнээр түрүүлжэ, шэнэ амидарал хайрлажа, бидэниие абараа.

^6-7 Бурханай үршөөл хайраар сагааруулагдажа, найдажа байһан мүнхын амидарал залгамжалхын тула Бурхан манай Абарагша Иисүүс Христоосоор дамжуулан, Арюун Һүлдэ маанадта элбэг дэлбэгээр үршөөгөө.

⁸ Энэ хэлээшэмнай үнэн. Үлзытэй хэрэгүүдые оролдосотойгоор бүтээжэ байхыень Бурханда һүзэглэһэн хүнүүдые ши идхан һургажа байгаарай. Иимэ хэрэгүүд зондо ехэл аша туһатай, һайн.

⁹ Тэнэг арсалдаануудһаа, уг гарбал ба Хуули тухай хэрүүл, заргалдаанһаа зайлажа байгаарай. Тэдэ болбол аша туһагүй, дэмы юм.

¹⁰ Хэрүүл татагшадта хоёр дахин ухаа заагаад, удаань тэдэнһээ холодожо байгаарай.

¹¹ Тиимэ хүнүүд буруу замда оробо, тиин нүгэлнүүдынь тэдэнэй зэмэтэй байһыень гэршэлнэ гэжэ мэдэнэ ха юмши.

Һүүлшын захяа

¹² Шамда Артемые гү, али Тихикые эльгээхэдэмни, ши түргэхэн намда Никополь хото хүрэжэ ерэхые бодоорой. Би тэндэ үбэлжэхэ гэжэ шиидээб.

¹³ Зинаа үмэглэгшэ Аполлос хоёрой аян замаа үргэлжэлүүлхэдэнь, юугээршье дутаангүй ябуулхые шадалаараа оролдоорой.

¹⁴ Манай хүнүүд өөһэдтөө шухала хэрэгтэй юумэ хэжэ, буянтай һайхан хэрэгүүдые бүтээн, сагаа үнгэргэжэ һураха ёһотой. Тэдэнэр удхагүй дэмыгээр ажамидарха ёһогүй.

¹⁵ Намтай байһан зон булта шамда амар мэндые хүргэнэ. Һүзэглэгшэ нүхэдтэмнай амар мэндыемнай дамжуулаарай. Бурханай үршөөл хайра та бүгэдэндэ үгтэхэнь болтогой.